Ордны улаан хивсийг "эзэгнэгч"

Л.Оюун-Эрдэнийг энд дипломын агуулгаар нь нийтээрээ шүүж байх зуур тэр Владивосток хотноо В.Путинтай уулзаж, барууныхны хараанд илүү эрсдэлтэйгээр өртөв. Харин У.Хүрэлсүх төмөр замын нээлтийн гол дүр болохын тулд Женкогоо жийж, тууз хайчлаад бас л баахан шүүмжлүүлээд амжлаа.

Ерөөс энэ зуур ЗГХЭГ-ын дарга Д.Амарбаясгалан л их амгалан байж, жинхэнэ утгаар нь төрийн ордны улаан хивсэн дээгүүр маадгар алхав.

Тэрбээр МХЕГ-ын чиг үүргийг өөрчилж, ЗГХЭГ-ын харьяанд авчирч, яамдууд шалгах ажлаа чангаруулна гэх сонирхолтой өнцөг хэлсэн. Дараа нь нийтэд бүр хүчрэгдэхээ болиод буй Ж.Соронзонг ажлаас халах тушаал "айлдлаа".

Д.Амарбаясгалангийн энэ дүр яг У.Хүрэлсүх Ерөнхий сайд байх үед Л.Оюун-Эрдэнэ ЗГХЭГ-ын даргаар ажиллаж байсан төрхтэй адил харагдана. У.Хүрэлсүх гэж супер ардын баатар байсаар байтал л Л.Оюун-Эрдэнэ нь яаж ийгээд улаан хивсэн дээгүүр түрүүлж алхаад, нийтийн алга ташилт авчхаад байсан. Тэр үе.

Тэгж л тэр урагшаа явах хамаг пигураа улам лавшруулж, У.Хүрэлсүхийн пи-аристууд дэмий л баахан санааширсан. Үүнийг эдүгээ Л.Оюун-Эрдэнийг Ерөнхий сайд байх үед Д.Амарбаясгалан үргэлжлүүлэх нь.

Нэг үе, нэг нам, нийлэхээс аргагүй замууд Л.Оюун-Эрдэнэ, Д.Амарбаясгалан нарыг холбож буй. Тэд одоо өнгөн талдаа намаа ч, засгаа тэн тэнцүү хараандаа авцгаалаа.

Хоёр ийм хүч эв найртайгаар зэрэгцэн оршиход асар хүнд.

Гэвчиг МАН дотор өдөр ч шөнө ч үл зогсон, мөлхөө байдлаар ажиллаж л байдаг С.Батболд, Ерөнхийлөгч У.Хүрэлсүхийн өнөөгийн нөлөөлөл тэргүүтнүүд Л.Оюун-Эрдэнэ, Д.Амарбаясгалан нарыг нягтрахаас аргагүйд хүргэж буй. Ямартай ч МАН-ын генсек хийх хугацаандаа маш сайн тоо, балансууд дээр ажиллаж сурсан.

Олон хүмүүстэй хэлэлцэхдээ хэлэлцэж явсан туршлагаараа хувь хүнийхээ зүгээс "хий"-гүй болж, үг яриа нь ч сайтар тэгширсэн. Ийм л Д.Амарбаясгалан гэгч хүн ордны улаан хивсэн дээгүүр хурдтай жирийлгэж эхэллээ.

Сая бүрдсэн Засгийн газрыг хэрсүү нүдээр харвал бизнесийн томчуудад л тал зассан бүтэц бий болсон. Хууччуулаа гээхгүйгээр шинэ маягийн бүлэглэл, фракц үүсгэж удирдах нь Д.Амарбаясгалангийн төв санаа гэлтэй.

Тэр МАН-ын Тусгаар тогтнолын ордныг хувийн бизнесээ өсгөх, парламентад дуу хоолойтой болох, төрийн албанд өөрийн шинэ сүлжээг үүсгэх, Говь-Алтайн тойргийг хэдэн сонгууль дамнан "хаанчлах" бэлтгэлээ хангахад хангалттай ашигласан. Одоо Төрийн ордныг хэрхэн ашиглахыг анзаарч л байгаарай.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй