Яамны ажилтан: ЗГ-аас хүчээр “Алсын хараа 2050” сургалтад суулгаж байгаа нь социализм шиг санагдаж байна

"Алсын хараа 2050" Монгол Улсын хөгжлийн урт хугацааны бодлогыг иргэдэд сурталчлан таниулах зорилгоор төрийн албан хаагчдыг сургалтад хамруулах чиглэлийг Засгийн газраас өгч улмаар хэрэгжээд явж байна. Гэвч энэ сургалтад хамрагдахыг хүсэхгүй байгаа яамны ажилчид байгаа аж.

Сургалт эхэлснээс хойш дараах яамнуудад “Алсын хараа 2050” сургалт болжээ.

• БХЯ
• БХБЯ
• БШУЯ
• ЗТХЯ

Тэгвэл есдүгээр сарын 9-10-нд болсон сургалтад БХЯ-аас 90 албан хаагч хамрагдах байсны 70%, БХБЯ-ны 100 албан хаагчид оролцохоос 37 хувийн ирцтэй байжээ. Иймээс сургалтад оролцоогүй албан хаагчдыг цалингийн 10 хувиар торгож цаашлаад ажлаас халах хүртэл арга хэмжээ авна гэдгийг ЗГХЭГ-ын дарга Д.Амарбаясагалан хэлсэн.

Тэгвэл эндээс яамны албан хаагчид энэ асуудлыг хүлээн зөвшөөрч байна уу, сургалтад суух нь хэр үр өгөөжтэй байна вэ гэсэн асуулт гарч ирнэ.

Бид энэ асуудлын хүрээнд одоо сургалтад хамрагдаж буй нэгэн яамны ажилтнаас тодрууллаа.

-Сургалтад суухад нь хүндрэл учирч байна уу?

-Цахимаар болон танхимаар орж байгаа. Яах вэ нэг их хүндрэл одоохондоо учраагүй л байна. Гэхдээ манай яамныхан төвөгшөөж хүлээж авч байгаа нь үнэн.

-Яагаад төвөгшөөнө гэж?

-Бидний ажил ямар их байдаг билээ дээ. Өглөө гараад л орой орж ирдэг. Гэтэл хажуугаар нь сургалтад сууна. Мөн дээрээс нь шалгалт шүүлэг авна гэж байгаа. Би ажлаа тараад шөнийн цагаар бэлдэж байгаа. Уг нь гэртээ амарч байх цаг л даа. Мөн дээрээс нь хэрвээ чи суухгүй бол цалингийн хувьдана, ажлаас хална ч гэх шиг. Шууд хүчээр тулгаж байгаа нь надад социализм шиг санагдаж байна. Уг нь бид чинь ардчилсан нийгэмд амьдарч байгаа шүү дээ. Гэхдээ мэдээж ирээдүйд юу хийх, өнгөрсөнд юун дээр алдсан, улс орныг яавал хөгжүүлэх үү гээд хэрэгтэй л дээ. Хамгийн гол нь нэг тийм хэв загварт л орох шаардлагатай болж таарах юм шиг

-Одоогоор танай яамнаас хариуцлага тооцуулсан хүн бий юу

-Байхгүй.

-Сургалтад суугаад юу сурч мэдэв?

-Одоо бид шалгалтдаа бэлдэж байна. Яг агуулгаар нь харах юм бол хэрэгтэй зүйл байгаа л даа. “Алсын хараа 2050” сургалт өөрөө есөн тулгуур багана, 50 зорилт, 187 хэрэгжүүлэх төслийг агуулсан томоохон хэмжээний баримт бичиг. Монгол улсын хөгжлийн өнгөрсөн 30 жилийг дүгнэж, үндэсний үнэт зүйлд тулгуурлаж, Монгол хүний үндэсний ижилсэл, ондоошлыг тусгаснаараа онцлог, төрийн ой санамжийг бүрдүүлэх баримт бичиг гэлцдэг. Надад сургалтаас хоцорсон зүйл бол байхгүй.

Уг нь сургалт судалгааг шууд хүчээр тулгаж болохгүй мэт. Яам тамгын газар алба хашиж буй хүмүүс ёстой л амаа бариад тэвчиж өнгөрүүлж байгаа аж. Хэрвээ тэд эсэргүүцэж, сургалтад хамрагдахгүй гэвэл цалингаасаа хасуулах, бүх ажлаас халагдах дээрээ тулах учраас айдастай бас хүчээр сууж байгаа олон мэргэжилтэн байгааг онцлох хэрэгтэй.

Энэ мэдээнд өгөх таны үнэлгээ

Хуваалцаарай Жиргээрэй