Жил бүрийн гуравдугаар сарын гурав дахь долоо хоногийн бямба гарагийг Эх дэлхийн цаг болгон дэлхий даяар тэмдэглэн өнгөрүүлдэг билээ. Манай улсад тус өдрийг энэ сарын 25-ны өдөр буюу бямба гарагт тэмдэглэн өнгөрүүлэх юм. Тайваньд бакалавраа төгсөж, БНХАУ-д магистрын зэрэг хамгаалахаар суралцаж буй "EFP ALUMNI"-гийн гүйцэтгэх захирал Б.Цэлмэгтэй Эх дэлхийн цагийн талаар ярилцлаа.
-Юуны өмнө уншигчдад Эх дэлхийн цагийн талаар тайлбарлаж өгөхгүй юү?
-Эх дэлхийн цаг гэдэг нь уур амьсгалын өөрчлөлтийн эсрэг дэлхийн нийтийг хамарсан хамгийн том тэмдэглэлт өдөр. Энэ өдөр нь уур амьсгалын өөрчлөлттэй тэмцэхэд хувь хүний оролцоо чухал гэх ойлголт, мэдлэгийг дээшлүүлэх зорилготой Дэлхийн байгаль хамгаалах сангаас хэрэгжүүлдэг үйл ажиллагаа.
2007 онд Австралийн Дуурийн театр болон эргэн тойрных нь барилга байгууламжууд гэрлээ унтрааж байсан нь Эх дэлхийн цагийн эхлэл хэмээн үздэг. Өнөөдрийн байдлаар дэлхийн 190 гаруй орны хоёр орчим тэрбум хүн эх дэлхийн цагт нэгдэж, энэ өдрийг тэмдэглэн өнгөрүүлж байна.
-Олон улсад 2007 оноос эхлэлтэй гэхээр манайд хэзээнээс тэмдэглэж эхэлсэн байдаг бол?
-Монгол Улсад албан ёсоор 2010 оноос эхэлж тэмдэглэсэн. Энэ жил 13 дахь жилдээ тэмдэглэн өнгөрүүлнэ. Цар тахлын жилүүдэд цахимаар тэмдэглэсэн бол одоо олон нийтийг хамарна.
-Ач холбогдол нь юу вэ?
-Энэ өдрийн хүрээнд дэлхий нийтээрээ орон нутгийнхаа цагаар яг нэг цаг гэрлээ унтраадаг. Ингэснээр эрчим хүчний үйлдвэрлэлээс гарах хүлэмжийн хийн ялгарлыг бууруулахад хувь нэмэр оруулдаг юм. Эх дэлхий байгаль орчноо хайрлахад хүн бүрийн оролцоо чухал үүрэгтэй гэдгийг жил бүрийн энэ өдрөөр олон нийтэд ойлгуулах нь хамгийн чухал зүйл.
-Жил бүр өөр өөр уриан дор нэгдээ, тэмдэглэн өнгөрүүлдэг. Энэ жилийн тухайд хэрхэх вэ?
-Жил бүр тогтсон нэг уриалга дор тэмдэглэн өнгөрүүлдэг. Энэ жилийн хувьд "Эх дэлхийдээ амс хийх цаг өгье" уриан дор нэгдэж байгаа.
Хүн бүр дор бүрнээ байгаль орчноо хайрлан хамгаалж, жижиг гэлтгүй үйлдлийг хийвэл тэр нь эх дэлхийдээ бага ч гэсэн амс хийх чөлөө өгч чадна гэдэг санааг гарган энэ уриалгыг дэвшүүлсэн. Энэ уриалгыг дэмжиж бид олон нийтийн цахим хуудсаараа дамжуулан өдөр тутамдаа байгаль орчиндоо ээлтэй жижиг гэлтгүй үйлдэл хийдэг чимээгүй баатруудын цуврал контент бичлэг бэлтгэн, цахим хуудсаараа дамжуулан сурталчлах ажлыг зохион байгуулж байна.
Түүнээс гадна бид энэхүү цуврал контентоороо байгальд ээлтэй үйл ажиллагаа явуулдаг байгууллагуудыг сурталчлан, бусад байгууллага, аж ахуй нэгжүүдэд бага ч атугай нөлөөлөх зорилготой.
Бид гуравдугаар сарын 25-нд Зайсан Хилл цогцолборт хүмүүст сонирхолтой байдлаар мэдээлэл хүргэхээс гадна хүрээлэн буй орчныг хайрлах эерэг дадалтай болох талаар уриалсан тэмцээн дахин ашигласан хувцасны шоу зэрэг үйл ажиллагааг зохион байгуулна. Өдөрлөг 15-17 цагийн хооронд үргэлжилнэ. Мөн хувцасны шоу, тэмцээнд оролцсон хүмүүст гарын бэлэг өгч байгаа.
-Өмнөх жилүүдийн үйл ажиллагаанд хэр их хүн хамрагдав?
-2022 онд 59,294 хүнд хүрсэн гэх тооцоолол бий. 2021 онд 206 байгууллага нэгдэж, давхардсан тоогоор 32,676 хүнд хүрсэн байна
-Ярилцсанд баярлалаа.
Н.АННА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
ЭХ НУТАГ НЬ САЙХАН ЗОХИЖЭЭ БАЯР ХҮРГЭЕ
Аятайхан эерэг мэдээлэл байна. Ийм сайхан зүйлийг санаачлан чиглүүлэн хийх гэж байгаа эерэг хандлагатай з�##�уу лидерүүдээ баяр хүргэе! Ажил үйлс нь дэвшин дэгжин үр дүнд хүрч, ашигтай сайхан болог ээ!