Хэргийн явц: Т.Бадамжунайн мэдүүлгээр 2-3 иргэн гэрчээр дуудаж, 18-20 хүн нэрлүүлэхээр зэхжээ

Т.Бадамжунайг Эрүүгийн хуулийн тусгайн ангийн,

• 22.1 дүгээр зүйлийн 1 дэх хэсэг, /Эрх мэдэл, албан тушаалын байдлаа урвуулан ашиглах/,
• 22.5 дугаар зүйлийн 1 дэх хэсэг, /Хахууль өгөх/,
• 18.6 дугаар зүйлийн 1 дэх хэсэгт /Мөнгө угаах/, заасан гэмт хэрэгт холбогдуулан яллагдагчаар татаж, цагдан хориод буй.

Цагдан хоригдсоноос хойш эдүгээ долоо хонож байна. Үүний ажлын өдрүүдэд хэд хэдэн удаа мэдүүлэг авах процесс явагджээ. Одоогоор түүний биеийн байдал хэвийн, мэдүүлгээ өгч байгаа гэх мэдээллийг эх сурвалжууд өгч байна.

Түүнийг чухам ямар хэргүүдэд холбон шалгаж байж болох талаарх мэдээллийг багцлахад,

-Нэг. Т.Бадамжунайгийн холбоотой гэх трейдерийн гэрээ-

ХЗДХ-ийн сайд Х.Нямбаатар,

"Т.Бадамжунайг албадан авчирсан НЭГ шалтгаан нь 6.3 сая ам.долларын хэрэгтэй холбоотой асуудал. "Эрдэнэт" үйлдвэрт зэсийн худалдааны гэрээ хийсний ёндоонд 6.3 сая ам.доллар Монголд орж ирсэн байдаг. Үүний таван сая ам.долларыг "Женко"-гийн цэргүүд зарцуулсан. Харин 1.3 сая ам.долларыг Т.Бадамжунайтай холбож тайлбарладаг" хэмээн онцолсон.

Эх сурвалжийн өгч буй мэдээллээр уг гэрээ нь "Эрдэнэт" үйлдвэрийг Х.Бадамсүрэн удирдаж байх үед хамаарч байна. Гэхдээ УИХ-ын 23-р тогтоолын дагуу ТӨҮГ болохоос нь өмнө буюу ТӨХК байх үед нь хийгдсэн зэсийн баяжмалын трейдерийн гэрээнүүдийн нэг аж.

Уг гэрээнүүд нь шилэн данс ба бусад байдлаар нийтэд ил тавигддаггүй. Үйлдвэрийн удирдлагын хүрээнд явдаг нууцлалтай гэрээнүүдийн төрөлд хамаардаг. "Эрдэнэт" үйлдвэр нь ТӨХК байх үедээ 51/49 хувийн хувьцаа эзэмшигчдээс бүрдсэн ТУЗ-өөс Х.Бадамсүрэнг Гүйцэтгэх удирдлагаар сонгож байсан түүхтэй.

Улмаар "сахал" Д.Эрдэнэбилэг, Т.Бадамжунай нар ойрын харилцаатай байсан үед уг гэрээ хийгдсэн байж болох логик харагдаж байна.

-Хоёр. Т.Бадамжунайг хүргэн Э.Анартай нь холбон шалгах үндэслэл-

Эх сурвалжууд одоогийн байдлаар түүний хүргэн Э.Анарыг хэрэгт татан шалгаагүй гэх мэдээлэл өгч буй. Гэхдээ Т.Бадамжунайг Эрүүгийн хуулийн 22.1 дүгээр зүйлийн 1 дэх хэсэг /Эрх мэдэл, албан тушаалын байдлаа урвуулан ашиглах/-аар яллагдагчаар татсан нь анхаарал татаж буй.

Тодруулбал, 2018 оны үед тэрбээр ямар нэгэн албан тушаалгүй байв. Ийм тохиолдолд авлигад зуучилсан бол дээрх зүйл ангиар яллах үндэслэл болдог.

Хөшигний ард яригддагаар, Т.Бадамжунай 2016 оны сонгуульд МАН-ын зардлыг босгож өгөх ажлыг нугалсан. Тэр утгаараа сонгуулийн дараах томилгоонуудад ихээхэн нөлөөлөл өндөртэй оролцсон байдаг.

Энэ хүрээндээ өөрийн хүргэн Э.Анарыг нийслэлд ямар барилга баригдахыг шийддэг, хотын даргаас илүү далд эрэлттэй байдаг албан тушаал болох Хотын ерөнхий архитуктерын албан тушаалд томилсон байдаг.

Чухамдаа Т.Бадамжунайтай уулзахаар Твин товерт дугаарлагдсдын ихэнх 2018 оны үес барилгын зөвшөөрөл хүсч байсан. Энэ хүрээнд маш их талбайг барилгуудаас авах тохироо хийсэн байсан ч албажуулж чадалгүй, хилээр гарсан гэгддэг. Энэ сэжмээр хүргэн Э.Анар нь шалгагдах бүрэн боломжтой бөгөөд гэр бүлийнх нь хүрээнд эдүгээ ажиллагаа явагдаж байгаа гэх мэдээлэл байна.

Бусад: Т.Бадамжунайг ХАА-н сайд байх үеийг хамруулан шалгана гэх мэдээлэл явсан. Гэвч эдүгээ ил болж буй сангуудын мэдээлэлд ч тэр түүний холбоос төдийлөн илрэхгүй байгааг онцлууштай. Харин хот тойрсон газар олголт, барилгын зөвшөөрлүүдийг хуулийнхан хөөж байх бүрэн боломжтой юм.

Түүний мэдүүлгээс ямар сэжим хөврөх вэ гэсэн асуулт үүсч буй. Үүнд,

Нэг. Т.Бадамжунайгийн мэдүүлгэд үндэслэн, 2-3 хүнээс мэдүүлэг авч эхэлжээ

Т.Бадамжунай саатуулагдснаасаа хойш хэд хэдэн удаа мэдүүлэг өгсөн талаар дээр дурдсан. Уг мэдүүлгэд үндэслэн, 2-3 хүнээс мэдүүлэг авч эхэлжээ.

Түүнийг тойрсон хэргүүдийн хүрээнд 18-20 хүнээс мэдүүлэг авч, яллагдагчаар татах боломжтой гэж хөшигний ард хуулийнхан тооцоолсон аж.

Анхнаасаа түүнийг монголд "Шувуу" ажиллагааны хүрээнд хамгийн түрүүнд авчирсан зорилго нь мэдээллийн хамгийн том эх сурвалж гэж үзсэнтэй холбоотой. Өөрөөр хэлбэл, хууль хяналтынхны логикийг нь ойлгож, "үнэрлэчхээд" байгаа мөртөө батлах иш үндэс олохгүй байгаа хэргүүд дээр Т.Бадамжунай тодорхой чиглэл, мөр зааж өгөх боломжтой юм.

Хоёр. Цаашаа хөврөх сэжим улс төрийн хүрээнд айдас үүсгээд байна

Түүнийг ирсний дараа охидууд, түүний хүргэд гэхчлэн гэр бүлийн хүрээн дэх шалгалт нь гүнзгийрэх нь үндсэндээ тодорхой болсон. Тэрбээр, хамгийн том эрх мэдэлтэй яам буюу Б.Чойжилсүрэнгийн үед нэг хүргэнээ түүний зөвлөхөөр тавьсан. Тэр нь ТНБД-ын хэмжээнд эрх мэдэлтэй байсан гэгддэг.

Улмаар дээр дурдсанчлан нөгөө хүргэнээ хот руу Ерөнхий архитуктераар оруулж, охиноо ТӨБЗГ-т томилуулсан зэрэг холбоо хамаарлууд ихээхэн анхаарал татаж байна.

Нөгөө талд Т.Бадамжунайтай хэдэн жилийн турш дөрөө харшуулан явсан М.Энхболд, түүний нэрээр асар нөлөөтэй байсаар ирсэн 10 жилийнх нь найз, дэд сайд асан Т.Гантулга, туслах асан Ё.Баатарбилэг, Э.Батбаясгалан, Ж.Мөнхбат тэргүүтэй Архангайн фракцийнхан, сахал Д.Эрдэнэбилэг, Ажнай, Алтай Бат-Эрдэнүүд гэхчлэн уртаас урт жагсаалт хөврөх юм.

СЭТГҮҮЛЧИЙН ТЭМДЭГЛЭЛ:

• Б.Ганхуягийн мэдүүлгээр баахан улс төрч агнана гэж тооцсон ч үнэндээ талаар болсон дүр зурагтай л буй.
• Т.Аюурсайхан өчнөөн хүн нэрлэнэ гэсэн хүлээлт байсан ч өнөөх нь гишүүний эрхээ түдгэлзүүлснээс хойш нам чимээгүй л болжээ.
• Сахал Д.Эрдэнэбилэг авлига өгсөн хүмүүсээ нэрлэсэн гэгдээд л байсан, түүн шиг худал романс байсангүй.

Ийм кэйсүүд дараалан өрнөж, хамрынх нь урдуур хаалга хаагдчихаад байхад одоо Т.Бадамжунайгаас дахиад л нэр хүлээж суугаа нь манай хууль хяналтынхан болоод энэ операцыг удирдаж суугаа улс төрчдийн итгэл ерөөс тасрахгүй. Гэнэн, цайлган хэвээр буйг, мухардалд орсон замаараа дахиад л алхаж буйг нь харуулна. Гэхдээ яахав, их том зүйлийн сэжүүр нь өөрөө яах аргагүй Т.Бадамжунай. Нэр хүлээгээд л байж дээ.

ӨМНӨХ КОНТЕНТ:

"Жу" ирлээ: Тэр "Алтай" Х.Бат-Эрдэнээс Ж.Мөнхбат, Т.Аюурсайхан, хамгийн томдоо М.Энхболдыг ТАТАЖ УНАГАНА

Дэлгэрэнгүйг энд дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй