Н.Мандуул 46 хоног ШӨХТГ-ын даргаар ажилласны эцэст чөлөөлөгдөх хүсэлтээ өглөө

Шударга өрсөлдөөн, хэрэглэгчийн төлөө газрын дарга Н.Мандуул өчигдөр албан тушаалаасаа чөлөөлөгдөх хүсэлтээ Шадар сайд С.Амарсайханд гаргажээ. Тэрбээр дараах шалтгааны улмаас ажлаас чөлөөлөгдөх хүсэлтээ өгсөн байна.

Тодруулбал, ажлаа хүлээн авснаас хойших хугацаанд байгууллагын үндсэн чиг үүргийг бүрэн хэмжээнд, хангалттай байдлаар хэрэгжүүлэх зорилтыг тавин холбогдох судалгаа, шинжилгээг хийсэн байна. Улмаар хэрэглэгчийн эрхийг хамгаалах үйл ажиллагааг хэрэгжүүлэх үүрэгтэй ч хуулиар хүлээсэн үүргээ бүрэн биелүүлээн ажиллах анхдагч суурь нөхцөл бүрэдээгүй гэж дүгнэжээ. Суурь нөхцөлийг бүрдүүлэхийн тулд байгууллагын төсөв хангалттай, хүртээмжтэй, ажиллах хүчний орон тоо улсын хэмжээнд хуулийн хэрэгжилтийг хангуулахад хүрэлцэхүйц, түүнчлэн хүний нөөцийн чадавхыг сайжруулах зэрэг асуудлууд нэн тэргүүнийх хэмээн дүгнэсэн байна.

Тиймээс албан тушаалаа хүлээлгэн өгөх хүсэлтдээ Н.Мандуул "Эдгээр асуудлууд шийдэгдэхгүйгээр одоо байгаа нөхцөл, хүний нөөцийн хүчин чадлаар миний бие уг байгууллагын зорилт, чиг үүргийг хангалттай хэмжээнд хэрэгжүүлэх боломжгүй тул үүрэгт ажлаас чөлөөлөгдөх хүсэлтэй байна.

Байгууллагын бүтцийг шинэчлэх, төсвийн тодотгол хийх, газрын гишүүдийг томилох, ерөнхий байцаагчийн эрх олгуулах зэрэг хүсэлтийг удаа дараа хүргүүлж байсан ч өнөөг хүртэл шийдэгдээгүй байгаа юм" хэмээжээ.

Тэрбээр үүрэгт ажилдаа тавдугаар сарын 22-ны өдөр орсон юм. Нийт 46 хоногийн турш ШӨХТГ-ын даргын албан тушаалыг хашсан байна.

Энэ мэдээнд өгөх таны үнэлгээ

Хуваалцаарай Жиргээрэй