Хотын даргын марафон: Х.Нямбаатар дээр тохирч, Н.Учрал, О.Батнайрамдал нарыг боломжит хувилбараар ярьж байна

Хотын даргын марафон эхэллээ.

Д.Сумъяабазарын өөрийн хүсэлтээр ажлаас чөлөөлөгдөх өргөдлийг Ерөнхий сайд Л.Оюун-Эрдэнэ хараахан баталгаажуулаагүй байна. Тэр захирамж гаргаснаар Д.Сумъяабазар албан ёсоор огцорч, дараагийн хотын даргыг нэр дэвшүүлэх, томилох үйл явц өрнөх юм.

Харин энэ нь маргааш Засгийн газрын хуралдаантай өдөр явагдах чигтэй байгаа талаар эх сурвалжууд мэдээлж буй. Энэ хооронд шинэ хотын даргад хэн, хэн яригдаж байна вэ.

Ташрамд, өглөөхөн нь “Би ажлаа өгөхгүй, буруугүй” хэмээж явсан Д.Сумъабазар өдөр нь Ерөнхий сайдтай уулзаад, орой нь өргөдлөө өгчихсөн. Тэр уулзалтад хоёр улстөрчид тодорхой “зураг” зурсан буюу дараагийн хотын даргын нэр бараг тодорхой болсон байх учиртай.

Нэн тэргүүнд, ХЗДХ-ийн сайд Х.Нямбаатар

Тэр хамгийн өндөр магадлалтай яригдаж байгаа.

Х.Нямбаатар Ерөнхий сайд Л.Оюун-Эрдэнийн бүхий л ажилд улстөрчийн хувиар ч, менежерийн хувиар ч ихээхэн хань болж ирсэн. Их ч гал үүрч, ажил явуулж чаддагаа батлан харуулж буй. Д.Сумъяабазарын оронд улс төрийн тогоонд боловсорсон, УИХ, ЗГ-ын түвшинд ажиллаж үзсэн нэгэн томилогдож байж эхлүүлсэн ажлуудыг дорвитой үргэлжлүүлэх бололцоотой харагдаж буй.

Хөшигний ард Х.Нямбаатар хамгийн өндөр магадлал хүлээж байна. Харин Х.Нямбаатарыг томилбол ХЗДХ-ийн сайдаар УИХ-ын гишүүн Б.Энхбаярыг тавина гэсэн ерөнхий зураг тодорчээ.

Хоёрт, УИХ-ын гишүүн, ЦХХХ-ы сайд Н.Учрал

Тэр Ерөнхийлөгч У.Хүрэлсүхийн зүгээс дэмжлэг авах бололцоотой, залуу дүр. Улс төр дэх өөрийн нөлөө хийгээд хураасан туршлага нь болохгүй гэх газаргүй. Гэхдээ залуудах, менежерийн түвшинд хотыг бүхлээр нь базаж, гал үүрч ажиллаж чадах эсэхэд нь эргэлзэхийн шалтгаан бий.

Цахим салбарыг ирээдүйн хамгийн голлон, өндөр ач холбогдол хүлээх сегмент гэж өнөөгийн бодлого тодорхойлогчид харж яваа. Энэ үүднээс Н.Учралын хувьд ЦХХХ-ны сайдын карьераа илүү баталгаажуулах буюу төвлөрөх шаардлагатай буй.

Гуравт, МАН-ын нарийн бичгийн дарга О.Батнайрамдал

Тэр баруунд өндөр боловсрол эзэмшсэн, эрт улс төрд хөл тавьсан залуу дүрүүдийн нэг. Ерөнхий сайдаас дэмжлэг авах бололцоотой. Өмнө нь УУХҮ-ийн дэд сайдаар ажиллаж байсан. Мэдлэг чадвар, нөөцийн хувьд боломжит хувилбар байж болох ч улс төрийн туршлага харьцангуй нимгэн. Хувь хүний зан характерын хувьд ч хот гэдэг том “тогоо”-г зангаргатай базаж чадах эсэх нь эргэлзээтэй. Улс төрч, зэрэгцээд сайн менежер байх ёстой.

Дөрөвт, УИХ-ын гишүүн Э.Бат-Амгалан

Тэр БЗД-ээс парламентад хөл тавьсан. Хоттой холбоотой ажиллаж ирсэн намтар бол бий. Гэхдээ том биш. Баянзүрх дүүрэгт түшиглэн доороос өгссөн тул дүүрэгтээ сүлжээтэй, өөрийн хүрээний нөлөө, эрх мэдлийг тэнд тогтоож амжсанаас бусдаар мөн л улс төрийн туршлага, менежерийн чадвар дутна.

Э.Бат-Амгаланд найдлага бага байна.

Тавт, С.Мөнхчулуун

Тэр мөн хоттой холбоотой өгсөж ирсэн улстөрч. 2016-2020 онд НИТХ-ын төлөөлөгчөөр ажиллаж байсан. Хамгийн сүүлд ШӨХТГ-ын даргаар хэсэг хугацаанд ажилласан. Улс төрийн дэмжлэг авах цагтаа авч ирсэн ч одоо итгэл хүлээлгэнэ гэдэг бол барагтайхан. Хувь хүний нь намтар, карьер тийм ч тод, амжилттай, хийгүй бусаас гадна ойрд өнөө цагийн улс төрийн амьдрал, нийгэм цаг үеийн хараа хандлагаас хол талдаа яваа.

С.Мөнхчулуун мөн хамгийн магадлал багатай хувилбараар яригдаж байна.  

Тэмдэглэл:

Нэгэнт өрнөчихсөн энэ нөхцөл байдалд одоо дараагийн хотын мээр хэн болох нь л хамгийн чухал. 1.5 сая хүн амьдардаг, анхны төлөлөвтийн нь “хугацаа” дууссан энэ хотод одоо косметик хийдэг улстөрч хэрэггүй.

Харин одоо улс төрийн нугачаанд тэр холбоосоо тасалж, богино настай дараагийн хотын даргыг ойр зуурын тохироогоор томилох юм бол нэгт нийслэлчүүд хохирно. Хоёрт Л.Оюун-Эрдэнэ оноогоо хасуулах болно.

Мөн нөгөө талаар Нийслэлд тогтоосон дэмжлэгээ Л.Оюун-Эрдэнэ нэг мөр ашиглаж, Ж.Батбаясгалан, З.Төмөртөөмөө нарын "бугшмал" төрхтэй улстөрчдийг тэндээс холдуулах тактик баримталж магадгүй ч гэж яригдаж байгаа юм.

Хамгийн гол нь шинэ хотын дарга нь ЗГХЭГ-ын дарга Д.Амарбаясгалантай бялуу хуваахгүй. Д.Сумъяабазар Нийслэлийн МАН-ын хороогоо удирдсан хэвээр байгаа нөхцөлд тэр дараагийн хотын даргын томилгоонд хүчтэй нөлөөлөх нь дамжиггүй. Мөн Ерөнхий сайд Л.Оюун-Эрдэнэтэй удаан уулзсаныхаа дараа огцрох өргөдлөө өгснөөс нь үзвэл, шинэ хотын дарга ерөөс тэдний зурсан "зураг"-ийн хүрээнд нэр дэвших чигтэй гэж харж болохоор юм.

Энэ мэдээнд өгөх таны үнэлгээ

Хуваалцаарай Жиргээрэй