Ш.Раднаасэдийн эгчийн хүүхэд Г.Батзаяа допингтой бөхчүүдийн "найдвар" спортын арбитрыг тэргүүлдэг

"Монголын олон улсын ба үндэсний спортын арбитр" хэмээх байгууллага 2017 онд байгуулагдсан. Үүнээс хойш зургаан жилийг өнгөрөөж байна. Сүүлийн үед, допинг илэрсэн үндэсний бөхийн тамирчид тус байгууллагад ханддаг болоод буй.

Тодруулбал, допингийн шинжилгээний хариутай маргадаггүй. "Миний шинжилгээний хариуг буруу гаргалаа" гэж ханддаггүй. Харин барилдах эрхийг сэргээх өөр ямар үндэслэл байж болох тал дээр гаргалгаа тусламж хайн, спортын арбитр гэх байгууллагыг зорьдог болжээ.

Бидний өмнө нь бичсэнчлэн, Э.Оюунболд, Ц.Мөнхбаяр, Б.Өсөхбаяр нар ч шинжилгээний хариутай маргаагүй. Тэдний шинжилгээнээс допинг илэрсэн нь үнэн. Харин шинжилгээ авах процесст алдаа гарсан гэдэг үндэслэлийг спортын арбитр баримталж, тэдний барилдах эрхийг сэргээх нь зүйтэй гэж үзсэн байдаг.

Хамгийн сүүлд М.Бадарч тус байгууллагад хандаад буй. М.Бадарчийн А, Б хоёр сорьцын хоёуланд нь допинг илэрсэн. Харин одоо тэд шинжилгээ авах баг бүрэлдэхүүнд, мэргэжлийн сургалтад хамрагдаагүй хүмүүс байлцсан гэдэг үндэслэлээр маргаж байгаа. М.Бадарчид холбогдох хэргийн урьдчилсан хуралдааныг спортын арбитр энэ сарын 23-нд товлоод байгаа юм.

Тэгвэл "Монголын олон улсын ба үндэсний спортын арбитр" байгууллагын ерөнхийлөгч нь Г.Батзаяа юм. Г.Батзаяа бол УИХ-ын гишүүн Ш.Раднаасэдийн төрсөн эгчийн хүүхэд.

Ш.Раднаасэдийн төрсөн эгчийг Ш.Рагчиймаа гэдэг. Ш.Рагчиймаа нь нөхөр болон хүүгийнхээ хамтаар нийт 22 компани эзэмшдэгийн хоёр нь ББСБ гэдэг баримтыг хэвлэлд дэлгэж байв.

Тус байгууллага нь төрийн бус байгууллагын статусаар бүртгэлтэй юм.

Тодруулбал, улсын бүртгэлийн нээлттэй мэдээллийн санд, "Олон улсын ба үндэсний спортын арбитрын холбоо" НҮТББ нь Г.Батзаяа ерөнхийлөгчтэй, Г.Дарьсүрэн гүйцэтгэх захиралтай байна.

Г.Батзаяагийн хувьд СХД-ийн ИТХ-д нэр дэвшиж байсан.  Хуульч, өмгөөлөгч мэргэжилтэй. Тээвэр хөгжлийн банкны дэд захирлаас ажлын гараагаа эхэлсэн. Өмгөөллийн “Заяа энд Золоо зөв ХХН” болон “Химурга” ББСБ тэргүүтэй 10 гаруй компанитай юм байна.

Спортын арбитр хэмээх энэ байгууллага Э.Оюунболд, Ц.Мөнхбаяр, Б.Өсөхбаяр нарын бөхчүүдийн нэхэмжлэлийн дагуу, хэрхэн барилдах эрхийг сэргээх нь зүйтэй гэсэн шийдвэр гаргасан талаарх өмнөх контентыг ЭНД ДАРЖ уншина уу.

М.ТЭНГИС

Энэ мэдээнд өгөх таны үнэлгээ

Хуваалцаарай Жиргээрэй