"Фён" салхины нөлөөгөөр ойрын өдрүүдэд цаг агаарын аюулт үзэгдэл болно

Хүчтэй Фён салхины нөлөөгөөр ойрын өдрүүдэд манай орны баруун хэсгээр хүйтэрч, цаг агаарын аюулт үзэгдэл болно гэж УЦУОШГ-аас мэдээлээд байна.

Фён салхи гэдэг нь өндөр, уул нуруутай газар ажиглагддаг үзэгдэл бөгөөд уулын салхин талд тулж ирсэн чийгтэй агаар уул, нуруунд тулаад дээш өгсөх явцдаа хөрж, чийгийн агууламж нь өтгөрч үүл үүсэн, хур тунадас буюу цас болон салхин талдаа ордог. Энэ чийгтэй агаар өгсөх явцад температур нь 100 метр тутамд 0.6 градусаар хөрдөг бол чийгээ салхин дээд талдаа хаясан хуурай агаар уул нуруугаа даван уруудахдаа 100м тутамд нэг градусаар буюу салхин дээд талаасаа илүү дулаардаг. Энэ үзэгдлийг фён гэж нэрлэдэг. Манай орны хувьд Алтайн нуруунд буюу Ховд аймгийн нутагт илүү тодорхой ажиглагддаг байна.

Урд шөнө болон өнөөдөр Фён салхины нөлөөгөөр Баян-Өлгий, Ховд аймгийн нутгаар салхи секундэд 28 метр, зарим үед секундэд 34 метрийг давж ширүүсэж, шороон шуурга шуурчээ.

Мөн өнөөдөр: 

• Завханы нутгаар хүчтэй цасан шуурга шуурна
• Говь-Алтайн нутаг
• Увсын өмнөд 
• Баянхонгорын баруун хойд хэсгээр салхи секундэд 18-20 метр, зарим үед секундэд 24 метр хүрч ширүүснэ
• Увсын зүүн, Хөвсгөл, Булганы өмнөд, Архангайн хойд, Сэлэнгийн баруун хэсгээр цасан шуурга шуурна

Ирэх амралтын өдрүүдэд: 

• Хоёрдугаар сарын 16-нд баруун аймгуудын ихэнх нутаг, төвийн аймгуудын нутгийн хойд хэсгээр 
• Хоёрдугаар сарын 17-нд ихэнх нутгаар 
• Хоёрдугаар сарын 18-нд нутгийн зүүн хагаст цас орж, цасан шуурга шуурч, ихэнх нутгаар хүйтний эрч эрс чангарна гэж ОБЕГ-аас мэдээллээ.

Иймд

• Онцын шаардлагагүй бол орон нутгийн замд зорчихгүй байх
• Техникийн бүрэн бүтэн байдлыг хангах
• Цаг агаарын мэдээллийг тогтмол хүлээн авах, аюулгүй байдлаа хангах
• Цасанд суух, төөрөх, осгохоос сэргийлэх
• Зөвхөн баталгаат зам, гүүрийг сонгож зорчихыг Нийслэлийн Онцгой байдлын газраас зөвлөв. 

Мөн үзэгдэх орчин хязгаарлагдаж, зам даваа, гүвээнд халтиргаа гулгаа үүсэж, цасанд суух, хөлдөх, осгох, төөрөх эрсдэл өндөр. Тиймээс малчид малынхаа араас ганц, хоёроороо явах, хол газар луу явахгүй байхыг анхааруулж байна.

Цаг агаарын аюулт үзэгдэл болон, зудтай холбооотойгоор УОК-оос өвөлжилт хүндэрсэн аймаг, сумд руу баг гаргаж ажилууллах бөгөөд өнөөдрийн байдлаар Сүхбаатар, Баян-Өлгий аймгуудад ажиллах тов гарчээ.

Энэ мэдээнд өгөх таны үнэлгээ

Хуваалцаарай Жиргээрэй