НҮБ: Газын зурвасын оршин суугчдын дөрөвний нэг нь өлсгөлөнд нэрвэгдэхэд ойрхон байна

НҮБ-ын Аюулгүйн зөвлөл мягмар гарагт /2024.02.27/ хуралдсан байна. Тус хурлын үеэр НҮБ-ын Хүмүүнлэгийн асуудлыг зохицуулах газрын координатор дарга Рамеш Ражасингхам Газын зурваст 576 мянган хүн буюу оршин суугчдын дөрөвний нэг нь өлсгөлөнд нэрвэгдэхэд маш ойрхон байна гэдгийг анхааруулжээ.

Тэрбээр “Байлдаан үргэлжилж, дайн хүн ам их төвлөрсөн Газын өмнөд хэсэгт тархах эрсдэлтэй байгаа ийм үед маш хязгаарлагдмал арга хэмжээ л авах боломжтой. Ийм учраас бид гал зогсоохыг дахин уриалж байна” гэсэн юм.

Мөн Ражасингхам хоёроос доош насны зургаан хүүхэд тутмын нэг нь хоол тэжээлийн цочмог дутагдалд орж, Палестинд (Газын зурвас) амьдардаг 2.3 сая хүн бараг бүгдээрээ хүнсний хангалтгүй тусламжаар амь зогоож байна хэмээжээ.

НҮБ болон бусад тусламжийн байгууллагууд маш бага хэмжээний хангамж нийлүүлэхийн тулд хүртэл асар их саад бэрхшээлтэй тулгарч байгааг Ражасингхам онцолсон байна.

Тэгвэл НҮБ дахь Израилын орлогч элчин сайд Жонатан Миллер Израил улс нь Газын зурвас дахь нөхцөл байдлыг сайжруулахыг дэмжиж байгаа хэмээсэн юм. Тэрбээр нэмж хэлэхдээ тусламжийн хэмжээ болон хүргэгдэх хугацаанд үүсээд буй саад нь НҮБ болон бусад байгууллагуудаас шалтгаална хэмээжээ.

Эх сурвалж: Reuters

Энэ мэдээнд өгөх таны үнэлгээ

Хуваалцаарай Жиргээрэй