Ч.Сайханбилэг “Сонгуулийн өмнө биш, дараа нь ирж шалгуулна” гэж хэлүүлжээ

Ерөнхий сайд асан Ч.Сайханбилэг УИХ-ын 2024 оны сонгуулиас өмнө эх орондоо очно гэж улсынхаа хууль, хяналтынханд хэлсэн талаар хөшигний ард яригдаж буй. Энэ хэр бодьтой мэдээлэл вэ. Яагаад ингэж яригдах болов агуулгыг хүргэж байна.

Нэг. Ч.Сайханбилэгийг интерполын хайлтаас хассан хэвээр байна

Тэрбээр 2019 онд АНУ-ыг зорьсноосоо хойш даруй таван жилийн нүүрийг үзээд буй. Түүнийг нэгэн үес интерполын хөх буланд эрэн сурвалжилж, "Шувуу" ажиллагааны хүрээнд авчрах хүмүүсийн нэгээр нэрлэж байв.

Гэвч ЦЕГ-ын дарга асан Ж.Болдод Ч.Сайханбилэгийн нэрийг интерполын жагсаалтаас хасах чиглэл хэд хэдэн удаа ирж улмаар түүнийг нь хүлээн зөвшөөрөөгүй тул хүсэлтээ өгч, есдүгээр сарын 1-ний Засгийн газрын хуралдаанаар чөлөөөлөгдсөн гэгддэг. Тийн хасагдсанаасаа хойш интерполын жагсаалтад орж ирээгүй хэвээр байгаа юм.

Засгийн газраас "Шувуу" ажиллагааны хүрээнд Монгол Улсын 41 иргэнийг интерполоор эрэн сурвалжилж байгаагаа мэдэгдсэн. Эл жагсаалт дунд Ч.Сайханбилэг багтаагүйг цэнхэр хэсэгт дарж уншаарай.

-С.Сайханбилэгт хамаарах хэргүүд хэрхсэн бэ-

АТГ-т өнгөрсөн жилүүдэд тухайлсан хэргүүдээр хэд хэдэн том ажлын хэсэг байгуулагдсаны дотор Оюутолгойн агуулга багтдаг. Энэ хүрээнд АН-аас С.Баярцогт яллагдсан ч гурван шатны шүүхийн шийдвэрийг Дээд шүүх цагаатгасан. МАН-аас С.Баяр хорих ял авсан ч магадлангаар суллагдахдаа 5.5 тэрбум төгрөгийн эд хөрөнгийн хураамж төлж суллагдсан.

Уг багц хэрэгтэй Ч.Сайханбилэгийн асуудал хамт шалгагдсан гэгддэг ч тодорхойгүй шалтгаанаар хэрэг нь бүдгэрсэн юм.

Харин "Эрдэнэт үйлдвэр"-ийн 49 хувийг Монголд оруулж ирсэн хувийн хэвшил талд албан тушаалын байдлаа ашиглан, давуу байдал олгосон хэргээр Ч.Сайханбилэгийн хэрэг боогдоод байв. Өнгөрсөн оны сүүлээр өрнөсөн шүүхийн урьдчилсан хэлэлцүүлгээр уг хэргийг бүхэлд нь прокурорт буцаасан. Үүнд Ч.Сайханбилэгт хамаарах хэрэг ч бас багтсан билээ.

-Түүнийг сонгуулийн өмнө монголд ирнэ гэх мэдээлэл яагаад гарав-

Ерөнхий сайд асан Ч.Сайханбилэг өдгөө АНУ-д буй. Түүнийг хоёр улсын хуулийн байгууллагуудын хамтын ажиллагааны хүрээнд авчрах боломжгүй гэж албаныхан тайлбарладаг. АНУ-ын Элчин сайдын яам, бусад газруудад монголоос уг асуудлаар удаа дараа хандсан ч хүний эрх дээдлэх агуулгын хүрээнд түүнийг шууд өгч болохгүй гэх тайлбар хийдэг гэх.

Сүүлийн өдрүүдэд Ч.Сайханбилэгийг сонгуулиас өмнө монголд ирэхээ амалсан гэх мэдээлэл хөшигний ард яригдах болсон. Гэвч уг мэдээллийг албаны эх сурвалжууд болон Ч.Сайханбилэгийн хамаарал бүхий этгээдүүд эрс үгүйсгэж байгаа юм.

Тэрбээр УИХ-ын 2024 оны сонгуулийн дараа ирэх хувилбар яригдаж буй ч өмнө нь ирвэл шууд саатуулагдах эрсдэлтэй гэж үзэж буй аж. Харин сонгуулийн дараа ирж, улс төрийн бужигнаан багатай цагаар шалгуулна гэх мэдээллийг тодорхой хүрээнд өгсөн гэгдэж байна.

Энэ мэдээнд өгөх таны үнэлгээ

Хуваалцаарай Жиргээрэй