Төрийн ордонд кеттэй хөл тавьсан Т.Доржхандын уул уурхайн схем

2020 оны УИХ-ын сонгуулиар ХҮН нам ганц суудалтай парламентад хөл тавьсан. Тодруулбал ХҮН намын дарга Т.Доржханд УИХ-ын гишүүний тангараг өргөх ёслолд кэттэй орж ирэн дуулиан тарьж байлаа. Тэгвэл өдгөө тэрбээр өөрийн бизнесээ цэцэглүүлээд зогсохгүй улс төрд хэдийн байр сууриа олжээ. Энэ удаад бид Т.Доржханд, түүний төрсөн ах Т.Лувсандорж нар "Гобикоул энд Энержи" ХХК-иар асар том уул уурхайн фракц босгон үйл ажиллагаа эрхэлж байж болзошгүй схемийг танилцуулъя.

-Т.Доржхандын хамаарал бүхий компаниуд-

УИХ-ын гишүүн Т.Доржханд нь АТГ-т  2022 онд өгсөн хөрөнгө орлогын мэдүүлэгтээ Монре Даатгал ХХК-ий 88.49%-ийг эзэмшдэг гэж мэдүүлсэн. "Монре Даатгал" ХХК-ийн үйл ажиллагааны чиглэлийг хуулийн этгээдийн улсын бүртгэлийн мэдээллээс шүүж үзэхэд даатгалын үйл ажиллагаа явуулдаг компани ажээ. Өөрөөр хэлбэл Монгол Улсын их хурлын чуулганы хуралдааны дэгийн тухай хуулийн 14.10-т "гишүүн хэлэлцэж байгаа асуудалтай шууд холбоотой үйл ажиллагааны үр дүнд өөрөө болон гэр бүлийн гишүүд нь орлого олж байгаа, эсхүл бусад хэлбэрээр ашиг сонирхлын зөрчилтэй бол энэ тухай хуралдаан даргалагчид урьдчилан мэдэгдэж санал хураалтад оролцохгүй" гэж заасны дагуу УИХ-ын гишүүн Т.Доржханд нь уг салбарт ашиг сонирхлын зөрчилтэй тул уг асуудлыг хэлэлцэх хуралдааны санал хураалтад оролцохоос татгалзаж, хуралдаан даргалагчид мэдэгдэх үүрэгтэй. Уг дэгийг зөрчиж, санал хураалтад оролцож байсан. Т.Доржхандыг ашиг сонирхлын зөрчилтэй гэж үзэж болох хэд хэдэн компани бүртгэлтэй байна.

Тухайлбал:

• "Зээл Эм Эн" платформ ББСБ ХХК (624711) 60%, Монрефайнаншиал ХХК-ийг 100% эзэмшдэг
• "Айтүүлс" ХК (5468361) 469156ш хувьцаа 0.01% эзэмшдэг .
• "Монре-Импекс" ХХК (2041189) 30% эзэмшдэг гэж мэдүүлсэн.  Энэ мэт зургаан компаниар ашиг сонирхлын зөрчилтэй ч ХҮН намаас төр төлөөлж буй ганц гишүүн Т.Доржханд юм .

-Т.Доржханд эхнэрийнхээ компанийг нууцхан рекламдав-

ХҮН намын дарга Т.Доржханд нь 2020 онд гишүүн болсныхоо дараахан өгсөн ярилцлагадаа “Би Америкт “Range Rover” авч унаж байлаа. Одоо бол “Nissan Leaf” гэдэг цахилгаан машинтай” гэж ярьсан байдаг. Тэгвэл Т.Доржхандын энэхүү “Nissan Leaf” нь хувийн бизнесийнх нь реклам байж таарав.

Тодруулбал, “Nissan Leaf” гэх цахилгаан автомашиныг Т.Доржхандын эхнэр У.Сийлэнгийн эзэмшдэг “Авто хаб” ХХК оруулж ирдэг. Мөн түүний эхнэр Уламбаярын Сийлэнгийн талаарх мэдээллийг нэхэн судлахад  АНУ-ын Вашингтон хотын “1150 Spring Hill Rd, McLean, VA 22102” хаягт байрлалтай хауст Т.Доржханд, У.Сийлэн, Л.Сонор нар амьдардаг байсан гэх бүртгэл тус улсын хаягийн мэдээллийн санд бүртгэлтэй байдаг.

Тухайн үед Т.Доржхандын төрсөн ах Т.Лувсандоржийн хүү Л.Сонор хамт амьдардаг байсан бөгөөд Т.Доржхандтай хамт Олон улсын валютын санд дадлагажигчаар ажилладаг байжээ. Одоо Л.Сонор нь Сангийн яамны Санхүүгийн зах зээл, даатгалын хэлтсийн дарга, Төрийн банкны ТУЗ-ийн гишүүнээр ажиллаж байна.

-Т.Доржханд Сү.Батболдын фракцад ахаараа дамжин нэр холбогдов-

Өнгөрсөн сарын сүүлээр Ерөнхий сайд асан Сү.Батболд, Нажиб Разак нарын уул уурхайн "Гобикоул Энд энержи" ХХК-ий хэрэг дэгдсэн. Үүнд Т.Доржхандын төрсөн ах Т.Лувсандорж нэр холбогдов. Тодруулбал, Нажиб Разак Монголд уул уурхай эрхлэхээр "Гобикоул энд Энержи" компанид оруулсан 30 тэрбумын хөрөнгө оруулалтыг Сү.Батболд зургаан өөр дансаар татан авсан нь ил болсон.

Өөрөөр хэлбэл, 2003 оноос эхлэн "Бату Майнинг" гэх компаниар их хэмжээний мөнгө угааж ирсэн Сү.Батболдын фракц, Малайзын ерөнхий сайд Нажиб Разакаас 30 тэрбумын хөрөнгө оруулалт татсанаар "Гобикоул Энд Энержи" ХХК Монголд уул уурхайн чиглэлээр үйл ажиллагаа явуулж эхэлсэн байдаг. Тэгвэл тус компанийн бизнес, хөгжил хариуцсан дэд захирлаар Т.Доржхандын төрсөн ах Т.Лувсандорж ажиллаж байжээ.

Т.Лувсандорж нь Монголын томоохон улс төрчид, бизнесмэнүүдийн итгэлт нөхөр бөгөөд Сү.Батболд, Т.Бадамжунай нартай ойр нөхөрлөж ирсэн “Моннис интернэшнл” ХХК-ийн Ерөнхий захирал Б.Чулуунбаатарын ах Б.Жаргалсайханы эзэмшдэг “Пегасус пауэр корпорейшн” ХХК-ийн гүйцэтгэх захирлаар 2015 оноос хойш ажиллаж буй.

Дуулиан, будлиан тасардаггүй Моннистой ойр нөхөрлөж ирсэн Т.Доржхандын төрсөн ах Т.Лувсандоржийн "Гобикоул энд Энержи" ХХК "Сэкер ресорсус Монголиа" ХХК болж нэрээ өөрчлөн 12 тусгай зөвшөөрөл эзэмшиж байна.

-Т.Доржханд түүний төрсөн ах Т.Лувсандорж нар "Сэкер ресорсус монголиа" компанийн бизнесийн схем ингэж үргэлжилдэг-

"Сэкер ресорсус монголиа" компанийн удирдлагаар Мархаажийн Чойдорж ажилладаг. Хувь эзэмшигчээр Сингапурын хөрөнгө биржид бүртэлтэй  "Сэкер ресорсус" компани бүртгэлтэй байдаг. 

Түүнчлэн  "Сэкер ресурс" компани нууц эзний цэргүүд болох Т.Доржханд, түүний төрсөн ах Т.Лувсандорж нарын арми үүгээр зогссонгүй. Тодруулбал 2018 оны тавдугаар сард “Эрдэнэс Силвер Ресурс” ХХК-ийг байгуулж, Салхитын мөнгөний ордод хайгуул хийх эрх, ашиглах тусгай зөвшөөрлийг  авч захирлаар нь томилогдсон хөдөлмөрийн баатар Т.Мөнхбаяр уг компанитай нэр холбогддог.

Тодруулбал, Салхитын мөнгөний орд ихээхэн ашиг олж, Ерөнхийлөгч асан Х.Баттулга, УИХ-ын дарга Г.Занданшатар нар тэтгэврийн зээлийг тэглэж байсан цаг саяхан. Тэгвэл Т.Мөнхбаяр  “Империалкастел” ХХК-аар нэр холбогдож байна. Тодруулбал "Сэкер ресурс" компанийн хувьцаа эзэмшигч УАН партнерс компанийн захирал О.Соронзонболдын "Империалкастел" компанийн нэгэн томоохон хувь эзэмшигч нь Х.Баттулга, Г.Занданшатар нарын ойрын хүн болох Т.Мөнхбаяр байж таарав. Хамгийн ноцтой нь Т.Мөнхбаярын "Зараяахолдингс" компанийн хувь эзэмшигчээр "Сэкер ресурс" бүртгэлтэй байна.

Өөрөөр хэлбэл  Баянхонгор, Говь-Алтай аймгийн сумдыг эрхшээж байгаа "Сэкер ресурс" компаниар Ерөнхийлөгч асан Х.Баттулга, УИХ-ын дарга Г.Занданшатар, ХҮН намын дарга, УИХ-ын гишүүн Т.Доржханд нар халаасаа нэгтгэсэн байж болзошгүй зураглал хөврөн гарч ирлээ.

Тэгвэл  эдгээр улс төрийн нөлөө бүхий эрхмүүдээр хамгаалалтаа хийж, Баянхонгор, Говь-Алтай аймгийн нутгийн өмнөд хэсгийг эзэгнэж буй "Сэкер ресурс Монголиа" эцсийн өмчлөгч нь "Сэкер ресурс" компаний үүсгэн байгуулагч Жозеф Борковский юм. Энэ хүнтэй хамтран тодрон томорч, нөлөөгөө зузаатгасан хүн бол УИХ-ын 2020 оны сонгуульд Сүхбаатар дүүрэгт бие даан нэр дэвшсэн Мархаажийн Чойдорж.

Тэрбээр Дорнод аймгийн Баян-Уул сумын уугуул, БНХАУ-д дунд сургуулиа дүүргэсэн, Москвад хуульч мэргэжлээр боловсрол эзэмшиж, Ерөнхийлөгч асан Н.Багабандийн Орос-Англи хэлний орчуулагчаар төдийгүй үе үеийн УИХ-ын дарга нартай ойрхон нөхөрлөж ирсэн нэгэн.

Яагаад Ерөнхийлөгч асан Н.Багабандийн охин MCS-ийн Ж.Оджаргалтай хамтран Баянхонгор аймгийн Шинэжинст суманд цианит натриар алт олборлохоор дэгдэж явсан зэрэг асуулт урган гарч ирж байна. Энэ удаад бид Т.Доржханд, түүний төрсөн ах Т.Лувсандорж нар "Гобикоул энд Энержи" ХХК-иар асар том уул уурхайн фракц босгон үйл ажиллагаа эрхэлж байсан болзошгүй схемийг танилцуулаа. 

Энэ мэдээнд өгөх таны үнэлгээ

Хуваалцаарай Жиргээрэй