"Хөгжлийн бэрхшээлтэй иргэнд зориулсан зогсоолыг ашиглавал төлбөрөө 25 дахин нэмж төлнө"

Хүн амаасаа давсан машинтай манай улсын хувьд авто зогсоолын асуудал хамгийн тулгамдаж буй асуудлуудын нэг юм. Энэ ч утгаараа хүмүүс зогсоолын асуудлаас болж хоорондоо маргалдах, ажлаа алдах зэрэг тохиолдол энгийн л нэг үзэгдэл болоод буй.

Дээрх жишгээр хоёр хоногийн өмнө олон нийтийн сүлжээнд хөгжлийн бэрхшээлтэй иргэнтэй орон сууцны хотхон дотор авто зогсоол булаацалдаж байгаа бичлэг нийтэд түгсэн. Тэгвэл энэ тохиолдолд нийслэлд амьдарч буй иргэдэд хотын стандартыг хэрхэн хуульчилсан байдаг талаар мэдээллийг хүргэж байна.

Авто замын тухай хуулийн 4 дүгээр зүйлийн 4.1.11-д ““Замын байгууламж” гэж бүх төрлийн гүүр, тавилан, гүүрэн гарц, унадаг дугуй болон явган зорчигч, хөгжлийн бэрхшээлтэй хүн зорчиход зориулсан зам, ус зайлуулах хоолой, шуудуу, хонгил, замын хөдөлгөөнийг зохицуулах болон хөдөлгөөний аюулгүй байдлыг хангах зориулалттай төхөөрөмж, авто замын зурвас газарт байгаа төлбөр авах цэг, авто зогсоол болон бусад байгууламжийг” гэж зааснаар авто зогсоол нь замын байгууламжид ордог байна.

Хэрвээ та хөгжлийн бэрхшээлтэй иргэний тэмдэглэгээтэй авто зогсоолд машинаа тавьдаг бол сайн анхаарна уу. Тухайлбал 1 цагийн 2000 төгрөгийн төлбөртэй зогсоол байна гэж бодъё. Та 4 цагийн хугацаанд машинаа байрлуулахад 8000 төгрөг болно.

Хэрвээ таны зогссон зогсоол хөгжлийн бэрхшээлтэй иргэний тэмдэглэгээтэй байсан бол та 25 дахин нэмж төлөх буюу 200,000 төгрөг төлдөг аж.

М.АГАР

Энэ мэдээнд өгөх таны үнэлгээ

Хуваалцаарай Жиргээрэй