Манай улс газрын тосны салбарт импорт нь экспортоо давсан хэвээр байна

Өнгөрсөн онд газрын тосны зах зээл дээр брент төрлийн газрын тосны үнэ 86.64 ам.долларын ханштай байсан бол энэ онд газрын тосны үнэ баррель нь 69 ам.доллар байна.

Монголд газрын тосны хэрэглээ жилдээ хэрэглээнээс шалтгаалан 2 сая тонн орчим бөгөөд 100 хувь импортоор хэрэгцээгээ хангаж байна. Эрдэс бүтээгдэхүүний импортын үнийн дүнгийн 89.2 хувийг газрын тосны бүтээгдэхүүн эзэлдэг билээ. 

2024 оны эхний 3 сарын байдлаар 557.1 сая ам.долларын 668.4 мянган тонн газрын тосны бүтээгдэхүүн импортолсон нь өнгөрсөн оны мөн үеэс биет хэмжээгээр 178.1 мян.тн буюу 36.3 хувиар, үнийн дүнгээр 133.9 сая ам.доллар буюу 31.6 хувиар тус тус өссөн байна.

Газрын тосны бүтээгдэхүүний импортын нийт үнийн дүнгийн 90.5 хувийг автобензин, дизель түлшний импорт, үүний 30.0 хувийг автобензин, 60.5 хувийг дизель түлшний импорт тус тус эзэлж буй.

Газрын тос импортлогч компаниуд 2015-2021 оны хооронд ойролцоогоор 846 мянган тонн үйлдвэрийн зориулалттай газрын тосны бүтээгдэхүүн худалдан авч байжээ. Харин экспортын хувьд энэ онд 4.850 мянган баррель буюу 661 мянган тонн газрын тос борлуулна гэж тооцсон ч 82.6 сая ам.долларын 1,051.4 мянган баррель газрын тосыг Хятад руу экспортолсон байна. Өнгөрсөн оны мөн үеэс биет хэмжээгээр 108.3 мянган баррель буюу 9.3хувиар, үнийн дүнгээр 5.9 сая ам.доллар буюу 6.7 хувиар тус тус буурсан дүнтэй гарав. Өнгөрсөн оны мөн үетэй харьцуулахад 118.5 (9.8%) мянган барреллаар буурчээ.

Үүнээс харвал Монгол Улс газрын тосны салбарт дотоодын хэрэгцээгээ зуун хувь гаднаас импортоор хангаж, экспортоор худалдаж байгаа хэмжээ нь үүнээс бага байгаа нь цаашид олон улсын зах зээл дээр нэмэгдэж буй газрын тосны үнийг даган, гадагшаа чиглэсэн валютийн урсгал нэмэгдсээр байх дүр зурагтай байна.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй