Гуравдагч хөрш: Эрчим хүчний хараат байдлаас гарч, сэргээгдэх эрчим хүчээ хөгжүүлэхэд АНУ хамтаръя

Энэ оны наймдугаар сард АНУ-ын Төрийн нарийн бичгийн дарга Энтони Блинкен Монгол Улсын гадаад хэргийг сайдыг хүлээн авч уулзах үеэрээ хоёр орны стратегийг түншлэлийн харилцааг шат ахиулъя, ингэхдээ Монгол Улсын өмнө сорилт болоод буй эрчим хүчний салбарт, ялангуяа сэргээгдэх эрчим хүчний сул орон зайд хамтарч, төсөл хөтөлбөр хэрэгжүүлье гэдгээ шуудхан илэрхийлсэн юм. Уг уулзалтыг ажил болгож шууд яриа хэлэлцээ рүү оръё гэсэн билээ.

Хэдхэн хоногийн өмнө дээрх яриаг ажил болгож “Монгол Улсын эрчим хүчний шилжилтийг хурдасгах нь” сэдэвт хэлэлцүүлгийг Монгол дахь Америкийн худалдааны танхимаас зохион байгуулсан бөгөөд энэ үеэр АНУ-аас Монгол Улсад суугаа Элчин сайд Ричард Л.Буанган манай улсад сэргээгдэх эрчим хүчний салбарт ямар боломж байгаа талаар илтгэл танилцуулсан байна. Уг илтгэлдээ “Монгол улс сэргээгдэх эрчим хүчийг нэвтрүүлэх тал дээр анхаарал тавьж, өндөр өртөгтэй нүүрсний цахилгаан станцуудаас татгалзаж, цаашид эрчим хүчний тогтвортой ирээдүйн төлөө зорих нь зүйтэй билээ. Монгол бол нар, салхи, усны нөөцөөр баялаг орон учраас энэ боломждоо түшиглэсэн сэргээгдэх эрчим хүчний эх үүсвэрүүдийг ашиглах. Эрчим хүчний хараат байдлаас гарч, эрчим хүч экспортлогч орон болох боломж байна. АНУ-ын хөрөнгө оруулагч бизнесийнхэн, Монголын Засгийн газрын зүгээс энэ талбарт хамтран ажиллахаар хэлэлцээг эхлүүлээд байна” хэмээн онцгойлон танилцуужээ.

Өмнөхөн нь Гадаад харилцааны яаманд Монгол, АНУ-ын эрчим хүчний яриа хэлэлцээ болсон бөгөөд манай талаас салбарын удирдах албан тушаалтнууд болон АНУ-ын талаас Эрчим хүчний нөөцийн газрын Эрчим хүчний дипломат ажиллагааны орлогч Кимберли Харрингтон, Монгол Улсад суугаа АНУ-ын Элчин сайд Ричард Буанган болон бусад албан тушаалтнууд оролцсон байна.

Энэ үеэр Монгол Улсад цэвэр болон сэргээгдэх эрчим хүчний салбарт нэмэлт хөрөнгө оруулалтыг татах, мөн Монголын стратегийн чухал ашигт малтмалын салбарт тулгамдаж буй зарим асуудлуудыг шийдвэрлэх талаар ярилцжээ.

АНУ-ын Төрийн департаментийн Эрчим хүчний дипломат ажиллагааны орлогч Кимберли Харрингтон хэлэхдээ “Миний энэ удаагийн айлчлал нь сүүлийн нэг жилийн хугацаанд Монгол Улсад хийсэн АНУ-ын засгийн газрын өндөр түвшний албан тушаалтнуудын айлчлалуудын үргэлжлэл болж байна. Тухайлбал, орлогч сайд Хосе В.Фернандес нэг жилийн өмнө Монголд айлчилж, стратегийн чухал ашигт малтмалын салбарын хамтын ажиллагааны Харилцан ойлголцлын санамж бичигт гарын үсэг зурсан. Би мөн хэдэн сарын өмнө Вашингтон хотод болсон Монголын Гадаад харилцааны сайдтай хийсэн уулзалтад оролцсон. Энэ бол өндөр түвшний яриа хэлэлцээ байсан бөгөөд энэхүү хэлэлцүүлгээр бид хоёр улсын засгийн газрын хооронд дахин хэлэлцээ хийх болно. Бид дэлхийн 20 гаруй улсад эрчим хүчний түншлэлийг бий болгоход чиглэсэн яриа хэлэлцээ хийж байсан туршлагатай бөгөөд Монгол Улс нэг нь болж байна. Эдгээр яриа хэлэлцээнд бид хувийн хэвшлийг оролцуулж, эрчим хүчний реформ, дэлхийн хэмжээний чанартай хөрөнгө оруулалтыг хэрхэн татах, хадгалах талаар засгийн газар, хувийн хэвшлийн хоорондын яриа хэлэлцээг урагшлуулахад туслах болно” гэжээ.

Монгол Улс эрчим хүчний үнийг нэмэх асуудлаа дуншуулж байх энэ цаг үед АНУ-ын зүгээс сэргээгдэх эрчим хүчний салбарт орж ирье гэдгээ ил шулуун хэлсэн нь нэг талдаа ОХУ, болон БНХАУ-ын зүгээс манай стратегийн ач холбогдол бүхий салбарт хамтын оролцоо нь хүрээгээ тэлж буйтай ч холбоотой байж болно.

Бидний хөлөө олж чадахгүй байгаа талбарт шан татаж өгье гэсэн гуравдагч хөршийн саналд Засгийн газар ямар байр сууриас хандах нь сонирхолтой. 14 мега төсөлтэй эн зэрэгцүүлж сэргээгдэх эрчим хүчний салбараа өөд нь татаад авах шинэ амбиц ч эндээс гарч магадгүй юм.

Ц.ТАМИР

Энэ мэдээнд өгөх таны үнэлгээ

Хуваалцаарай Жиргээрэй