Даатгалын компанийн захирлыг хөнөөсөн Луижи Манжонегийн хэрэг өөрөөр эргэж эхлэв

АНУ-ын томоохон даатгалын компани болох UnitedHealthCare-ийн Гүйцэтгэх захирал Брайн Томпсоныг Нью-Йорк хотноо хуралд оролцохоор явж байхад нь Манхэттэн зочид буудлын ойролцоо түүнийг үл таних этгээд буудаж, газар дээр нь хөнөөсөн хэрэг гарсан билээ. Нью-Йорк мужийн цагдаагийн газар болон холбогдох албаныхан гэмт хэрэгтнийг камерын бичлэгүүдээр мөшгиж, эрэн сурвалжилж эхэлсэн. Ингээд түүнийг таван өдрийн дараа олж баривчилсан юм.

Гэмт хэрэг үйлдсэн Луижи Манжионе нь сэхээтэн гэр бүлээс гаралтай, чинээлэг амьдралтай, Балтиморын нэр хүндтэй сургуулийг Компьютерийн шинжлэх ухааны чиглэлээр мастер хамгаалсан нэгэн байсан юм. Боловсролтой, нийгмийн гарал үүсэл сайтай түүнийг яагаад ийм онц хэрцгий гэмт хэрэг үйлдсэн болох талаар олон нийт даяараа янз бүрийн таамаглал гаргаж эхэлсэн юм. Тэрбээр, өөрийг нь баривчилсан асуудлаар ямар нэг байр суурь илэрхийлээгүй бөгөөд түүнийг шүүх процесс удна хэмээн хуульчид тайлбарлаж байлаа.

Гэвч хэргийн талаарх мэдээллүүд олон нийтэд хүрч эхэлсний дараа олон нийт нөхцөл байдлыг өөрөөр харж эхлэв. Учир нь Луижи Манжионе даатгалын компани иргэдэд хүрч үйлчилж чаддаггүй, зорилтод бүлгүүд даатгалын компанийн хүнд суртал, хангалтгүй шийдвэрүүдээс болж эрүүл мэнд, амь насаараа хохирсон өчнөөн мянган тохиолдол байдаг учраас энэ бүхнийг эсэргүүцэж даатгалын компанийн захиралын амийг хөнөөсөн хэмээн олон нийт үзэн, тэрбээр сошиал орчинд бараг л ардын баатар болоод байна. Түүний үйлдсэн хэрэгтэй холбоотойгоор олон нийтийн дунд гараад байгаа нийгмийн хэлэлцүүлгүүд дунд даатгалын компаниудад сэрэмжлүүлэг өгч байна гэх утга санаа цухалзах болжээ. Харин нөгөө талд зарим нь түүний үзэл санаа ямар ч байлаа хэн нэгний амийг хөнөөх замаар шударга ёс тогтохгүй, тиймээс хууль түүнд тэгш үйлчлэх ёстой гэж байв.

Луижи Манжионе пүрэв гарагт хоёр мужийн шүүх танхим руу нисдэг тэргээр тээвэрлүүлэн оролцсон байна. Түүний үйлдсэн хэрэг нь даатгалын компанийн захиралыг илчлэх үйл явц болж хувирч байна хэмээн сошиал орчинд яригдах болсон ч түүнийг терроризмын хэрэгт буруутгасан бөгөөд Манжионегийн зүгээс уг ялыг хүлээн зөвшөөрөөгүй юм. Харин Пеннсилваньд түүнийг галт зэвсэг хэрэглэсэн, хуурамч үнэмлэх ашигласан ял тулгасан бөгөөд дөрвөн шинэ ял тулгаж буй.

Шүүх хурал дээр ихэвчлэн дуугүй, толгойгоо гудайлгасан байдалтай, цагдаагийн шериффийн туслахуудтай ярилцаж, хааяа үл ялиг инээмсэглэж байсан нь түүнийг баривчлах үед хэвлэлийнхэн рүү орилж байсан үеэс эрс тэс ялгаатай байлаа хэмээн CNN-ийн Данни Фрийман хэлжээ. Түүнийг шүүх хурал хооронд тээвэрлэн авч явахад олон нийт зургийг нь дарж, түүн рүү хэн нэгэн халдана гэсэн аюул түгшүүр олон нийтээс мэдрэгдэхгүй байгаа талаар CNN-ий шинжээч Жон Миллер хэлсэн юм.

Түүний шүүх хурал цаашид ч олны анхаарлын төвд байхаар байна.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй