Энэ сард УИХ-ын хаврын ээлжит чуулган нээлтээ хийнэ. Чуулганаар хэлэлцэгдэх хэд хэдэн чухал хуулийн төслийн нэг нь Татварын багц хуулийн төслийг өргөн барьж хэлэлцэх бөгөөд уг хуулийн гол өөрчлөлт нь НӨАТ-ын хуулийг өөрчилнө гэгдэж буй.
Сангийн яамны зүгээс НӨАТ-ын тухай хуульд шинэчлэлт хийхдээ хавтгайруулж хөнгөлөлт үзүүлдэг биш аль болох бага орлоготой хэсэг рүү буцаан олголт, хөнгөлөлтийг чиглүүлнэ гэх тайлбар хэлсэн. Ингэхдээ 1 дүгээр сараас 3 дугаар сар хүртэл Татварын багц хуультай холбоотойгоор хэлэлцүүлэг явуулж, Сангийн яам цахим хэлбэрээр олон нийтээс санал авна гэсэн юм.
Мөн энэ удаад Татварын багц өөрлөлтийг хэлэлцэхдээ хувь хэмжээг нэмэгдүүлэхгүй гэдгээ илэрхийлсэн.
Харин аж ахуй нэгжүүдийн хувьд Татварын багц хуулийг сууриар нь нухацтай авч хэлэлцэх ёстой гэдэг байр суурийг илэрхийлээд байгаа. Түүнчлэн одоогоор яригдаж буй татвар суутган төлөгч нь 50 сая төгрөгөөс дээш орлоготой аж ахуй нэгжүүдээс НӨАТ суутгадаг байсныг 400 сая болгох асуудал яригдаж буй.
Өнөөдрийн хэрэгжиж буй татварын хувь хэмжээг бууруулах, тухайлбал НӨАТ-ын хувь хэмжээ 10 хувь байгааг ихдээ 5 хувь болгохгүй бол худалдаа үйлчилгээ эрхэлж, иргэдээс НӨАТ цуглуулж төрийн санд төвлөрүүлдэг аж ахуй нэгжүүдээс бараа, үйлчилгээ авах нь эрс багасч байна гэх шүүмжлэлийг хэлэх болсон юм. Татварын багц хуулийг хэлэлцэхдээ төлбөр, хураамж, шимтгэлийн асуудлыг ч шийдвэрлэж ялгаа заагийг нь гаргах ёстой гэдэг байр суурийг илэрхийлжээ.
Аж ахуй нэгжүүдийн төлөөлөл Татварын багц хуулийн өөрчлөлтөд дараах саналуудыг өгсөн байна.
- НӨАТ-ын дарамтыг бууруулж 10 хувь байгааг 5 хувь болгох,
- Татварын ногдол орлогын суурийг мөнгөн суурьт шилжүүлэх,
- Аж ахуйн нэгжийн орлогын албан татварын шаталсан хувь хэмжээг байхгүй болгох эсвэл босгыг өндөрсгөх,
- Үндсэн хөрөнгийн худалдан авалтад төлсөн татварыг шууд хасдаг болох,
- Татварын хялбаршуулсан горимд хамрагдах нийт борлуулалтын орлогын босгыг 400 сая болгож нэмэгдүүлэх,
- Олон улсын татвартай холбоотой туршлагыг нэвтрүүлэх,
- Ажил гүйцэтгэх болон хөлсөөр ажиллах гэрээнээс нийгмийн даатгалын шимтгэл суутгахгүй байх
- Татвар өгөх, шимтгэл төлөх хуулийн хугацааг сар бүрийн 5-нд болгох
Т.БАТСҮРЭН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.