Дата: Аав нь 17 лицензээр алт ухдаг ч, охин нь баялаг ашиглагчидтай хэлцэл хийх ажлын хэсгийн гишүүн

-

Аав нь есөн ордод ашигт малтмалын 15 лиценз атгадаг. Охин нь стратегийн орд эзэмшигчид буюу баялаг ашиглагчидтай хэлцэл хийх ажлын хэсгийн гишүүн гэвэл ямар сонсогдож байна.

Стратегийн ач холбогдол бүхий ордод тусгай зөвшөөрөл эзэмшигч, баялаг ашиглагч этгээдтэй хэлэлцээ хийх ажлын хэсгийг 2025.02.18-нд байгуулсан. Эл ажлын хэсэгт Соёл, спорт, аялал жуулчлал, залуучуудын сайд Ч.Номин багтжээ.

• Нэгт, түүний сайдын суудал уул уурхайгаас хол буюу чиг үүргийн бус. Засгийн газрын гишүүн гэдэг давуу эрхээр нь багтаасан байх.
• Хоёрт, аав нь стратегийн биш ч хэд хэдэн суманд лиценз эзэмшиж алт ухаж, баялаг ашиглаж ирсэн нэгэн.

Ажлын хэсэг нь;

• Стратегийн ач холбогдол бүхий ашигт малтмалын ордын тусгай зөвшөөрөл эзэмшигч хуулийн этгээдийн төрийн эзэмшлийн хувь, хэмжээг тогтоох,
• АМНАТ-өөр орлуулах эсэх тухай саналын төсөл боловсруулах,
• Стратегийн ач холбогдол бүхий ашигт малтмалын ордын тусгай зөвшөөрөл эзэмшигч хуулийн этгээдтэй хэлэлцээ хийх үүрэгтэй.

Ашигт малтмалын тухай хуулийн 9.1.5-д энэ хуулийн 5.4, 5.5-д заасан стратегийн ач холбогдол бүхий ашигт малтмалын ордын тусгай зөвшөөрөл эзэмшигч хуулийн этгээдийн төрийн эзэмшлийн хувь, хэмжээг тогтоох, ашигт малтмалын ордын ашигт малтмалын нөөц ашигласны төлбөрөөр орлуулах эсэх тухай саналыг УИХ-д өргөн мэдүүлэх;

• 5.4.Улсын төсвийн хөрөнгөөр хайгуул хийж нөөцийг нь тогтоосон стратегийн ач холбогдол бүхий ашигт малтмалын орд, түүний үүсмэл ордыг хувийн өмчит хуулийн этгээдтэй хамтран ашигласан тохиолдолд тухайн хуулийн этгээдийн хувьцааны 50 хүртэлх хувийг төр үнэ төлбөргүйгээр эзэмших бөгөөд төрөөс оруулсан хөрөнгө оруулалтын хэмжээг харгалзан төрийн эзэмшлийн хувь хэмжээг тогтоож болно. Төрийн эзэмшлийн хувь, хэмжээг стратегийн ач холбогдол бүхий ашигт малтмалын ордын ашигт малтмалын нөөц ашигласны төлбөрөөр орлуулж болно.
• 5.5.Улсын төсвийн оролцоогүйгээр хайгуул хийж нөөцийг нь тогтоосон стратегийн ач холбогдол бүхий ашигт малтмалын орд, түүний үүсмэл ордыг эзэмшигчийн тухайн ордод оруулсан хөрөнгийн 34 хүртэлх хувьтай тэнцэх хувьцааг төр үнэ төлбөргүйгээр эзэмших бөгөөд төрөөс оруулах хөрөнгө оруулалтын хэмжээг харгалзан төрийн эзэмшлийн хувь хэмжээг тогтоож болно. Төрийн эзэмшлийн хувь, хэмжээг стратегийн ач холбогдол бүхий ашигт малтмалын ордын ашигт малтмалын нөөц ашигласны төлбөрөөр орлуулж болно.

-Л.Чинбат ЕСӨН ордод 17 лиценз эзэмшдэг-

Ч.Номин сайдын аав Л.Чинбат нь өнөөдрийн байдлаар зөвхөн "Гацуурт" ХХК-иараа уул уурхайн ашиглалтын 17 лиценз эзэмшиж байна. Үүний 15 нь алтных, 2 нь шохойн чулууных бөгөөд нийт 9,339 га ашиглалтын талбай түүний мэдэлд байна. Энэ нь Говьсүмбэр, Дархан-Уул, Орхон зэрэг аймгуудын газар нутгаас ч том.

Уул уурхайн лицензүүдийн хоёрынх нь хугацаа энэ онд дуусаж байгаа. Бусад нь хүчин төгөлдөр байна.

Нэгбүрчлэн задалж харъя.

Мөн лиценз эзэмшлийн мэдээлэл харагдахгүй, тодорхой бус ч дараах газруудад алтны хайгуул, олборлолт, нөхөн сэргээлт хийжээ.

• Баянхонгор аймгийн Бөмбөгөр сумын нутаг Байдрагийн гол,
• Дархан-Уул аймгийн Хонгор сум Хүйтний гол,
• Сэлэнгэ аймгийн Ерөө сумын Ялбаг
• Сэлэнгэ аймгийн Мандал сумын Гацуурт, Нарст
• Өвөрхангай аймгийн Бат-Өлзий сумын Бургастай, Зүүн сөдөт, Шийрт, Шавар, Баруун нүүр
• Дархан уул аймгийн Шарын гол сумын Хүйтний ам зэрэгт алтны шороон ордын хайгуул, олборлолт нөхөн сэргээлт хийжээ.
• Төв аймгийн Заамар суманд шороон ордын нарийвчилсан хайгуул хийсэн.

Дээрх оруудын хэдэд нь улсын төсвөөр хайгуул хийсэн нь ч тодорхой мэдээлэл алга.

-Стратегид бүртгэгдээгүй 39 ордын нэгт нь хоёр лицензтэй-

Стратегид бүртгэлгүй гацсан 39 ордын нэгт нь бусадтай хамтран ХОЁР лиценз эзэмшиж байна.

Тодруулбал, Дундговь аймгийн Сайнцагаан сумын нутагт оршдог Тэвшийн говийн хүрэн нүүрсний ордод "Тэвшийн нүүрс" ХХК-иар дамжуулан 2005 онд MV-010874, 2015 онд МV-018499 гэсэн хоёр лицензийг 30 жилийн хугацаатайгаар эзэмшжээ.

Эл орд нь 923,2 сая.тн нөөцтэй. Тэрбум гаруй тонн хүрэн нүүрсний нөөцтэйгөөрөө Тавантолгойн ордын дараа орох ч, чанараас шалтгаалан эргэлтэд орж чадаагүй. Орос, Монголын геологичид тогтоосон буюу улсын төсвийн хөрөнгөөр хайгуул хийсэн гэсэн үг.

"Тэвшийн нүүрс" ХХК-ийг тэрбээр Жүгдэрноровын Баярхүүгийн хамт эзэмшиж байгаа тухай дата мэдээлэл байна.

Тэгэхээр өөрийнх нь аав монголын хаа сайгүй алт хайж, ухаж, лиценз эзэмшиж, баялаг ашиглаж байхад охин нь бусад хувийн хэвшилтэй хэлэлцээ хийнэ гэдэг юу л бол. Агуулгын хувьд ямар ч авцалдаагүй зүйл. Стратегийн орд гэдэг үгээр халхавчилж болох л юм. Гэхдээ ёс зүйн хувьд хэр вэ.

Энэ мэдээнд өгөх таны үнэлгээ

Хуваалцаарай Жиргээрэй