АНУ-ын Ерөнхий прокурор Памела Бонди өнгөрсөн жил Нью-Йорк хотноо “UnitedHealth Group”-ийн гүйцэтгэх захирал Брайан Томпсоныг буудаж хөнөөсөн хэрэгт буруутгагдаж буй Луижи Манжионд цаазаар авах ял оноохоор ажиллахыг холбооны прокуроруудад даалгажээ. “UnitedHealth Group” нь АНУ-ын хамгийн том хувийн эрүүл мэндийн даатгалын компани юм.
Манжионы өмгөөлөгч Карен Фридман Агнифило мэдэгдэл хийхдээ цаазаар авах ял оноохоор ажиллах тушаалыг зэрлэг хэмээн шүүмжилсэн байна. 26 настай Манжион хүн амины хэрэг, терроризм, зэвсгээр гэмт хэрэг үйлдсэн гэх зүйл ангиудад өөрийгөө буруугүй гэх байр суурийг илэрхийлсэн. Хэрвээ тэр гэм буруутай нь тогтоогдвол суллагдах боломжгүйгээр бүр насаараа хорих ял сонсох магадлалтай. Шүүх хурал явагдах Нью-Йорк мужид цаазын ял байдаггүй.
Харин Манжион Томпсоныг хөнөөсөн хэргээр Манхэттаны холбооны шүүхээр мөн орно. Ерөнхий прокурор Бондигийн хэлснээр прокурорууд тэр шүүхийн өмнө цаазаар авах ял оногдуулахаар ажиллана гэсэн байна. Хэрвээ Манжион холбооны шүүхийн өмнө гэм буруутай нь тогтоогдвол шүүгчдийн бүрэлдэхүүн хурлын өөр үе шатанд цаазын ял оноох эсэхийг шийдэх юм. Шүүгчдийн бүрэлдэхүүн бүгд ижил шийдвэр гаргасан тохиолдолд л цаазын ял оноох боломжтой.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.