МАН ард түмнийг НӨАТ-ын буцаалтаар өгөөшилж, татварын дарамтыг бууруулахгүй нь...

Сангийн яам, Засгийн газар, УИХ хамтран Татварын багц хуулийг шинэчлэх ажлын хэсэг байгуулж, ахлагчаар нь УИХ-ын гишүүн Х.Ганхуяг ажиллаж буй.

Лхагва гарагт ажлын хэсгийн ахлагч Х.Ганхуяг хэвлэлийн хурал зарлаж, хурлаар НӨАТ-ын хуулийг хөндөж, хэд хэдэн өөрчлөлт оруулах гэж байгааг танилцуулав. Хэдийгээр эцэслэгдээгүй, хэлэлцэгдээд явж байгаа хэдий ч иргэд рүү чиглэсэн татварын хөнгөлөлт, бууруулалт байхгүй гэдгийг хэлсэн юм.

Уг хуулийн өөрчлөлт анхнаасаа буруу буюу Татварын ерөнхий хуулиа оруулж ирэхгүйгээр өөрчлөлт оруулж буй асуудал нь хуулийн тогтолцоогоо сууриар нь өөрчлөх зорилгогүйг харуулж буй.

Ажлын хэсгийн зүгээс иргэдээс татварын хуультай холбоотой санал асуулга явуулахад 56 хувь нь татварын хувь хэмжээг бууруулахаар санал өгсөн байхад татварын хувь хэмжээг бууруулах гэхээсээ өрхийн орлого руу чиглэсэн НӨАТ-ын хөнгөлөлтийн асуудлыг тусгаж байгаагаа ярив. Өөрөөр хэлбэл иргэдийг НӨАТ-ын буцаалтаар аргалж, татварын дарамтыг бууруулах чиглэлд ямар ч бодлогын өөрчлөлт хийгээгүй нь харагдлаа.

Хуультай холбогдоогүй ч иргэдийн зүгээс Хувь хүний орлогын албан татварын 10 хувийг 1 хувь болгох бүх нийтийн өргөдөлд хэдийнэ 100 мянган давсан иргэн гарын үсэг цуглуулж УИХ-ын чуулганаар хэлэлцэхээр болсон ч Сангийн сайд Б.Жавхлан уг асуудалд “бодлогын хувьд ийм шийдвэр гаргах боломжгүй. Улсын төсөвт ийм боломж байхгүй” гэх хариултыг өгч иргэдийн гаргасан санал, шийдлийг үнэгүйдүүлэв.

Мөн УИХ-ын гишүүн Ч.Лодойсамбуу нарын гишүүдийн Нийгмийн даатгалын ерөнхий хуульд өөрчлөлт оруулах, ингэхдээ ажил олгогчийн төлж буй нийгмийн даатгалын шимтгэлийг болиулах агуулга бүхий хуулийн төслийг ч Сангийн сайд болон УИХ-ын гишүүн, Татварын багц хуулийг шинэчлэх ажлын хэсгийн ахлагч Ч.Ганхуяг нар боломжгүй хэмээн няцаасан юм.

МАН-ын мөрийн хөтөлбөрийн 4-рт заасан “Нийтийн сайн сайхныг цаг ямагт эрхэмлэн, тэгш бус байдлыг бууруулах нийгэм-эдийн засгийн бодлогоор чинээлэг дундаж давхаргыг тэлнэ” гэдэг заалт өнөөдөр эсрэгээрээ хэрэгжиж буй.

Иргэд цалингийнхаа 30 хувийг татварт суутгуулж, аж ахуй нэгжүүд дансаа хаалгуулж, татварын өр цугларсаар байхад МАН өнөөдөр иргэдийн нуруун дээр бодитоор ирж буй энэ дарамтуудыг бууруулъя гэхийн оронд аж ахуй нэгжийн дансанд орж ирсэн орлогоос 15-20 хувийг нь татварын өр рүү нь татдаг болгоно, иргэд 500 мянга хүртэлх худалдан авалтынхаа НӨАТ-ын буцаалтыг 100 хувь авна гэх мэт татварын хуулиа суурь тогтолцоогоор нь шинэчлэх, өөрчлөх агуулга ярилгүй зөвхөн НӨАТ-ын хуульд өөрчлөлт оруулах байдлаар аргацаахаар болжээ.

Төгрөгийн ханш шал арчиж байгаа энэ үед иргэд, аж ахуй нэгжүүдийн эдийн засгийн чадамж муудсаар байна. Амьдралд ойр, хуулийн шинэчлэл хийх чадамж МАН-д, МАН-ын гишүүн, сайд нарт ер нь байна уу.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй