Өчигдрийн өрнөл: У.Хүрэлсүх хүчийг үзүүлж, Л.Оюун-Эрдэнэ гүрийж, С.Амарсайхан мөрөөдлийнхөө араас гүйв

Өчигдөржин МАН-ынхан өөр хоорондоо бужигнаж, Төрийн гурван өндөрлөгийн өрөө хэсэж гүйцгээгээд, орой нь Бага хурлын товоо /2025.05.21/ тогтов. Үүнээс өмнө Удирдах зөвлөл хуралдана. Өчигдөр өрнөсөн улс төрийн үйл явцуудын мэдээлэл нэлээд зөрүүтэй байсан ч,

• МАН-ын бүлэг болоод төрийн тэргүүний түвшинд хамтарсан Засгийн газартай байх эсэх маргаан,
• Л.Оюун-Эрдэнийн асуудлыг яг хэрхэн шийдэх үү,
• Хэрэвзээ Засгийн газраа огцруулбал хэн Ерөнхий сайд болж болох уу зэрэг агуулгууд хүчтэй яригдсан нь үнэн юм.

Өрнөсөн үйл явцуудыг нэрлэж бичвэл,

У.Хүрэлсүх, Л.Оюун-Эрдэнэ нар уулзалтаараа ЗГ-ын асуудал, Ерөнхийлөгчийн сунгаа ярив уу

Тэдний уулзалт нэлээд удаан үргэлжлэв. Уулзалтын дараа Төрийн тэргүүн ордонд төдийлөн удаагүй. Харин Ерөнхий сайд МАН-ын генсек Я.Содбаатар, хотын дарга Х.Нямбаатар, УИХ-ын дарга Д.Амарбаясгалан нартай уулзсан. Үүнийхээ дараа Д.Амарбаясгалантай хоёулхнаа уулзсан гэгдэж буй.

Ерөнхийлөгч, Ерөнхий сайд хоёрын уулзалтын мэдээллүүд харилцан адилгүй мэдээлэгдсэн ч тэд хамтарсан Засгийн газрын тухай, Л.Оюун-Эрдэнийг огцрох эсэх талаар ярилцсан нь тодорхой байв. Харин яг аль талд байгаа нь мэдэгдэхгүй байсан ч Д.Амарбаясгалан хамтарсан Засгийн газрыг үргэлжлүүлэх санал тавьсан гэх мэдээлэл бий.

Нөгөө талд намрын чуулганаар ард нийтийн санал асуулга гэнэт оруулж ирэх, Үндсэн хууль өөрчлөхгүй гэж байгаад Ерөнхийлөгч дахин дэвшиж мэдэх асуудал дээр тэдний гол маргаан өрнөсөн байх нюанстай. Хамтарсан Засгийн газар үүний эсрэг зогсох гол багана гэж харж болохоор. Ямартай ч хоёр талаасаа уулзалтын мэдээллээ айхтар задалсангүй.

Л.Оюун-Эрдэнэ "Хүүгээсээ болж, Засгийн газрыг огцруулмааргүй байна" гэжээ

Ерөнхий сайд Л.Оюун-Эрдэнийн хувьд хүүгээсээ болж, Засгийн газрыг тэр чигт нь огцруулах хэмжээний асуудал үүсгэмээргүй байна гэсэн байр суурь илэрхийлсэн нь тодорхой болов. Тэгэхээр намынхаа Удирдах зөвлөл, Бага хурлаар хэлэлцэх асуудлыг намын даргын хувьд ямар байдлаар зангидаж оруулах нь анхаарал татах сэдэв боллоо.

МАН-ын бүлгийн гишүүдийн хувьд харилцан адилгүй байр суурьтай байсан. Үүнийгээ ч ил тод илэрхийлсэн. Хамтарсан Засгийн газрын асуудал бүлэг дээр ч мөн хөндөгдөв. Өчигдөр орой Ерөнхий сайд Л.Оюун-Эрдэнэ АН-ын дарга Л.Гантөмөр, ХҮН намын дарга Т.Доржханд нартай уулзахаар товлоод байсан юм.

АТГ дээр өрнөж буй хүүгийнх нь орлогыг нотлох асуудал хэр удах вэ. Энэ хооронд жагсаал хэрхэн өргөжих вэ. Хамтарсан засгийн газрыг нам нь дэмжихгүй бол Л.Оюун-Эрдэнэ огцрох уу зэрэг нөхцөл байдлууд өрнөлөө хүлээж байна.

Н.Учрал чимээгүй болж, С.Амарсайхан ордноор "хурд мэдэн" гүйв

Л.Оюун-Эрдэнийн Засгийн газар огцорлоо гэхэд дараачийн танхимыг хэн удирдах вэ гэх хувилбар нэлээд эртнээс яригдсан.

Баг нь "Дараачийн Ерөнхий сайд манай дарга болно" гэж ил ярьдаг болсоор удсан Н.Учралынхан энэ өдрүүдэд бүгж, чимээгүй байцгаав. Өчигдрийн бүлгийн хуралд Н.Учрал оролцоогүй. Харин Шадар сайд С.Амарсайхан төрийн ордноор "хурд мэдэн" гүйж, медиа дахь ажлаа ч амралтын өдрүүдээс үлэмж идэвхжүүлсэн юм.

Төрийн өндөрлөгүүдийн түвшинд ширээний ард шинэ Ерөнхий сайд хэн байж болох талаар албан ёсоор бол яригдаагүй. Гэхдээ Б.Энхбаяр, Г.Занданшатар, С.Бямбацогт зэргээр нэрлэгдэж буй юу гэвэл тийм. Хэдий янз бүрийн хүмүүс нэрлэгдэж байгаа ч яг өнөөдрийн улс төрийн уур амьсгалаас,

• Төрийн тэргүүн Н.Учралыг Ерөнхий сайдад дэмжих үү.
• С.Амарсайханыг энэ удаа Д.Амарбаясгалан Ерөнхий сайдад дэмжиж, Бага хурлыг хайрцаглаж магадгүй гэх логик тийм ч бодитой буухгүй байгаа.

Бүр шинэ хувилбар нь, Ерөнхий сайдаа ч, намын даргаа ч солих хувилбар

Олон нийтийн төдийлөн тооцоогүй хувилбар бол намын даргаа МАН сольж орхих.

Хэрвээ Засгийн газраа огцруулбал, намын дарга бус хүн танхимаа удирдах нөхцөл байдал үүснэ. Ийм хүчгүй дүр Засгийн газрыг 126 гишүүн бүхий парламенттай зэрэгцүүлж авч явна гэдэг өөрөө тамираа барсан үзэгдэл л болно. Тэгэхээр одоо Л.Оюун-Эрдэнийг хөдөлгөх бол Засгийн газрын тэргүүн, МАН-ын даргын албан тушаалтай нь зэрэг ярих асуудал гол тээг нь болж буй.

МАН Их хурлаараа даргаа өөрчлөх зохицуулалттай. Намын их хурал ирэх аравдугаар сарын эхээр товлогдоод буй. Намын дарга нь сонгуульд ялагдсан, өөрийн хүсэлтээр, их хурлаар олонхоор шийдсэн тохиолдолд огцрох боломжтой. Л.Оюун-Эрдэнэд өөрөө хүсэхгүй л бол одоогоор харахад намын даргаасаа буух үндэслэл үүсэхгүй байх нигууртай.

У.Хүрэлсүх "Ерөнхийлөгчид нэр дэвшихгүй" гэсэн мессежийнхээ дараа зүгээр суухгүй. Тэр эффект үзүүлэх нь тодорхой байв, амралтын өдрөөр ингэж мэдэгдэнэ гэхээр эд нар дотоод түчигнээнээ ер нь л дийлэхээ болиод буйн шинж. Бас ямагт өөрийн талдаа боломж гаргахыг эрмэлзэх аваас Г.Занданшатар, Ж.Энхбаяр, Я.Содбаатар нарын аль нэгийг намаа удирдуулж, Засгийн газрыг тэргүүлж байгаад, төрийн тэргүүний суудалд сойх нэг хувилбар бий. Дараа нь төрийн тэргүүнээс буухдаа намаа эргүүлж авах.

Хэрэлдэх ч тэврэлдэж явдаг нам

Ерөнхийлөгчийн сонгууль дөхчихсөнд л учир байна.

Түүнээс биш МАН бол хэрэлдэх ч тэврэлдэж чаддаг, битүү ягшмал бүтэц. Хэнтий нутгаас гаралтай У.Хүрэлсүх, Л.Оюун-Эрдэнэ нарыг их муудлаа гэж итгэхэд бэрх. Байнга муудалцсан гэж хардагддаг Д.Амарбаясгалан, Л.Оюун-Эрдэнэ нар тулсан мөчид нэгнийхээ эсрэг ажиллана гэдэг ч логикийн хувьд их зүдгүүртэй.

Гол нь Ухаа худгийн олон нийт болоод парламентад үзүүлж буй жин, МАК-ийн хэлцэл хийхээс татгалзсан бичиг, Гаалийн бүтцийг С.Батболдоос салгаж чадахгүй байгаа байдал, ЭТТ дээр Ж.Ганбат тэргүүтэй Хэнтийнхэн үүрлэж, авлига гаарч буй битүү кэйс зэрэг асуудлын эффектэд л тэд муудаад байгаа. Нөгөө талд Д.Амарбаясгаланд "Бор тээг"-ийн нэрмээс тээг болсоор байна.

Л.Оюун-Эрдэнийн гарт буй одоогийн гол хүч нь Ерөнхийлөгчийг дахин нэр дэвшүүлэх эсэх асуудал. Үүн дээр ч гол зангирлууд яваа юу гэвэл тийм. Тэгэхээр энэ удаа Засгийн газар тэсэж үлдэх үү. Үлдэж чадахгүй бол хамтрал салчих нигууртай гэсэн шинэ нөхцөлүүд хүлээгдэж байна.

Энэ мэдээнд өгөх таны үнэлгээ

Хуваалцаарай Жиргээрэй