Монголын гуйлтаар БНСУ ашиглах хугацаа дууссан түргэний тэрэг, Япон зассан галын машинаа хандивлав

Одоог хэр нь хөдөөгийн сумуудад тусгайлсан түргэний машингүй. Эмнэлэг болгонд гуйж, бензин хийгээд явдаг нэг фургон л бий. Мөн тэдгээр сумд галын машины барааг ч хараагүй.

Гэтэл энэ онд л гэхэд галын машингүйн улмаас Төв аймгийн Жаргалант суманд гурван хүүхэд байшинтайгаа шатсан харамсалтай үйл явдал болов. Мөн ОБЕГ-ын гал сөнөөгчдийн хувцас хэрэглэл, тоног төхөөрөмжийн ядмаг байдал анхаарах сэдэв болсон хэвээр байна.

Уг нь алба хаагчдынхаа аюулгүй байдлыг хамгаалж эмнэлэг ч тэр, онцгой байдал ч тэр тоног төхөөрөмжөө сайжруулах хэрэгтэй. Уг асуудал сүүлийн хэдэн жил яригдаж байгаа ч салбаруудад өөрчлөлт орсонгүй.

Тэгвэл энэ жил мөн буурай оронд үзүүлэх тусламжийн хүрээнд БНСУ ашиглалтын хугацаа дууссан түргэний тэргээ Монголд хандивлаж буй, Япон мөн ашигласан галын машин болон түргэний тэргээ засварлаж Монгол Улсад бэлэглэж байгаа талаар тухайлсан улсуудын хэвлэлд мэдээ цацжээ.

Энэ талаар Өмнөд Солонгосын хэвлэлд:

БНСУ-ын Со-гу, Пусан Монгол улсын Хөвсгөл аймагтай түргэн тусламжийн автомашиныг үнэ төлбөргүй хандивлах гэрээ байгуулж, ашиглалтын хугацаа хэтрүүлсэн дүүргийн түргэн тусламжийн автомашиныг Хөвсгөл аймагт бэлэглэлээ гэж тус улсын newsfreezone сайт мэдээлэв.

Хандивын гэрээг энэ сарын 17-ны өдөр хийсэн бөгөөд машин бэлэглэх ёслолд Гон Хан Сү, эрүүл мэндийн төвийн удирдлагууд, Хөвсгөл аймгийн Засаг дарга Л.Төмөрбаатар тэргүүтэй орон нутгийн төлөөлөгчид оролцжээ.

Энэхүү түргэн тусламжийн автомашиныг Хөвсгөл аймгийн иргэдийн хүсэлтийн дагуу хандивласан. Тус машин нь хууль ёсны ашиглалтын хугацаагаа хэтрүүлсэн байгаа бөгөөд эмнэлгийн дэд бүтэц муу, яаралтай тээврийн хэрэгсэл хүрэлцэхгүй байгаа Монгол Улсын яаралтай тусламжийн үйлчилгээг сайжруулахад тус дөхөм болно гэж үзэж байна.

Хариуд нь тус аймагтай эрүүл мэндийн аялал жуулчлалын хамтын ажиллагааны тогтолцоог бий болгох бизнесийн гэрээ байгуулж, гарын үсэг зурлаа гэж мэдээлэв.

Харин японы хэвлэлд:

Изүнокүни хот Монгол Улсын Улаанбаатар хотын Сонгинохайрхан дүүрэгт галын насосны машин, түргэн тусламжийн хоёр автомашин бэлэглэнэ. Найрамдал хотын гэрээ байгуулагдсаны 10 жилийн ойн хүрээнд уг тээврийн хэрэгслүүдийг Монгол Улсад ашиглах зорилгоор зүүн талдаа жолооны хүрдтэй болгож шинэчлэн засварласан байна.

Тус дүүргийнхэн эмнэлгийн яаралтай тусламж үйлчилгээг сайжруулах үүднээс автомашинуудыг шилжүүлэх хүсэлтийг өнгөрсөн жил гаргасан.

Хотын захиргаа ГХЯ-ны “Өвсний үндэс” хүний ​​аюулгүй байдлын буцалтгүй тусламжийг сэргээн засварлах, тээвэрлэх зардалд зориулж ойролцоогоор 8.5 сая иен зарцуулсан бөгөөд эдгээр машинуудыг хандивлахаар шийдсэн байна. Хандивын ёслол энэ сарын 17-нд болсон бөгөөд НИТХ-ын Олон улсын харилцааны зохицуулагч оролцож, “Би маш их баяртай байна. Нутгийн иргэд ч үүнийг тэсэн ядан хүлээж байгаа гэдэгт итгэлтэй байна" хэмээсэн гэж тус улсын yomiuri сайт мэдээлэв.

Ингэж манай улс ашиглалтад дууссан машин авах хүсэлт явуулж авдаг талаар гаднын хэвлэлд мэдээлж байхад, тоног төхөөрөмж, галын машин дутмаг ОБЕГ хурлын заалаа 450 сая, суудлын автомашинууд 9 тэрбумаар авах тендер зарлаж сууна. Харин эрүүл мэндийн байгууллагын хувьд энэ онд 60 тэрбумаар тоног төхөөрөмж авахаар тусгасан ч аваагүй тул санхүүжилтийг нь буцааж байгаа аж.

Холбоотой мэдээлэл:

Д.ЦЭГЦ

Энэ мэдээнд өгөх таны үнэлгээ

Хуваалцаарай Жиргээрэй