Монгол Улсын Их Хурлын чуулганы 2025 оны зургаадугаар сарын 19-ний өдрийн нэгдсэн хуралдаанаар Ц.Амартөгс, Л.Золзаяа Б.Төгсцэнгэл нарыг Төрийн албаны зөвлөлийн орон тооны гишүүнээр томилж, Улсын Их Хурлын тогтоолыг баталсан. Тэгвэл тэд өнөөдөр /2025.06.24/ үүрэгт ажлаа хүлээн авсан байна.
Улсын Их Хурлын гишүүн, Төрийн байгуулалтын байнгын хорооны дарга Ж.Бат-Эрдэнэ, Монгол Улсын төрийн алба бол нэр хүндтэй, шударга, мэргэшсэн байх ёстой. Энэ бол төрийн албанд ажиллаж буй хүн бүрийн үүрэг хариуцлага юм. Төрийн байгууллагууд ард түмэнд чиглэсэн, эдийн засаг, нийгмийг хөгжүүлэх бодлогыг хэрэгжүүлж, хариуцлагагүй байдлыг арилгахын төлөө ажиллах учиртай. Шинээр томилогдож буй гишүүд өмнө нь төрийн албанд ажилласан, мэргэшсэн, туршлагатай хүмүүс байна. Та бүхнийг төрийн албаны шинэ шатанд өндөр зорилго өвөртөлж ирсэн гэж ойлгож байна. Албан тушаал бол эрх мэдэл бус, хариуцлага юм" хэмээжээ.
Төрийн албаны зөвлөлд шинээр томилогдсон гишүүдийн тухайд, Ц.Амартөгс нь эдийн засагч, төрийн удирдлагын магистр, төрийн албанд 25 жилийн туршлагатай, Б.Төгсцэнгэл нь эрх зүйч, төрийн албанд 15 жил ажилласан, Л.Золзаяа нь эрх зүйч, олон улсын худалдааны магистр, төрийн албанд 23 жил 9 сар ажилласан туршлагатай юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.