Хэргийн явц: Сэжигтний талаас хохирогчийн ар гэрт 450 сая төгрөгөөр тохирох санал тавьжээ

Сүхбаатар дүүргийн 3-р хороо ХААН банкны өөдөөс харсан “Cante” шөнийн цэнгээний газрын үүдэнд энэ сарын 18-19-нд шилжих шөнийн 03.45 цагийн орчим бүлэг зодоон болсон.

Зодоонд 25 настай С хохирч, нүүрний яс цөмөрсөн, нэг нүдний хараа алдсан оноштойгоор ГССҮТ-д хэвтэн эмчлүүлж байгаа. Түүнийг яаралтай гурвалсан мэс ажилбарт орох шаардлагатай талаар гэр бүлийнхэн нь мэдээлж буй.

Харин энэ гэмт хэрэгт сэжигтнээр 28, 29 настай С, Т нарыг саатуулж, дахин нэг иргэнийг эрэн сурвалжилж байсан нь өчигдөр олны анхаарлыг ихээхэн татсан.

Мэдээж нийтэд ил болсноор, саатуулагдсан хоёр иргэн нь Цэрэнпунцагийн Санжаачойпэл, Эрдэнэбатын Тэмүүлэн нар байв. Харин гурав дахь нь Баатарсайханы Амарсайхан болж таарсан. Тэрбээр долдугаар сарын 20-ны өдөр Монгол Улсын хилээр гарсан тул ийн эрэн сурвалжилж байжээ.

Үүнээс гадна ЦЕГ-ын дарга асан Ж.Болдын хүү Ө тус бүлэг зодоонд оролцсон гэх мэдээллүүд хөвөрч байна.

Өөрөөр хэлбэл хэргийн оролцогч болох дөрвөн хүн мэдээлэгдсэн. Тэд хэдийгээр насанд хүрсэн хүмүүс ч төрсөн эцэг нь томоохон бизнестэй, төрийн өндөр албан тушаал хашиж байсан буюу нийгмийн үлгэр жишээ эрхмүүд учир ёс зүй нэхэгдэж байгаа.

Яг юу болов?

Цагдаагийн байгууллагын эх сурвалжууд зодоон юунаас үүдэж болсон, сэжигтнүүд хэрхэн мэдүүлэг өгсөн, мөрдөн шалгах ажиллагааны явцад ямар нөхцөл тогтоогдсон талаар мэдээлэл өгөхийг хүсэхгүй байна. Харин 40-50 хүний бүлэг зодоон гэсэн мэдээллийг үгүйсгэв.

Нэгэн эх сурвалж бие биедээ хатуу үг шидэлцсэнээс үүдсэн маргаан гэж тайлбарлав.

Нөгөө талаас, Ц.Санжаачойпэл өөрийн найз охиныг харамлах сэдлээр энэ маргааныг анхлан үүсгэсэн гэдэг мэдээллийг ойр тойрныхон нь өгөөд эхэлжээ.

Ямартай ч хохирогч С-ийг Ц.Санжаачойпэл түрүүлж хүчтэйгээр цохин унагаж буй нь “Канте” цэнгээний газрын үүдний бичлэгээс тод харагдаж байгаа. Газар унасан хойно нь дахин өөр этгээд өшиглөдөг бөгөөд энэ нь Э.Тэмүүлэн гэх, одоогоор баталгаагүй. Харин Б.Амарсайхан төдийлөн ялгарч, танигдахгүй байгаа юм.

Нөгөө талаас ЦЕГ-ын дарга асан, хурандаа Ж.Болдын хүүг сэжигтнээр тооцон, саатуулсан гэх мэдээлэл үгүйсгэгдсэн. Хэргийн хүрээнд нийт гурван л сэжигтэн тогтоожээ.

Харин хохирогч С-ийн ах өөрийн нүүр хуудастаа “Ж.Болд хурандаагийн хүү харин ч дүүг маань хамгаалж, өмөөрч, анхлан тусламж дуудсан. Найз шиг байсан, тэр мэдүүлгээ ч өгсөн” гэж бичээд байгаа юм.

Хамгийн бодит, албан мэдээллээрх нөхцөл байдал

Одоогийн байдлаар ийнхүү үйл явдал хэрхэн өрнөсөн нь яг таг тодорхойгүй ч, хуулийн байгууллагаас,

• УИХ-ын гишүүн асан, “Жем интернэйшнл” группийн үүсгэн байгуулагч Ц.Цэрэнпунцагийн Санжаачойпэл
• “Эрэл”-ийн Б.Эрдэнэбатын хүү Тэмүүлэн
• “Таванбогд”-ын Ц.Баатарсайханы хүү Амарсайхан нарыг сэжигтнээр тооцсон. Дээр дурдсан хоёрыг 48 цагийн хугацаатай саатуулсан. Харин Б.Амарсайханыг эрэн сурвалжилж байгаа нь үнэн байна.

Харин дөрөв дэх этгээд болох ЦЕГ-ын дарга асан Ж.Болдын хүү Ө холбогдох мэдүүлгээ өгсөн агаад хуулийн байгууллагаас сэжигтэнд тооцоогүй аж.

ЦЕГ-аас хэвлэлд мэдээлэл өгөхдөө тодорхой зүйл хэлээгүй. С, Т нарыг сэжигтнээр саатуулсан, мансууруулах бодисын тест авсан, дэлгэрэнгүй мэдээлэл өгөх боломжгүй хэмээсэн юм.

Харин С, Т нарыг 48 цагийн хугацаатай саатуулсан талаарх шүүхийн мэдээнд "... хохирогч Д.С-ын нүүрэн тус газарт нь гараараа цохих, хөлөөрөө өшиглөх зэргээр биед нь бүлэглэн халдаж эрүүл мэндэд нь хохирол учруулсан” гэх хэргээр мөрдөн шалгах ажиллагааг явуулж шалгасан байх бөгөөд шүүхээс хэрэг бүртгэл, мөрдөн шалгах ажиллагааны үед цугларсан нотлох баримтуудыг үндэслэн сэжигтэн Эрдэнэбатын Тэмүүлэн, Цэрэнпунцагийн Санжаачойпэл нарыг “гэмт хэрэг үйлдсэн гэх хангалттай үндэслэл байгаа” гэх үндэслэл тогтоогдож байх тул сэжигтнийг баривчлах саналыг тус тус хүлээн авсан" хэмээн дурдсан.

Ийнхүү мөрдөн шалгах ажиллагаа үргэлжилж байна.

Сэжигтний талаас 450 саяар тохирох санал тавьж, хуулийн байгууллагад "Биднийг яаж ч чадахгүй" гэхчлэн ханджээ

Бүлэг зодоон хааяагүй тохиолдож байдаг ч энэ удаа нэр нөлөө бүхий эрхмүүдийн хүүхдүүд оролцсон утгаараа нийгмийн анхаарлыг татаж байна. Түүнчлэн, өчигдөр буюу долдугаар сарын 21-ний өдрийн сошиал дахь мэдээллийн урсгал ихээхэн замбараагүй байсан нь, талууд оролцож эхэлснийг бататгах юм.

Тухайлбал, сэжигтний талаас хохирогчийн ар гэрт 450 сая орчим төгрөгийн дүнгээр тохирох санал тавьсан гэгдэв.

Мөн түүнчлэн тэдний зүгээс хуулийн байгууллагад очихдоо “Ерөнхий сайдаар Г.Занданшатар очсон, бид яах ч үгүй” гэлцсэн гэдгийг хэд хэдэн эх сурвалж бататгаж байгаа юм.

ЦЕГ-ын дарга асан Ж.Болд нь Г.Занданшатарын зөвлөхөөр томилогдох яриа байна. Ерөнхий сайдын ЭТТ ХК дээр хийсэн уулзалтад Ж.Болд сууж байгаа нь бичлэгт бий. Тэр утгаар, Г.Занданшатарт ойр гэгдэх холбоос үүсэв үү гэлээ ч Ж.Болдын хүүг сэжигтнээр татаагүй. Гэхдээ зодоонд оролцсон, балмад гэмээр авирласан нь бол бичлэгт үлдсэн.

Нийгэмд шударга ёс тогтох агуулгаараа: Энэ хэргийн талаар анхлан шүгэл үлээж, сэжигтний талын статусыг зарласан хохирогчийн гэр бүл одоо тууштай байх эсэхээс ихээхэн зүйл хамаарна. Учир нь Ц.Цэрэнпунцаг, Б.Эрдэнэбат, Ц.Баатарсайхан нар бол яах аргагүй Монголын толгой хөрөнгөтнүүд бөгөөд эхнээсээ тохирох, ойлголцох, аргалах стратегидээ орчихсон нь ил тод харагдаж байгаа.

Нөгөө талаас хуулийн байгууллага ч шударга ажиллаж, жишиг тогтоох, иргэдийн итгэлийг хүлээх нь чухал. Мөн тодорхой хэмжээнд илүү нээлттэй, шуурхай мэдээлэл өгөх нь энэ хүлээлтэд нийцнэ. Эс тэгвэл сошиал дахь мэдээллийн замбараагүй урсгал дунд өөрөө дахин хүний эрх зөрчигдөж, алдар хүндээр хохирох асуудал гаарах эрсдэлтэй билээ.

Цэрэнпунцагийн Санжаачойпэл, Эрдэнэбатын Тэмүүлэн нарыг цагдан хорьсон хугацаа өнөөдөр 22.00 цагт дуусна. Прокуророос уг хугацааг сунгах эсэх тодорхойгүй. Сулласан ч мөрдөн шалгах ажиллагаа бас үргэлжлэх юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй