ОБЕГ: Цаг агаарын нөлөөллийн багууд өнөө шөнө Сэлэнгэ аймагт зориудаар бороо оруулна

2025 оны долоодугаар сарын 24-нөөс 25-нд шилжих шөнө их хэмжээний газар нутгийг хамарсан цаг агаарын процесс ирэх урьдчилсан дүгнэлт гарчээ. Үүний улмаас цаг агаарт зориудаар нөлөөлөх буюу үүл буудах нөхцөл бүрдэнэ хэмээн ЦУОШГ үзэж байгаа бөгөөд гурван багийг бэлэн байдалд ажиллуулж байна.

Цаг уур, орчны шинжилгээний газар Сэлэнгэ аймгийн түймрийн голомтод дэмжлэг үзүүлэх зорилгоор 2025 оны зургаадугаар сарын 15-наас эхлэн тусгай ажиллагаа явуулж эхэлжээ. Энэ хүрээнд гурван баг /шинжээчдийн баг/ ойролцоох бүс нутагт бэлэн байдалд ажиллаж буй.

Цаг агаарт зориудаар нөлөөлөх ажиллагааны талаар ЦУОШГ-ын улсын сүлжээ, уур амьсгалын үйлчилгээний хэлтсийн дарга мэдээлэл хүргэсэн юм. Тус мэдээлэлд: "Өнгөрсөн шөнө Сэлэнгэ аймгийн ихэнх сумдаар 0.5-6 мм хур тунадас орсон бөгөөд үүнд гурван экспедицийн зүгээс идэвхтэй ажиллагаа явуулсан. Үүнд:

• Нэгдүгээр экспедиц Баянгол сумын нутаг дэвсгэрт,

• Хоёрдугаар экспедиц Хушаат сумын орчимд,

• Гуравдугаар экспедиц Мандал сумын чиглэлд тус тус үүлэнд зориудаар нөлөөлөх ажиллагаа явуулжээ.

Цаг агаарт зориудаар нөлөөлөх ажиллагаа нь зөвхөн байгалийн процесс, тухайлбал үүл үүсэх нөхцөл бүрдэх үед л хэрэгжих боломжтой байдаг. Тиймээс тухайн нөхцөл бүрдтэл шинжээчдийн багийг бэлэн байдалд ажиллуулж, мэдээллийг нарийн хянаж байгаа юм. Сэлэнгэ аймгийн түймрийн голомтод хамгийн тулгамдсан асуудал нь халуун, хуурайшилттай, утаатай орчин бөгөөд энэ нь үүл үүсэх, түүнд нөлөөлөх боломжийг бууруулдаг.

Цаг уурын урьдчилсан судалгаагаар үүл үүсэх нөхцөл бүрдвэл нөлөөлөл үзүүлэх бүрэн боломжтой гэж үзэж байна. Гэвч дээрх онцлог нөхцлөөс шалтгаалан байнгын ажиллагаа явуулах боломж хязгаарлагдмал байгаа" хэмээсэн юм.

Энэ мэдээнд өгөх таны үнэлгээ

Хуваалцаарай Жиргээрэй