И.Балжинням: Эмч, эмнэлэг байгаад нэмэргүй, эм, эмнэлгийн хэрэгслийн нөөц дууслаа. Нийт өр 240 тэрбумд хүрсэн

Эм ханган нийлүүлэгч байгууллагууд Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу эрүүл мэндийн байгууллагуудад эм, эмнэлгийн хэрэгсэл нийлүүлдэг. Гэтэл эрүүл мэндийн байгууллагууд эм, эмнэлгийн хэрэгслийн төлбөрөө гэрээт хугацаандаа барагдуулаагүй улмаас он дамнасан авлага үүсэж, одоог хүртэл бүрэн төлөгдөөгүй байгаа аж. Энэ хүрээнд Монголын эм зүйн байгууллагуудын нэгдсэн "Эм" холбооны гүйцэтгэх захирал И.Балжиннямаас тодрууллаа.

-Эм, эмнэлгийн хэрэгслийн төлбөрөө төлөөгүй ямар эмнэлгүүд байна вэ?

-Бүх эмнэлгүүд байна. Нийслэл, дүүрэг, аймаг, лавлагаа шатлалын гээд.

-Төлбөрөө төлөөгүй хугацаа нь хэр урт вэ, мөн төлбөрийн хэмжээ нь?

-Өнгөрсөн оны төлбөрийн үлдэгдэл гэхэд бараг 10 гаруй тэрбум төгрөг байна. Шинээр үүсээд байгаа хугацаа хэтэрсэн буюу 60 хоногоос дээш болон 7, 8 сарын төлбөрийн үлдэгдэлтэй эмнэлгүүд ч байна. Тодруулбал, 16 байгууллага дээр авсан судалгаагаар 100 гаруй тэрбум төгрөг болчихсон байна. Харин салбарын хэмжээнд аваад үзвэл 240-250 тэрбум төгрөгт хүрээд байгаа.

-Төлөхгүй байгаа шалтгаанаа хэрхэн тайлбарлаж байна?

-Сангийн яам хязгаарлалт тавьчхаад төлбөрөө төлж чадахгүй байна гэдэг. Гэтэл Сангийн яам бүх асуудлыг нь шийдээд мөнгө, төгрөгийг нь өгчихсөн. Танай яамны асуудал гээд байгаа.

-Одоо танайд бодит ямар эрсдэлүүд тулгарч байна?

-Эм, эмнэлгийн хэрэгслийн нөөцгүй болж байна. Гадаадын төлбөр тооцоогоо төлж чадаагүйн улмаас гэрээнүүд цуцлагдсан. Арилжааны банкнуудаас зээл аваад худалдан авалт хийчихсэн. Өр, хүү, төлбөр, ханшийн зөрүү гээд өчнөөн асуудал, дарамт бий болоод байгаа. Оны сүүл рүү энэ байдлаараа үргэлжилбэл эм эмнэлгийн хэрэгсэлгүй болно.

-Танайхаас гадна ямар ямар байгууллагууд байдаг вэ, тэдний нөхцөл байдал?

-Манайх нэгдсэн холбоо нь юм. Манай гишүүнчлэлтэй 70 гаруй эм ханган нийлүүлэгчид бий. Гишүүн бус 60-аад байгууллага байгаа. Эдгээр байгууллагуудын нөөц мөн адил дууссан, эрсдэлд орсон.

-Ингэснээр ямар үр дагаварт хүрэх бол?

-Эмчилгээ, оношилгоо зэрэг бүх урьдчилан сэргийлэх үйл ажиллагаа эм, эмнэлгийн хэрэгсэлгүйгээр явагдахгүй. Эмч нар, эмнэлгүүд байгаад юу ч хийж чадахгүй гэсэн үг. Хүмүүс өвдлөө гэж бодоход тусламж үйлчилгээ авч чадахгүй, цаашлаад үхэх хүртэл эрсдэл учирч болзошгүй шүү дээ.

-Эрүүл мэндийн яам энэ асуудалд хэрхэн анхаарч, ямар арга хэмжээ авав?

-Засгийн газрын хуралдаанаар оруулж, Хууль зүйн сайдаар ахлуулсан зургаан яамны ажлын хэсэг байгуулагдаж байгаа сураг байсан. Энэ баг хаана, ямар алдаа гарсныг тогтооно гэсэн. Гэхдээ одоог хүртэл ажлын хэсэг нь байгуулагдаагүй байгаа. Тэгэхээр урт хугацаа орж таарна. Энэ ондоо шийдэгдэхгүй л болов уу.

Энэ мэдээнд өгөх таны үнэлгээ

Хуваалцаарай Жиргээрэй