Ардчилсан нам өөрөө ардчилсан байсангүй

Өнгөрсөн өдрүүдэд яригдсан АН-ын даргын асуудал өчигдөр албажиж, эцэст нь дөрвөн нэр дэвшигч тодров.

Энэ зуурт өөрсдийгөө баталгаажуулсан нэр дэвшигчид 200 саяын хураамж төлсөн, дүрмээс давсан журмаар зохион байгуулагдсан гэхчлэн олон зөрчилтэй. Даргын сонгуульд илт залуусаа шахаж, хавчсан дүр зураг анзаарагдав.

Процессын хувьд уг нь АН дүрмээ эхэлж шинэчлээд УДШ-д бүтгүүлснээр даргын асуудал эхлэх ёстой байсан. Ингэж хуулийн дагуу, залуусынхаа хүсэлтийг сонсож явбал даргын сонгууль нь нэг сараар л хойшлох байлаа. Гэтэл тэгсэнгүй.

Өнгөрсөнд “эхлээд бид дүрмээ” ярина гэх байр суурийг илэрхийлсээр ирсэн АН-ын дарга Л.Гантөмөр хүртэл суудлаа өгөхдөө дараагийн хүч бүхий талаа дагав бололтой. Дүрмийн талаар ам нээсэнгүй. Даргын сунгааг шууд эхлэхийг зөвшөөрөв. Ингэж дүрэм ярьсан залуус дарагдаж, ах нар нь тоглолтоо үргэлжлүүллээ.

Үүнээс гадна АН даргын сонгуулиа 2023 оны нэгдүгээр сард баталсан гэх журмын дагуу зохион байгууллаа. Дүрмээсээ давсан уг журмын дагуу эхлээд:

• ҮБХ-нд дөрвөөс дээш жил ажилласан хүн намын даргад нэр дэвших боломжтой хэмээн Ч.Лодойсамбуу, Л.Мөнхбаясгалан, О.Алтангэрэл нарын залуу гишүүдээ жагсаалтаас шууд хассан. Хэрэв дүрмээ ярьсан бол тэдэнд ч нэр дэвших боломж байх байлаа. Тэр боломжийг нь Ардчилсан нам гаргасангүй.

Дараа нь:

• Нэр дэвшигчид намын Их хурлын зардлыг хувааж төлөх ёстой гэх журам ярьж албан ёсоор намаасаа 80-аад оныхноо төлөөлж нэр дэвшсэн Ө.Шижирийг түдгэлзүүлэв. Ингэхдээ түүнд ямар ч сонголт өгөөгүй.

Дотоод сонгуулийн комисс Ө.Шижир гишүүнд 200 саяын хураамжийг бэлнээр өгөхийг банк хаасны дараа хэлсэн. Шилжүүлье гэж үзсэн ч хүлээж аваагүй байгаа юм. Харин бусад дөрвөн нэр дэвшигч мөнгөө бэлнээр өгснөөр дэвших эрхээ авчээ.

Үндэсний бодлогын хорооны дотоод сонгууль зохион байгуулах комиссын дарга С.Эрдэнэболд уг асуудлыг тайлбарлахдаа, “Бид өмнөх оройн нь дэвших боломжит хүмүүст залгаж хураамжийн талаар хэлсэн байсан” гэсэн. Түүний хэлсэн дэвших боломжтой хүмүүс нь Ж.Баярмаа, Б.Пүрэвдорж, О.Цогтгэрэл нар байсан нь тэд 200 саяын асуудлыг гайхаагүй. Мэдээлэл хийхдээ энэ талаар ганц үг унагаагүйгээр батлагдаж болно. Харин Б.Отгонбат гэх гишүүний хувьд нэр дэвших шуум ч гараагүй хүн Ө.Шижир гишүүний дараа буюу хамгийн сүүлд ирэхдээ мөнгөтэй ирсэн болж таарч байгаа юм.

Өөрөөр хэлбэл, Тэд ганц Ө.Шижир гишүүнд л уг хураамжийг анхааруулаагүй. Тулгаж нэхээд, өгөөгүй гэх шалтгаанаар намын даргын нэр дэвшигчээс түтгэлзүүлжээ.

Ийм ядмаг дүрэмгүй журмаар АН энэ удаагийн даргын сунгаагаа зохион байгууллаа. Тэд ард түмний хүсэл зориг гэх ч ардчилсан гэх нэрийн утгыг нам дотроо ч хэрэгжүүлж чадсангүй.

Д.ЦЭГЦ

Энэ мэдээнд өгөх таны үнэлгээ

Хуваалцаарай Жиргээрэй