Улс төрийн мэдээ

Нэг дороос I АН-ын даргыг сонгох эхний санал хураалтын ТООЛЛОГО ЯВАГДАЖ БАЙНА

АН шинэ даргаа тодруулах Үндэсний бодлогын хорооны хуралдааны мэдээллийг Төрийн ордноос хүргэж байна.


НЭМЭЛТ: 14.30 цаг

Эхний санал хураалт дууслаа. Улмаар одоо тооллогын комисс саналын хуудсыг тоолж, дүнг нэгтгэж байна.

Уг санал хураалтаар гурван нэр дэвшигч 10-аас доош хувийн санал авахгүй бол хамгийн бага саналтайг хасах маягаар үргэлжлүүлэх юм.


НЭМЭЛТ: 13:40 цаг

Ардчилсан намын даргыг сонгох эхний санал хураалт эхэллээ.

Санал хураалт хэрхэн явагдах талаар ҮБХ-ны Дотоод сонгуулийн хорооны нарийн бичгийн дарга О.Баасанхүү дараах тайлбар өглөө.

О.Баасанхүү "Хамгийн багадаа нэг удаа санал хураалт явна. Нэр дэвшигч дотроос гурван хүн 10 хүртэлх хувийн санал аваагүй бол үлдсэн нэг дэвшигч нь дарга болно. Харин дөрвүүлээ 10 хувиас дээш санал авчихвал хоёр дахь санал хураалт явуулна. Хоёр дахь хураалтаар хамгийн бага санал авсныг хасаад явах юм. Хасаж явсаар хоёроос нэг үлдэж, дарга тодорно.

Санал хураалтын үр дүнг тухай бүр тайлбарлаж, мэдээлж явах болно.

ҮБХ-ны ирц 70-80 хувьтай гэж байна. Санал өгсөн хүний тоогоор ирцийн мэдээг нарийвчилж өгнө" хэмээсэн юм.


НЭМЭЛТ: 12:25 цаг

-Нэр дэвшигчид илтгэл тавьж дууслаа-

Ардчилсан намын Үндэсний бодлогын хорооны хуралдаан үргэлжилж байна. Хуралдаан өнөөдөр өглөөний 09:00 цагт эхэлсэн. Харин дөнгөж сая АН-ын даргад нэр дэвшигчид ҮХБ-ны гишүүдэд илтгэл тавьж дууслаа. Үргэлжлүүлэн нэр дэвшигчид ҮБХ-ны гишүүдийн асуултад хариулт өгч эхэллээ.


НЭМЭЛТ: 12:00 цаг

-Р.Амаржаргал: АН гэх хамгийн хүчирхэг намыг би байгуулж өгсөн. Яаж авч явах нь энэ залуусын хэрэг-

Ерөнхий сайд асан Р.Амаржаргал өөрийн байр сууриа илэрхийллээ.

-Ардчилсан нам өнгөрсөн гурван сонгуульд ялагдах ёстой байсан болоод л ялагдсан. Нам шаардлага хангаагүй гэсэн үг. Намын хуваагдал бас энэ ялагдлын нэг шалтгаан болсон. Янз бүрийн үзэл бодолтой хүмүүс орж ирсэн. Нам гэдэг механизмыг ашиглан АН дээр дөрөөлж эрх мэдэлд хүрэх гэсэн хүмүүс манай намд бий. Нөгөө талд улс орноо гэсэн үзэл бодолтой хүн ч манай намд байгаа. Эдгээрээс болж хуваагдал бий болсон.

Бас үе солигдчихлоо. Өнгөрсөнд бид хийх ёстойгоо хийсэн. Бидний зорилго төвлөрсөн төлөвлөгөөт эдийн засгийг зах зээлийн эдийн засагт шилжүүлэх. Дарангуйллыг халж ардчиллыг бий болгох байсан. Энэ зорилгоо бид биелүүлсэн. Хийх ёстой ажлаа хийсэн. Сайн, муу ч зах зээлд шилжүүлсэн. Үг хэлэх, хэвлэн нийтлэх эрх чөлөөг ч бид авч ирсэн. Бидний үеийнхэн болон би өөрийн нуруун дээр ирсэн ачаагаа нэр төртэй биелүүлсэн гэж боддог. Энийг авч явна гэдэг бол өөр асуудал. 2012 онд монголын хамгийн хүчирхэг АН-ыг байгуулсан хүн нь би. Байгуулаад өгсөн намыг яаж авч явах нь энэ залуусын хэрэг.  “Та нөхөд хариуцлагатай бай. Эдийн засгийн бүх институтийг чинь байгуулаад өгсөн. Хамгийн хүчирхэг нам болгож өгсөн. Олигтойхон намаа авч чадахгүй бол битгий олон юм ярь” гэж АН-ын залууст хэлмээр байна.

Шинэ дөрвөн нэр дэвшигч дажгүй л харагдаж байна. Сайн бас сул талтай байгаа байх. Нэгнийхээ давуу, сул талыг нийлүүлж ажиллах чадвар энэ хэдэд байх ёстой. Тэр ухаан нэр дэвшигчдэд байгаа байх. Энэ дотроос хэн нэгнийг нь онцолно гэдэг муухай.

Ардчилсан нам ялахын тулд ард иргэдийн сэтгэлгээг эзэмдэх хэрэгтэй. Саналыг нь авахын тулд сэтгэлд нь хүр. Популизм хоосон ярианаас бол одоо бүгд залхсан. Үнэхээр бодитой, үндэслэлтэй, хэрэгжүүлэх магадлалаа тооцчихсон зүйл гаргаж ирэх хэрэгтэй байна. Миний хувьд хоёр зүйлийг манай намынхан яриасай гэж хүсдэг.

  • Нэгдүгээрт, өмчийн эрхийн асуудал. Манай монголд өнөөдөр өмчийн эрх арай дэндүү хөсөр хаягдсан. Хүн өмчтэй байх ямар ч бололцоогүй шахуу болсон. Өмчтэйг нь айлган сүрдүүлдэг, дээрэмддэг үйл явц хаа сайгүй байна. Энэ Ерөнхий сайд Г.Занданшатар хүртэл бөөн цэрэг дагуулж очоод хүний юмыг дээрэмдэж л байсан. Ийм хандлагатай хүмүүс төрийг яаж удирдах юм. Уг нь хүн өмчтэй байх ёстой. Түүнийгээ баяжуулж, хөгжүүлж, өвлүүлэх ёстой. Ийм өмчийн эрх баталгаатай байж байж улс орон босож ирнэ. Үүнийг онцгой анхаараач гэмээр байна.
  • Хоёрдугаарт, хэлцлийн тухай асуудал. Хэлцэл гэдэг хоёр нөхөр хоорондоо гэрээ хэлэлцээ байгуулах тухай асуудал. Энэ хэлцлийг хангах үүрэг нь төрд ноогддог. Улсаараа хэлцэл хийж чаддаг байх ёстой. Энэ соёл манайд байхгүй. Хаа сайгүй хулхи хэлэлцээ болсон. Тиймээс хэлцлийн эрхийн тухай асуудлыг ярих ёстой. Хэлцлийн гүйцэтгэлийн хангуулах асуудал төрийн үүрэг.  

НЭМЭЛТ: 11:30 цаг

-Фото: Даргаа сонгох Ардчилсан намын ҮБХ-ны хуралдаан үргэлжилж байна-

Гэрэл зургийг: Б.Эрдэнэбаяр


НЭМЭЛТ: 10:40 цаг

-Л.Мөнхбаясгалан: Миний хувьд улс төр дөнгөж эхэлж байна-

УИХ-ын гишүүн Л.Мөнхбаясгалан:

Зургийг Б.Эрдэнэбаяр

-Намын дүрмийн асуудал дээр олонхоо дагаж байгаа. Одоо яг УДШ-д бүртгэлтэй дүрэм, журмаараа явна. Яг одоо дөрвөн нэр дэвшигч илтгэл тавьж эхэлсэн. Бид заалнаас бид ямар нэг горимын санал хураахгүй. Хураавал маргаан үүснэ. Тиймээс энэ саналыг би дэвшүүлж, намынхан дэмжсэн.

Дөрвөн нэр дэвшигчийн хувьд Б.Пүрэвдорж, О.Цогтгэрэл хоёр гишүүний хувьд туршлагатай. Парламентад удаа дараа сонгогдож, хариуцлагатай албан тушаал хашиж байсан. Ж.Баярмаа гишүүн бол маш их мэдлэгэ боловсролтой, шударга, эмэгтэйчүүдийн манлайллыг харуулан дэвшиж байгаа хүн. Б.Отгонбатын хувьд залуу хүн, барууны үзэлтэй. Түүнийгээ үндсэний онцлогтой хольж явхаар хүн гэж харсан.

Би бол сонголтоо хийсэн. Манай намын дараагийн дарга ялалтын сэтгэлзүйтэй хүн байх ёстой. Бид МАН-аас юм гуйдаг байх ёсгүй. Мөн эв нэгдлийг хангах ёстой. Ямар нэг сонгууль болоход бие биенээ алахаас буцахгүй болдог фракц хоорондын зөрчлүүдийг арилгаж, эвлрүүлэх ёстой. Дээрээс нь АН-ын жирийн гишүүн, ард түмний нүүрийг харж чаддаг. Эгэл жирийн бүх сумд, багаар явдаг хүн байгаасай гэж хүсэж байгаа. Намын даргад ҮБХ-ны гишүүнээр дөрвөн жил ажилласан хүн сонгоно гэж сая дахиад баталчихлаа. Дөрвөн жил хурдан өнгөрнө. Гишүүний бүрэн эрхтэй хамт дуусна. Миний хувьд улс төр дөнгөж эхэлж байна. Дахиад 20 жил, мөн ч олон сонгууль хүлээж байна.


НЭМЭЛТ: 09:40 цаг

-Б.Отгонбат: Ажил хийсэн нь биш хэн нэгний өрөөний үүдэнд суусан нь дэвшээд байхаар чадвартай хүмүүс АН-аас зугтаж байна-

ҮБХ-ны хуралдааны үеэр АН-ын даргад нэр дэвшигчид байр сууриа илэрхийллээ.

Ардчилсан намын даргад нэр дэвшигч, ҮБХ-ны гишүүн Б.Отгонбат байр сууриа илэрхийллээ.

-Хамгийн гол нам дамнасан тохироо хийдэг бүлэглэлүүд АН-д итгэх иргэдийн итгэлийг бууруулж байна. Тиймээс өөрийн гэсэн үнэт зүйлтэй, зарчимтай, бие даасан бодолтой байх хэрэгтэй байна. Тэгэхгүй бол бид олон жил эдгээрийг хэрэгжүүлж чадахгүй хүмүүсийг дарга болгох гэж санал өгч, ҮБХ-ны заалны арын суудалд үнэхээр олон жил суулгаа. Одоо хангалттай. Бид өөрсдөө гарч ирэх, дэвших болсон. АН-ын 70-80-аад онынхны үе ирсэн. Тиймээс тэднийгээ төлөөлж нэр дэвшиж байгаадаа баяртай байна.

Хэн ажил хийсэн нь нэр дэвшдэг байхгүй бол хэн нэгний өрөөний үүдэнд суусан нь дэвшээд байхаар чадвартай хүмүүс энэ намаас зугтаж байна. Тиймээс яаж хаалгаа нээх үү. Гаднаас эрүүл нийгмийн төлөөллүүдийг яаж хэрхэн оруулж ирэх үү гэдэг бодлого АН-д хэрэгтэй байна. Манай нам өөрсдөө хаалгаа нээж эхэлбэл цаашдын ирээдүй сайхан харагдаж байна. Нэр дэвшигчд хамтран 130 орчим сая төгрөг гаргахаар шийдсэн.

-Б.Пүрэвдорж: Би хэзээ ч хүний халаасанд орж үзээгүй. Эрх баригчидтай эвсэхгүй-

Ардчилсан намын даргад нэр дэвшигч УИХ-ын дэд дарга Б.Пүрэвдорж байр сууриа илэрхийллээ.

-АН-ын даргаар сонгогдвол намын эв нэгдлээ сахиж, олон нутаг, ард иргэд сонгогчдодоо тулж ажиллана. Намын доторх гишүүдийнхээ судалгааг илүү сайн хийсний үр дүнд дараа дараагийн сонгуульд тухайн тойрогт хэн илүү ажиллах хүмүүсийг сонгож орон нутагт ажиллуулж, намын гишүүдээ илүү идэвхтэй, эв нэгдэлтэй болгоно. Үр дүнд нь гишүүд маань жирийн иргэдэд АН-ын бодлого, үйл ажиллагааг илүү сайн таниулна. Мөн гол асуудал болох намын эв нэгдлийг дотооддоо сахиулж, гишүүдийн хоорондын харилцааг сайжруулна. Үүгээрээ дамжуулна намын бодлого шийдвэр, үр дүнг илүү өндөр түвшинд аваачихыг зорино.

Өнгөрсөн хугацаанд улс төрийн гурван сонгуульд бид үнэмлэхгүй ялагдал хүлээсэн. Эрх баригчид ард түмэнд хүрэх ёстой бүх боломжийг хулгайлж, түүнийгээ буцааж, ард иргэдээ ядуу байлгаж, худалдан авах замаар сонгуульд оролцох системийг бий болгосон. Мөн өнөөдрийн энэ асар их хулгай луйврыг төсвийн болон төрийн өмчийн компаниудаар дамжуулсан. Дээрээс нь ЖДҮ, нүүрс, төмөр замын хулгай зэрэг маш олон хулгайг хийсэн. Ямар ч хяналтгүй, хариуцлага тооцох боломжгүйгээр энэ бүхнийг хийсэн. Тиймээс АН ялагдах эрхгүй. Өнгөрсөн есөн жилийн турш хийсэн тэр бүх хулгайг илчилж хариуцлага тооцно. Эрх баригч нар нэг нэгэндээ барьцаалагдаад хэнд ч хариуцлага тооцож чадахгүй байгаа. Энэ хэвээр байвал монголын төр хулгайд живж устахад хүлээд байгаа тул манай нам ялагдах эрхгүй. Би Хэзээ ч хүний халаасанд орж үзээгүй. Эрх баригч нартай эвсэхгүй. 


НЭМЭЛТ: 09:20 цаг

Фото: Даргаа сонгох Ардчилсан намын ҮБХ-ны хуралдаан Төрийн ордонд эхэллээ

Гэрэл зургийг: Б.Эрдэнэбаяр


ЭХЛЭЛ: 09:00 цаг

-Ардчилсан нам өнөөдөр шинэ даргаа тодруулна-

Ардчилсан нам шинэ даргаа өнөөдөр /2025.08.31/ тодруулна. Энэ хүрээнд өнөөдөр 09:00 цагаас Ардчилсан намын ҮБХ-ны хурал Төрийн ордонд хуралдаж эхэлсэн. Дараа нь Их хурлаа хуралдуулах юм.

Намын ҮБХ-ны Дотоод сонгуулийн хороонд өнгөрөгч Баасан гарагт намын даргад нэр дэвшихээр дараах дөрвөн хүн бүртгүүлж, мандатаа гардсан. Нэр дэвшигчид өчигдөр нээлттэй мэтгэлцсэн.

Ингээд Ардчилсан намын даргад нэр дэвшигчдийн товч намтрыг танилцуулж байна.

УИХ-ын гишүүн, УИХ дахь АН-ын бүлгийн дарга Одонгийн Цогтгэрэл

  • Мэргэжил: Эдийн засаг
  • Сонгуульт албан тушаал:
  • 2009 он Ардчилсан намын гишүүн
  • 2013 оноос АН-ын ҮЗХ, ҮБХ-ын гишүүн
  • 2014-2017 он Увс аймгийн Ардчилсан намын дарга
  • 2017 оноос АН-ын Улс төрийн зөвлөлийн гишүүн

УИХ-ын дэд дарга Бөхчулууны Пүрэвдорж

  • 1990-1994 онд Монгол улсын их сургуулийн Олон улсын харилцааны дээд сургууль
  • Мэргэжил: Гадаад харилцаа, багш, орчуулагч
  • Сонгуульт албан тушаал:
  • 1992 оноос Ардчилсан намын гишүүн
  • 2004-2012 болон 2016 оноос Үндэсний бодлогын хорооны гишүүн
  • 2009-2012 он Ховд аймгийн Ардчилсан намын дарга
  • 2019-2020 он Ардчилсан намын дэд дарга
  • 2016-2020 он УИХ-ын гишүүн
  • 2020-2024 он УИХ-ын гишүүн
  • 2024 оноос УИХ-ын гишүүн, УИХ-ын дэд дарга

УИХ-ын гишүүн Жудагийн Баярмаа

  • Төгссөн сургууль:
  • 1995 онд Гадаад Хэлний Дээд Сургууль, Англи хэлний орчуулагч-багш
  • 2003 онд МУИС-ийн Хууль зүйн сургууль, Эрх зүйч
  • 2024 онд МУИС-ийн Бизнесийн сургууль, Бизнесийн удирдлага
  • 2008 онд Япон Улсын Осакагийн Их Сургууль, Нийгмийн ухааны магистр
  • 2016 оноос МУИС-ийн Олон улсын харилцаа, нийтийн удирдлагын сургууль, докторант
  • Мэргэжил: Олон улсын харилцаа, Эрх зүйч , Англи, орос хэлний орчуулагч, багш
  • Сонгуульт албан тушаал:
  • 1991 он. МоАН-ын гишүүн
  • 1998-2002 он МҮАН-ын Шинэ үе болон Ардчилсан намын Ардчилсан залуучуудын холбооны нарийн бичгийн дарга
  • 2002-2006 онд Ардчилсан намын Үндэсний зөвлөлдөх хорооны гишүүн, 2001-2005 онд Чингэлтэй дүүргийн Ардчилсан намын хорооны гишүүн, 2019 оноос одоог хүртэл АН-ын ҮБХ-ны гишүүн, 2023 оноос одоог хүртэл ҮБХ-ны тэргүүлэгч, 2023 оноос одоог хүртэл АН-ын дэд дарга

Ардчилсан намын ҮБХ-ны гишүүн Бархүүгийн Отгонбат

  • Төгссөн сургууль:
  • 2003 онд Дикинсоны Улсын Их Сургууль, Бизнесийн удирдлагын бакалавр
  • 2005 онд Кюнсландын Их Сургууль, Ахисан түвшний диплом
  • 2016 онд Харвардын Их Сургууль,Төрийн удирдлагын магистр
  • 2025 онд Пеннсильванийн Их Сургууль, Боловсролын ухааны доктор
  • Мэргэжил: Эдийн засагч
  • Сонгуульт албан тушаал:
  • 2007 он Ардчилсан намын гишүүн
  • 2007 оноос АН-ын Үндэсний бодлогын хорооны гишүүн

Гэрэл зураг, шууд дамжуулалтыг: Б.ЭРДЭНЭБАЯР

Сэтгүүлч: П.УРНАА

Редакциас: О.СОЁЛМАА, М.ТЭНГИС

Энэ мэдээнд өгөх таны үнэлгээ
Like
Love
Haha
Wow
Sad
Angry

О. Соёлмаа

СУИС РТМУС-ийг 2021 онд төгссөн. Сэтгүүлзүйн салбарт гурван жил ажиллаж байгаа. Нийгэм, Улс төрийн чиглэлээр дагнан ажилладаг.

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

guest
4 Сэтгэгдэл
Хуучин
Шинэ Шилдэг
Inline Feedbacks
View all comments
Зочин
Зочин
8 сар 31, 2025 12:52

Цогтгэрэл ок

Зочин
Зочин
8 сар 31, 2025 13:58

Пүрэвдорж ингээд л худлаа шаагаад байдаг юм, чи бол хүзүүгүй хулгайчын карманы хүн шүү дээ. Танай намынхан ч мэднэ, за монголчууд мэднэ дээ.

Монгол
Монгол
8 сар 31, 2025 14:15

Оргодол хулгайч үүрлэсэн олиггүй нам. Оргодлуудаа олж цаазлах хэрэгтэй

зочин
зочин
8 сар 31, 2025 14:16

АН-ын нөхдүүд, ялангуяа нэр дэвшигч нар нэг л зүйлийг хаяад дарга болох,сонгох сэтгэхүйдээ хөлөгдөөд байх шиг. Энэ нь намаа яаж шинэчлэх, МОНГОЛЫН УЛС ТӨРД БАЙР СУУРИЙГ НЬ ЗӨВ ЭЗЛҮҮЛЖ, НЭР ХҮНДТЭЙ НАМ БОЛГОХ асууд�##�. Байраа олоогүй байгууллага татан бууддаг, хүн орон тоогоор үгүй болдог бус уу. Одоо АН -д итгэх буурч, хэрэггүй нам гэсэн сэтгэгдэл эзэмдсэн иргэд олон болсон. Энэ Ургашгүй байдлаас болж бусад намын нэр хүндийг унагаж б.на. Сүүлдээ иргэдийн дунд намгүй төрийн тухай урсг�##� бий болсон. Телевизийн ярилцлага дээр намынхаа тухай, түүнийг яаж шинэчлэх тухай өөдтэй юм ярьсангүй, хөтлөгчийн асууд�##� ч оновчтой бус байсан нь, намын т�##�аар хөтлөгч, нэр дэвшигч нар ямарч ойлголтгүй, нэр дэвшигч нарыг нөгөө намаа муулах, төрөө шүүмжилсэн, ард иргэдэд ийм болгоно гэсэн т�##� зассан уур амьсг�##�тай болж өнгөрсөнд ҮБХ.ны гишүүд нь дүгнэлт хийж байгаа байлгүй.

Холбоотой мэдээ

Back to top button