Дата: 330 сум, есөн дүүрэгт 1,817,398 сурах бичиг тараах тендерийг санхүүжилтгүй хэмээн цуцалжээ

Боловсролын ерөнхий газраас I-V ангийн сурах бичиг тээвэрлэн хүргэх тендерийг наймдугаар сарын 07-ны өдөр зарлажээ. Тендерийн төсөвт өртөг 800 сая төгрөг. Энэ мөнгөөр нийт 21 аймаг 330 сум, есөн дүүргийн 673 сургуулийн 1,817,398 ширхэг сурах бичгийг хүргэхээр төлөвлөсөн байна.

Гэсэн ч 800 сая төгрөгийн санхүүжилт байхгүй гэх шалтгаанаар тендерт шалгарсан компанитай салбар яам гэрээ байгуулахаас татгалзжээ.

Боловсролын яам тайлбарлахдаа,

"Боловсролын сайдын 2025 оны тавдугаар сарын 13-ны өдрийн “Тушаалын хавсралтад өөрчлөлт оруулах тухай” А/220 дугаар тушаалаар батлагдсан “Боловсролын сайдын 2025 оны хөтөлбөр, арга хэмжээний жагсаалт”-ын 2.1.2-т ерөнхий боловсролын сургуулийг сурах бичгээр хангах шинэ ном хэвлүүлэх зардлыг 6,656,082.0 төгрөгийн санхүүжих дүнтэйгээр баталсан боловч 2025 оны 07 дугаар сарын 30-ны өдрийн “Жагсаалт шинэчлэн батлах тухай” А/402 дугаар тушаал болон 08 дугаар сарын 18-ны өдрийн “Хөтөлбөр, арга хэмжээний жагсаалт батлах тухай” А/414 дүгээр тушаалаар санхүүжих дүнг 3,124,620.6 төгрөг болгон бууруулсан.

Улмаар Боловсролын сайдын 2025 оны наймдугаар сарын 26-ны өдрийн “Чиглэл хүргүүлэх тухай” 1/3820 дугаар албан бичгээр “Бага ангийн сурах бичиг татан авахад шаардагдах зардлыг аймаг, нийслэлийн Боловсролын газарт шилжүүлэх боломжийг судалж, холбогдох хуулийн хүрээнд шийдвэрлэх” чиглэл ирүүлэн санхүүжилтийн эх үүсвэргүй болсныг мэдэгдсэн тул Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 30 дугаар зүйлийн 30.5-д заасан үндэслэлээр тус худалдан авах ажиллагааны гүйцэтгэгчээр шалгарсан оролцогч (компани)-тай гэрээ байгуулах боломжгүй болсныг үүгээр мэдэгдэж байна" гэжээ.

Энэ мэдээнд өгөх таны үнэлгээ

Хуваалцаарай Жиргээрэй