С.Ганбаатар А.Адъяасүрэнгийн жишээг давтав

УИХ-ын гишүүн С.Ганбаатар УИХ-ын гишүүн асан А.Адъяасүрэнгийн жишээг давтав.

УИХ-ын гишүүн асан А.Адъяасүрэн “Peace tower”-ын 804 тоот өрөөнд АТҮТ-ийн Тээвэр зохицуулалтын хэлтсийн дарга Г.Доржпаламд түүний хамаарал бүхий хүнээр дамжуулан, 100 мянган ам.долларын авлига өгсөн гэх хэргээр яллагдагчаар татагдан шалгагдаж байв. Тэрбээр УИХ-ын гишүүний бүрэн эрхээрээ халхавчилж, яллагдагчаар татах тогтоолтой танилцахгүй хэрэг шийдвэрлэх ажиллагааг удаашруулж байсан. Улмаар 2021.01.28-нд Төрийн ордон дахь УИХ-ын гишүүн А.Адьяасүрэнгийн албан өрөөнд АТГ-ын Мөрдөн шалгах хэлтсийн мөрдөгч, комиссар Д.Нямдагва очиж, НПГ-ын Эрүүгийн хэрэг үүсгэж яллагдагчаар татах тухай тогтоолыг танилцуулж байжээ.

Энэ жишээ өдгөө УИХ-ын гишүүн С.Ганбаатар дээр давтагдаж байгаа аж.

Прокурорын байгууллагаас,

• Эрүүгийн хуулийн 22.1 дэх хэсэгт заасан Эрх мэдэл албан тушаалын байдлаа урвуулан ашиглах, өөрийн хамаарал бүхий хүмүүст давуу байдал бий болгосон,
• Эрүүгийн хуулийн 22.4 дэх хэсэгт заасан хахууль авах,
• Эрүүгийн хуулийн 22.10 дахь хэсэгт заасан үндэслэлгүй хөрөнгөжих,
• Эрүүгийн хуулийн 18.6 дахь хэсэгт заасан мөнгө угаах гэсэн зүйл ангиар яллах дүгнэлт үйлджээ.

Өнгөрсөн баасан гарагт АТГ-ын мөрдөгчид прокурорын яллах дүгнэлтийг гардуулах зорилгоор очсон болж таарав. Ардчилсан намынхан Төрийн ордонд УИХ-ын гишүүний бүрэн эрхэд халдаж, гүйцэтгэх ажиллагаа явуулсан хэмээн мэдэгдэж, төсвийн тухай хуулиас завсарлага нэмж авсан билээ.

УИХ-ын гишүүн С.Ганбаатар "АТГ-ын хоёр ажилтан нэрээ нууцлан, камертайгаар орж ирсэн. Гүйцэтгэх ажиллагаа л гэж ойлгосон. АТГ мөрдөн байцаах хуулиа удаа дараалан зөрчсөн. Би дуудсан цагт нь очдог" хэмээх тайлбар өгөөд буй юм.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй