"21 аймгийн малчид мах худалдаалах" цэгийн үйл ажиллагаа Б.Цэгмидийн гараар орж, буруудав

Захуудаас 3-8 мянган төгрөгөөр хямд, шинэ махыг малчид гар дээрээс худалдаалах цэг нийслэлд нээгдэж олон нийт сайшааж байсан нь саяхан. Тиймд бодит нөхцөл байдал ямар байгаа талаар eguur.mn агентлаг ч мөн сурвалжилж байв. Сурвалжилгын дэлгэрэнгүйг ЭНД дарж уншина уу.

Баянхошууны Баруунсалаанд шинээр нээгдээд буй 21 аймгийн малчид махаа өөрсдөө зарах цэгийг анх Мөнхтөр Амгаланбаатар гэх залуу санаачлан нээсэн байдаг. Тэрбээр орон нутагт энэ чиглэлээр үйл ажиллагаа явуулсан туршлагаараа Улаанбаатарт тус цэгийг байгуулсан юм.

Энэ цэг нь малчдын өрхийн орлогыг нэмэгдүүлэх, нийслэлчүүд баталгаатай шинэ махыг хямд үнээр авч хэрэглэх боломжийг нээх гээд олон давуу талтай. Гэхдээ мах худалдаалах эрүүл ахуйн орчныг хэрхэн хангаж, махны гарал үүслийг тодорхойлсон эсэх асуудал заавал яригдах ёстой.

Биднийг газар дээрээс нь сурвалжилга бэлтгэх үеэр, Зохион байгуулагчид уг асуудлыг дараах байдлаар шийдсэн байв. Малчид махаа худалдаалахын тулд эхлээд зар дээр тавьсан утсаар холбогдож бүртгэл хийлгэнэ. Дараа нь товлосон өдрөө мах худалдааны цэгт ирж, дарааллын дагуу худалдаагаа хийнэ. Ингэхдээ мах худалдаалахад малчдаас малын гарал үүслийн бичиг болон малчин гэдгээ батлах тамга шаардана. Эдгээр бичиг баримтаар малын вакцин зэргийг шалгадаг. Мөн махны чанар, шинэ байгаа эсэхийг өглөөний 4 цагаас эхлэн зохион байгуулагчид шалгаж, 07:00 цагаас худалдаагаа эхлүүлдэг. Үнийг зохион байгуулагчид тогтоодог гэх мэдээллийг бидэнд өгсөн. Мөн тухайн үед худалдаа хийж байсан Архангай, Хэнтий, Төв, Булган аймгийн малчдаас тодруулга авахад, бүгд гарал үүслийн бичигтэйгээ ирсэн байсан. Нээгдээд удаагүй захын нөхцөл байдал ерөнхийдөө ийм байв.

Харин өдгөө хүний хөл тасрахаа больсон энэ цэгийг нийслэлийн Хан-Уул, БГД-ийн иргэд үйлчлүүлэхэд ойр станцын зам дагуу дахин нээж байгаа аж.

Гэхдээ гол асуудал нь уран ярьж олонд танил болсон өөрийгөө тэмцэгч гэгддэг иргэн Б.Цэгмид мах худалдаалах цэгийн үйл ажиллагаанд оролцдог болж, малчдаас татаас авдаг болжээ. Ингэснээр малчид ченжийн гараас Цэгмидийн гарт шилжлээ гэх шүүмж гарч эхлэв.

Б.Цэгмид нь тус цэгийн үүсгэн байгуулагч биш бөгөөд анх нээгдэж, олон нийт анхаарлаа хандуулж эхлэх үеэр дэмжиж байна гэх нэрээр очиж лайв хийж байсан нэгэн. Харин өнөөдөр тэрбээр үүсгэн байгуулагч гэх нэрийг зүүж явна.

Мөн биднийг өнгөрсөн есдүгээр сарын 19-нд 21 аймгийн малчид мах худалдаалах цэгт очиж сурвалжлах үеэр малчид лангуун дээр зогсохын тулд ямар нэг төлбөр төлөөгүй. Махаа зарж дуусаад дараагийнх нь орж ирээд явна гэх мэдээллийг өгч байсан.

Гэвч өдгөө тус газар малчдаас бог мал бүрд 10 мянга, бод мал бүрд 50 мянган төгрөгийн татвар авч эхэлжээ. Мөн үүсгэн байгуулагч нэр зүүсэн Б.Цэгмид орон нутаг болон дүүргүүдээр нэмэлтээр цэг байгуулах талаар яриа, хэлцэл хийж яваа аж.

Ардын хүүгийн санаачилсан малчдад тустай, нийслэлчүүдэд хэрэгтэй энэ ажлыг иргэн Б.Цэгмид ийн бизнес болгожээ. Мах худалдаалах цэгийг сайшааж байсан иргэд шүүмжилж эхэллээ.

Холбоотой мэдээлэл:

Д.ЦЭГЦ

Энэ мэдээнд өгөх таны үнэлгээ

Хуваалцаарай Жиргээрэй