"Ухаа худаг"-аар Хянан шалгах Түр хороо байгуулах Л.Оюун-Эрдэнийн төсөл энэ долоо хоногт тоогдох уу
Улсын Их Хурлын гишүүн Л.Оюун-Эрдэнэ нарын 33 гишүүний өргөн мэдүүлсэн “Хянан шалгах түр хороо байгуулах тухай” Улсын Их Хурлын тогтоолын төсөл" энэ долоо хоногт тоогдох уу.
Эл төслийг өнгөрсөн аравдугаар сарын 06-ны өдөр өргөн мэдүүлсэн.
Түүнээс хойш холбогдох байнгын хороод болон УИХ-ын чуулганы нэгдсэн хуралдаанаар хэд хэдэн удаа товлогдсон ч, хэлэлцэгдээгүй. Удаа дараа хойшилсоор байгаа юм. Энэ долоо хоногт хэлэлцэх асуудлыг тов дараалалд дахин багтжээ. Тухайлбал, өнөөдрийн Эдийн засгийн байнгын хороо болон пүрэв гарагийн чуулганы хуралдаанаар хэлэлцэнэ.
Л.Оюун-Эрдэнийн хувьд зургаадугаар сард Ерөнхий сайдын суудлаас бууж, наймдугаар сард Төрийн ордонд Ухаахудагийн талаар улстөрийн уулзалтууд хийсэн.
Улмаар “Таван толгойн чулуун нүүрсний бүлэг ордод хамаарах MV-011952 дугаартай “Ухаа худаг” ашигт малтмалын тусгай зөвшөөрөл болон бусад тусгай зөвшөөрөлтэй талбайг ашиглах үйл ажиллагаа, олборлосон нүүрстэй холбогдуулж байгуулсан оффтейк гэрээнүүд Монгол Улсын хууль тогтоомжид нийцэж байгаа эсэх, холбогдох баримт бичиг, үйл ажиллагаанд хяналт шалгалт хийх”-ээр эл санаачилгыг гаргаад буй.
Тухайн түр хорооны шалгалтын хүрээ хязгаарыг дараах байдлаар тодорхойлжээ.
1/Өмнөговь аймгийн Цоггцэций сумын нутаг дэвсгэрт байрлах Тавантолгойн чулуун нүүрсний бүлэг ордод хамаарах MV-011952 дугаартай “Ухаа худаг” ашигт малтмалын тусгай зөвшөөрөл болон бусад тусгай зөвшөөрөлтэй талбайг ашиглах үйл ажиллагаа холбогдох хууль тогтоомжид нийцсэн эсэхийг шалгаж, дүгнэлт гаргах;
2/Стратегийн ач холбогдол бүхий Тавантолгойн чулуун нүүрсний бүлэг ордоос олборлосон нүүрстэй холбогдуулж байгуулсан оффтейк гэрээнүүд холбогдох хууль тогтоомжид нийцсэн эсэхийг хянан шалгах;
3/Ашигт малтмалын тухай хууль, Үндэсний баялгийн сангийн тухай хуулийн хэрэгжилтийг хангах хүрээнд Өмнөговь аймгийн Цогтцэций сумын нутаг дэвсгэрт байрлах стратегийн ач холбогдол бүхий Тавантолгойн чулуун нүүрсний бүлэг ордод хамаарах MV-011952 дугаартай “Ухаа худаг" ашигт малтмалын тусгай зөвшөөрөл болон бусад тусгай зөвшөөрөлтэй талбайг эзэмшигч хуулийн этгээдийн оруулсан хөрөнгө оруулалт, олборлосон нүүрс, үйл ажиллагаа, мөнгөн урсгалд дүн шинжилгээ хийх.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.