ТӨХК-иудын захирлуудыг халаад, улстөрчдийн шахааны хүмүүс томилох нь МАН-ын томчуудын хүсэл
Нэр бүхий ТӨХК-иудын захирлуудыг сольж, хуулийн байгууллагуудаар шалгуулах чиглэлийг Ерөнхий сайд өгсөн. ТӨХК-иудад хийсэн шалгалтыг Засгийн газрын хуралдаанд ЗГХЭГ-ын дарга С.Бямбацогт танилцуулсан юм. Яахав, албан байдлаар нь харвал төрийн ажил явдаг л хэлбэр.
Гэхдээ бид яг юу өрнөх гэж байгааг мэдэх юм. ТӨХК-иудын захирлуудыг солих нь ерөөсөө л саях МАН-ын хагарлыг илтгэж байгаа процесс. Дөрвөн жил гаруй засаглаж, МАН-ын дарга, генсекийг хийнгээ төрийн албаны томилгоог хоршин хийж явсан Л.Оюун-Эрдэнэ, Д.Амарбаясгалан нарын хүмүүсийг хөөх ажлын зөвхөн эхлэл энэ ээ. Тэд ч бас ах нарынхаа тавиулуудыг ингэж л чөлөөлж, өөрсдийн хүмүүсээ өрж тавьсан байдаг.
Өнгөрсөн хугацаанд Л.Оюун-Эрдэнэ, Д.Амарбаясгалан гэлтгүй Н.Учрал нэг гараараа ТӨХК-иудыг жаал муулж попордог ЗГХЭГ-ын дарга байж, нөгөө гараараа НАМЗХ тойрсон бүтэхгүй түүхтэй залуусаа ТӨХК-иуд, агентлагуудад тултал нь чихсэн юм. Түүний пи-арын зардлууд ч "Эрдэнэс Монгол" тэргүүтэй төрийн өмчит бүтцүүдээс гарч байлаа.
Н.Учрал одоо үргэлжлүүлээд Г.Занданшатартай хамтарсан томилгоог явуулна. Гэхдээ голлох чиглэл, баганыг төрийн тэргүүний инстутиц хийж явна гэсэн үг.
Гол нь, зүй зарчмаараа томилгоо явагдах, сонгон шалгаруулалт зарлах асуудлыг МАН-ын томчуудын хэн нь сөхөж ярихгүй яваа.
Яахав, МАН-ын даргын сонгуулийн өмнөхөн Худалдан авах хэлтэс дээр хамаг муу ажлыг хийж явсан залууг ЭТТ-н Гүйцэтгэх захирлаар түр томилсон асуудал шүүмжлэлд өртсөн. Тэгэхээр нь МАН-ын томууд ичихдээ сонгон шалгаруулалт зарласан. Гэсэн ч өнөөг хүртэл тэр сонгон шалгаруулалт нь яасныг зарлаагүй л байгаа юм.
Эдүгээ монголчуудын ид өвлийн аяллаар гадагшаа зорьдог, дотоодын компаниуд хэдэн аялагчид авдаг үеэр МИАТ ТӨХК-ийн захирлыг солих гэж байна. Өвлийн нислэгийн хамгийн оргил ачааллын үеэр шинэ захирал нь ирээд яаж манаргахыг, хичнээн ААН хөлдөө чирэхийг таашгүй. ААН-үүдийн энэ зовлон МАН-д хамаагүй. Өөрсдөд нь үнэнч үйлчилсэн хэдэн УИХ-ын гишүүндээ баахан томилгоо амлаад, түүнийгээ биелүүлэхэд л анхаарч байна.
Цаашид ч томилгоог энэ мэтээр ямар ч сонгон шалгаруулалтгүй явуулах нь МАН-ын томчуудын хүсэлд нийцэх юм. Аа, харин үүн дээр сөрөг хүчний хүчтэй дуу хоолой, олон нийтийн хяналт маш чухал.
Бидэнд хамаагүй юм шиг атлаа УИХ-ын гишүүд, сайд нарын сонгуулийн менежерүүд ТӨХК-иудын Гүйцэтгэх захирал, хүний нөөц, худалдан авах хэсгүүдэд томилогдож, аль сайнараа тонон дээрэмдсээр, сонгуулийн мөнгө босгох намын пирамидыг өрөлцдөг. Нэг ёсондоо бидний сонгох эрхэд нөлөөлөх гол мөнгөн схемийг эрх барьж байгаа нам ТӨХК-иудаасаа босгодог билээ.
Г.ИТГЭЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.