Засгаас явах сайд нар ХҮН намыг хөтлөөд гарна

Айсуй хаврын улс төрийн нюанс ямархуу байх нь хэдийн тодорхой болоод эхэлж. Нэгэнтээ ХҮН намын дарга Т.Доржханд хэвлэлүүдийн өмнө "ХҮН нам бол эрх баригч нам. МАН дангаараа эрх бариагүй шүү. Бид сөрөг хүчин биш. АН, Үндэсний эвсэл бол сөрөг хүчин" хэмээн хэлсэн удаа бий.

Л.Оюун-Эрдэнийн Засгийн газрыг огцрох үед буюу итгэл үзүүлэх санал хураахын өмнөхөн Т.Доржханд Төрийн ордны коридорт хамтарсан Засгийн газрыг авч үлдэхийн төлөөх үгсээ сандран уудалж зогссон тэр дүр төрх нь өнөөдөр Г.Занданшатарын танхимд тэсэн үлдсэний дараа түүний царайнаас замхран одсон байна.

Гэхдээ МАН дотор хүчтэй байр суурь эзэлж, өөрийн амбиц харизмаар одоогийн Засгийн газарт үргэлжлүүлэн ажиллаж байгаа Б.Дэлгэрсайхан, Б.Чойжилсүрэн нарын үдэлтийн дуу хадаж эхэлсэн энэ үед ХҮН намынхныг үлдээнэ гэдэг яг одоогийн засаг тэргүүлэгчид ерөөс бурангуй хэрэг болно.

Тэр тусмаа эрчим хүчний агуулга дээр Б.Чойжилсүрэнд 30 хоногийн хугацаа өгсөн атлаа Т.Доржхандыг хайрлан үлдээхийн учир шалтгаан бүр ч үгүй. Нэгэнт энэ салбарт юу ч хийж гийгүүлээгүйн дээр Л.Оюун-Эрдэнийг огцруулахгүй гэж эцсээ хүртэл зүтгэж гүйцсэн ХҮН намынхныг засгаасаа гаргах цаг нь ирсэн гэдэг мессежийг Ерөнхий сайд хэдэнтээ өглөө.

УИХ-ын гишүүн Ө.Шижир Б.Чойжилсүрэн, Т.Доржханд хоёрыг огцруулах санал гаргасан нь өнөөдөр Ерөнхий сайдад ХҮН намаас илүүтэй бусадтай нь хэл амаа ололцох нь амар болчихсныг харуулж буй. Ерөнхий сайд танхимаа бүрдүүлснийхээ араас зугуухан сэлгээ хийж, хаврын чуулган гэхэд өөрийн хүссэн танхимыг бүрдүүлэх сонирхол өндөр байгаа нь илт.

Нам дотор санал зөрчилдөөнтэй, хагарал хуваагдлын уур амьсгал байж болох ч Засаг дотор тийм байхыг авч үзэхгүй гэдэг хуучны, хашир зангаар үгэнд нь орж, үзэл санаа нэгдэж өгдөггүй, заргачаараа гаргууд Б.Дэлгэрсайхан, МАН-д хэрэгтэйг нь өгч, хэрэгтэйгээ бас авсаар ирсэн Б.Чойжилсүрэн хоёрын гараас Шадар сайдын нэрээр МАН-ын хагаралаас хамгийн их хонжоо хүртсэн Т.Доржханд, багш нарын цалинг нэмсэн нэрийдлээр засагт сайн нэрийг олох гэж муу нэрийг чирж яваа П.Наранбаяртай хөтлөлцүүлээд гаргах нь нэгэнт тодорхой харагдаж буй.

АН энэ хавар шинэчлэн батлагдсан дүрэм, дотоод сонгууль гээд бүтэц, институцын хувьд чангараад ирвэл эрх баригчдын хувьд мэдээж сөрөг хүчний чамгүй сорилтуудтай тулна.

Ийм үед сул сайдуудаараа Засгийн газрыг боорлуулж, санаа нийлэхгүй хүмүүсийнхээ араас чаргууцалдах сонирхолгүйгээ Г.Занданшатар шууд илэрхийлж байгаа хэрэг. Нөгөө талдаа улс төрд улиран, улирсаар яваагийн хувьд өнгөрсөн 2025 онд хагарал тэмцэл нь өндрийг авсан МАН-ын дотоод уур амьсгалаа багахан эерүүлэх хэлцлийн зай үлдээж, зарим явуулсан сайдуудынхаа оронд оруулж ирж ч мэдэх юм.

Хавар бүрэн эрх нь дэнжигнэж ядаж байгаа гишүүдийг удааж төдүүлэлгүй парламентын нэр хүндийг бодох эрхээ УИХ-ын дарга нь эдэлдэг, Засгийн газрын танхимаа ямар жингээр авч явахаа Ерөнхий сайд нь мэддэг байя гэх урьдач байр сууриар Н.Учрал, Г.Занданшатар хоёр гар барьсан нь мэдээж.

ХҮН нам МАН-д "үйлчилж" явснаас намын дотоод асуудал руугаа нэг өнгийх цаг нь ч ирсэн биз. Засагт хамтарч буйгаа "Бид ч бас эрх баригч" гэж тайлбаран цаасан малгай өмсөж явах нь үндсэндээ МАН-д л хожил болов.

Юу юугүй хавар боллоо. Инфляц, цалин, төсөв, эдийн засаг зэрэг суурь чухал агуулгуудаас хүлээх хүлээлт, тулах сорилтууд их бий. Үүний цаанаас айсуй сонгуулийн чимээ дуулдаж байхад явах, ирэх сайдууд ч яриагдаад эхэллээ.

Ард нь, парламентаас явах УИХ-ын гишүүдийн нэрс ч мөн дурайж л буй.

Т.БАТСҮРЭН

Сэтгэгдлээ илэрхийл

Share Tweet