Ц.Мөнхтуяагийн ёс зүйн асуудал анхных биш, сануулга нь анхных болов

Олон нийтийн сүлжээгээр ёс бус үг хэллэг ашиглаж, ёс зүйн доголдол гаргасан Ц.Мөнхтуяад АН-ын дарга О.Цогтгэрэл ёс зүйн асуудал дээрээ онцгой анхаарахыг сануулсан. Ц.Мөнхтуяа ч олон нийтийн сүлжээгээр байр сууриа илэрхийлэхдээ буруу үг хэрэглэж, хэм хэмжээнээс давсан үйлдэл гаргасандаа Ардчилсан намын гишүүд, дэмжигчид хийгээд олон нийтээс уучлалт хүссэн гэв.

Гэхдээ Ц.Мөнхтуяагийн сошиалд бархирч байгаа нь анхных биш, харин сануулга авч байгаа нь анхных болов.

Эргэн сануулахад, гишүүн болоод удаагүй буюу 2024 оны 12 сард мөн олон нийтийн сүлжээгээр багш нарын болон боловсролын сэдвээр хангалттай ярьж гүйлээ, одоо чадахгүй агсарч байлаа.

Энэ үеэрээ “Биеэ бодъё. Та нар намайг арай л төмөр хүн шиг явуулчихсан байна шүү, багш нар аа. Долоо, найман жил ямар ч амралтгүй, бөөн стресс дундуур явлаа. Би хорин хэд, гучин хэдтэй залуу биш шүү дээ. Эмнэлэгт хэвтэхээр энэ муу ямбалаад УИХ-ын гишүүн болоод ингэж байна гэж битгий над руу дайрч, давшлаарай. Боловсролын салбарт тулгамдаж байгаа асуудлаа л ярьдаг. Хүмүүс шиг мундаг хүн болох гээд юм юм руу орж хөөгөөд байдаг хүн биш. Чадах ч үгүй угаасаа. Хууль, эдийн засаг руу савчиж үсрэхгүй” гэсэн.

Мөн төдийгөөс өдий хүртэл түүнээс холдоогүй сэдэв бол дөрвөн өнчин хүүхэд бүхий айлд хандив цуглуулж, байртай болгосон агуулга. "Дургүй хүргээд байвал хөөж гаргасан ч болно", "Миний мууг үзэж яваад зарим нь шоронд, зарим нь шороонд булагдсан даа хөөрхий" хэмээн заналхийлсэн байдаг. Ингэж хоёр жил гаруй гүрийж, хандиваар боссон байрыг өөр хүний нэр дээр байлгасан. Улмаар олон сошиал хэрүүлийн дараа дөрвөн өнчин хүүхдэд байрыг нь шилжүүлэн өгсөн байдаг.

Үүнээс гадна харааны бэрхшээлтэй иргэнийг хэл амаар доромжилсон бичлэг ч цацагдаж байсан билээ.

Түүний хувьд "хуурамч" үйлдвэрчний эвлэлийн нэр барьж, АН-ын жагсаалтад багтаж УИХ-д суусан гэгдэж байсан. Улмаар намынхан нь эргүүлэн татахыг шаардаж байсан ч одоог хүртэл суудалдаа буй.

Г.МИШЭЭЛ

Сэтгэгдлээ илэрхийл

Share Tweet