Шилийн голоос ирсэн наадамчид: Төв цэнгэлдэхэд "Хонгор нутаг"-ийг хамтдаа дуулахыг ерөөе

Төв Азийн цээжин дэх Монгол Улсын төв талбай өчигдөр олны хөлд дарагдаж, зүг зүгийн монголчуудын зүрх сэтгэлд ойр өнжлөө. 20 жилийн 1000 орчим оролцогчтой эхэлж байсан "Дээлтэй Монгол" наадам өдгөө дэлхийн монгол туургатнуудын хүсэн хүлээдэг баяр болжээ.

Тухайлбал, ӨМӨЗО-ны нутаг, хошуу бүрээс төлөөлөл зорин ирсэн байна. Эрдэнэбаяр, Сарантод хэмээх Шилийн гол аймгийн Зүүн үзэмчин хошуунаас ирсэн найзуудтай цөөн хором хөөрөлдлөө. Тэд Монгол Улсад анх удаа ирж үзэж байгаа бөгөөд монгол наадмыг ч анхлан дэргэдээс нь үзэж сонирхож буй. Хэлсэн үг бүрээ "үнэхээр сайхан, догдлом" хэмээх тодотгох нь сэтгэл нь баяр бахдалаар дүүрэн байгааг илэрхийлэх мэт.

-Сайн байцгаана уу. Та бүхэн аль нутаг хошуунаас зорин ирэв?

-Намайг Эрдэнэбаяр, миний найзыг Сарантод гэдэг. ӨМӨЗО-ны Шилийн гол аймгийн Зүүн үзэмчин хошуугаар нутагтай. Анх удаа Монгол Улсад ирээд сэтгэл их хөдөлж байна. "Дээлтэй Монгол наадам"-д бас анх удаагаа оролцож байгаа.

- Та бүхний бодлоор "Дээлтэй Монгол наадам"-ын онцлог нь юу вэ?

-Бүх монголчууд, үндэстэн ястнууд өөр өөрсдийн хувцас зүүсгэлээрээ гоён нэг дор цугларахыг харах сайхан байна. Газар газрын монголчууд цугласан ийм олуулаа хуран цугласан байгаа нь үнэхээр гоё юм. Бид ч бас үзэмчин хаваастай дээл, цамцаа өмсөөд ирсэн. Үзэмчин дээл олон янз. Зундаа цамц, хавар намартаа хаваастай дээл өмсөх нь элбэг.

-Монгол Улсад анх удаа ирлээ гэж байна. Сэтгэгдлээсээ хуваалцал?

-Үгээр тайлбарлахын аргагүй үнэхээр сайхан. Өөрийн эрхгүй догдлоод л байна. Хоёр хөдөөгүүр яваад ирсэн. Зайсан толгой гарч, Тэрэлж орж, Чингис хааны морьт хөшөө үзсэн. Монголд Улсын байгаль онгон дагшнаараа, ариун санагдаж байна. Дөнгөж хотын зах руу гарахад л гол горхи урсаад л. Туул гол их сайхан.

-Хэр удах төлөвлөгөөтэй байна?

-Наадам өнгөрөөд буцна. Монгол наадмыг анх удаа үзэж байгаа болохоор үзэх, сонирхох боломжтой бүхий л зүйлийг үзэж, амжуулах санаатай.

-Өвөрмонголд бөхчүүд их очиж барилддаг шүү дээ. Тэгэхээр бөх муугүй мэдэх байх. Энэ наадамд хэнийг түрүүлнэ гэж бодож байна?

-Бөх үздэг. Монгол бөхчүүд маань бүгдээрээ сайн барилдаасай гэж хүсэж байна. Энэ жил Баянхонгороос аварга төрчих болов уу гэж харж байна. Улсын арслан Э.Батмагнайг дэмждэг. Дайчин, мэдрэмжтэй, уран барилдаантай бөх. Төв цэнгэлдэхэд "Хонгор нутаг" дуугаа хамтдаа дуулахыг ерөөе. Мөн Б.Орхонбаяр арсланг бас дээгүүр барилдах болов уу гэж бодож байна.

Тэд ийн яриад өнгөрсөн жилийн Төрийн наадмын түрүү бөх Э.Батмагнайгийн төрсөн нутаг Баянхонгор аймгийн "сүлд дуу" болох "Хонгор нутаг"-ийг дуулав.

Видео:

Д.ХАДААН

Өөрийн сэтгэгдлээ илэрхийл

Share Tweet