Архангай аймгаас хилийн цэргийн 0101-р ангид хугацаат цэргийн алба хаагчаар татагдсан ахлах байлдагч Б.Хүслэнтэй цөөн хором ярилцлаа. Ердөө гурван сарын өмнө аав ээжийн хүү байсан Б.Хүслэн өдгөө умард хязгаарын хилчин болж эх орныхоо дархан хилээ манаж харуулд гарч байхад нь бид таарсан юм.
Видео:
-Цэргийн албанд ирэх болсон тухай яриагаа эхэлье?
-Өөрийн хүсэлтээр ирсэн. Цэргийн тухай янз бүрийн л зүйл яригддаг. Гэвч олон аавын хөвгүүд яваад ирдэг алба. Яагаад болохгүй гэж бодоод зориглосон. Тэр тусмаа хилийн цэрэг учраас бүх дурлаж ирсэн.
-Ирээд хоёр сар гаруй болж байгаа гэж сонссон. Цэргийн амьдралд хэр дасахаар байна. Мэдээж "ард" амьдралаас олон зүйлээрээ өөр байгаа байх?
-Цэрэгт татагдаж ирэхээсээ өмнө аав ээжийнхээ өмнөөс хэдэрлэх үйлдэл гаргадаг байсан. Байлдагч болоод олон аавын хөвгүүдтэй мөр зэрэгцээд дархан хилийн манаанд явж, цэргийн амьдралаар амьдарч эхлээд тухайн үеийн өөрийнхөө бурууг ойлгодог юм байна.
-Хилийн манаанд гараад дархан хилийн сүлдэд баганын зүг дуран тавиад зогсох тохиол хүн болгонд олдоод байхгүй. Эх орныхоо хилийг ширтээд, амар амгалан буйг харах ямар мэдрэмж байдаг бол?
-Хамгийн түрүүнд Монгол хүн болж төрсөнөөрөө бахархана. Ийм сайхан газар нутаг, эрх чөлөө, амьсгалах агаар буйд баярлана. Аавыгаа их боддог юм байна. Залуу насандаа яг надтай адил цэргийн алба хааж байсан байхдаа гэж.
-Эрчүүдийн нөхөрлөл, зөв хүн болж төлөвших, эрүүл чийрэг гэх мэт маш олон зүйлийг цэргийн алба өгдөг гэж ойлгодог. Та хэр санал нийлэх вэ?
-Санал нийлэлгүй яах вэ. Ирээд удаагүй ч бид нар аль хэдийн сайхан нөхөрлөлийн түүхийг бичээд эхэлсэн. Цаашдаа улам л дотно болно гэдэгт эргэлзэхгүй байгаа. Цэргийн алба хувь хүнд маш олон зүйлийг суулгаж өгдөг юм шиг ээ. Цэрэгт ирсэндээ үргэлж талархах байх.
Б.АЗЖАРГАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.