НИЙГЭМ

АНУ-д байгаа монгол иргэд тусгай үүргийн нислэгээр ирэх хүсэлт гаргажээ

АНУ-д түр хугацаагаар очсон монголчууд Монгол Улсын Засгийн газар, Улсын онцгой комисс, АНУ-д суугаа ЭСЯ-нд хүсэлт гаргаж, тусгай үүргийн нислэгээр эх орондоо ирэх хүсэлтэйгээ илэрхийлжээ. Тус хүсэлтийг бүрэн эхээр нь хүргэе.

Та бүхний энэ өдрийн амгаланг эрье!

Ард түмнийхээ эрүүл энхийн төлөө нойр хоолгүй зүтгэж амжилттай сайн ажиллаж байгаа салбар салбарын шилдэг мэргэжилтэн хамт олноороо бид маш их бахархаж байгаа билээ.

АНУ-д сурч, ажиллаж, аялж байгаад Ковид-19 вирусээс үүдэлтэй хөл хорионы улмаас Монгол Улсын маань хил хаагдсан учир буцаж чадахгүй хүнд байдалд ороод байгаа 300 орчим иргэн, үүнд нялх хүүхэдтэй, өндөр настай, бие муутай, жирэмсэн гэх мэт эх орондоо яаралтай буцах шаардлагатай иргэд нэгдэж энэхүү хүсэлтийг хүргүүлж байгааг хүлээн авна уу.

Монгол улсын хилийн хорио нийт 3 удаа сунгагдсан мөн цаашид дахин сунгагдах магадлалтай байгаа энэ цаг мөчид өртөг өндөртэй АНУ-д хорионд байгаа иргэд дараах шалтгаануудын улмаас эх орон, төр засагтаа хандаж байна.

Үүнд:

-Эрүүл мэндийн даатгал: Ихэнх хүмүүст байхгүй. Ямар ч эмнэлэг даатгалгүй хүнийг хүлээж авдаггүй. Өвчин тусвал ямар нэгэн аврал байхгүй гэсэн үг.

-Визний хугацаа: Ихэнх хүмүүсийн АНУ-ын хилээр ороход дарагдсан хугацаа дуусаж байна. Энэ тохиолдолд 455 ам.доллараар сунгуулахаар байгаа. Хүмүүс эхнээсээ хоол, байрны мөнгөгүй болж байгаа тул энэ мөнгийг төлж дийлэхгүй.

-Сэтгэл санаа: Бүх хүмүүс мөнгө санхүүгийн хүнд байдалд байгаа тул арай ядан өдөр хоногийг өнгөрөөж, Ази гэдгээрээ гадуурхагдан сэтгэл санаагаар унаж, шаналсан байдалтай байна.

Одоогоор өөр ямар ч улс руу явах боломжгүй болсон байх шиг байна. Мөн Улсын онцгой комиссын хурал зэрэгт АНУ-д түр зорчиж байгаад хорионд орсон иргэдийн талаар огт яригдахгүй байгаад гайхаж байна. Бид ийм хэцүү нөхцөл байдалд байгаа тул яах аргагүй төр засагтаа хандаж байгааг минь хүлээн авна уу.

Иймд нэрс хавсаргасан иргэдийг тусгай үүргийн онгоц гаргаж БНСУ-ын гэх мэт боломжтой онгоцны буудлаар дамжуулан эх оронд минь яаралтай буцааж өгнө үү.

Та бүхний ажилд өндөр амжилт хүсье.

Хүсэлт гаргасан: АНУ-д түр зорчиж буй Монгол иргэд 2020-03-20

Энэ мэдээнд таны өгөх үнэлгээ
Like
Love
Haha
Wow
Sad
Angry

Холбоотой мэдээ

Back to top button