Жагсаалын явц: Иргэд шаардлагын үгээ урт даавуун дээр бичиж, Төрийн ордныг гороолж байна

Төв талбай дахь иргэдийн жагсаал тав дахь өдрөө үргэлжилж байна.

Нэмэлт: 17:10 цаг

Иргэдийн жагсаал үргэлжилж байна. Х.Нямбаатар сайд гарч ирэн, жагсагчидтай уулзсаны дараа Төв талбай дээр тайз засахаар болсон. Тайзан дээр иргэд нэг, нэгээрээ гарч ирэн, үзэл бодол, байр сууриа илэрхийлнэ. Харин одоогоор тайз хоосон, жагсагчид Төрийн ордныг тойрон "Нэрсээ зарла" хэмээж байна.

Шаардлагын үгээ тэд урт цагаан даавуун дээр бичиж, хамтдаа барьжээ.

ШУУД ДАМЖУУЛАЛТ:

Нэмэлт: 14.35 цаг

Х.Нямбаатар: Жижиг Тавантолгойн сүүлийн 10 жилийн тайланг дэлгэе

Нүүрсний хулгайг эсэргүүцсэн залуус тав дэх өдрөө төв талбай дээр жагсаж байна. Уг жагсаалын үеэр ХЗДХЯ-ны сайд Х.Нямбаатар гарч ирж жагсагчдад мэдээлэл өгч байна.

Тэрбээр “Би гуравхан мэдээлэл хийх гэж гарч ирлээ. Нэгдүгээрт, урд шөнө АТГ, ЦЕГ мөрдөн шалгах ажиллагаа явуулж Б.Ганхуяг нарын найман хүнийг хорьсон. АТГ нэр бүхий 11 хүнийг шалгаж байна. Мөрдөн шалгах ажиллагааг үргэлжлүүлэхээр Дундговь өнгөрөөд явж байна.

Ямар хүмүүс байгаа вэ гэхээр 2009 оноос хойш хэчнээн хэмжээний уулын цулыг олборлосон юм бэ гэдгийг хэмжих маркшейдерүүд явсан. Мөн хил гаалийн байгууллагууд явсан. ГЕГ-аас хилээр гарсан нүүрстэй холбоотой дүнгүүдийн мэдээллийг мөрдөн байцаах газар шилжүүлсэн. Энд нийтдээ дөрвөн удаагийн 3000 гаруй ААН-ын гаальд бүртгэлгүй гарсан машинуудыг бүртгэлийг нь хийсэн. Уг хэрэг сэргэгдэж 22 дахь эрүүгийн хэрэг үүсэж байна. Том жижиг Таван толгойн сүүлийн 10 жилийн тайланг өнөөдөр дэлгэе" гэв.

Үргэлжлүүлээд жүжигчин У.Цогтбаяр "Х.Нямбаатар сайд аа. Энд байгаа хүмүүс нэгдмэл болсон. Төрийн өндөрлөгүүд энэ хэрэгт холбоогүй гэдгээ нотол гэсэн боловч нэг нь ч гарч ирсэнгүй.

Харин жагсагчдын зүгээс "Хөндлөнгийн шалгалт оруулъя" хэмээн шаардав. Удахгүй төв талбай дээр иргэдэд байр сууриа илэрхийлэхэд нь зориулж тайз засахаар болоод байна.

Эхлэл: 12.00 цаг

У.Цогтбаяр: Миний хүүхдүүдийн ширхэг үсийг оролдвол байхгүй болтол тэмцэнэ

Нүүрсний хулгайг эсэргүүцсэн залуус тав дэх өдрөө төв талбай дээр жагсаж байна. Тэгвэл жагсаалд гарч ирж жагсаад байгаа жүжигчин У.Цогтбаярын гэрийн гадаа өчигдөр хар машинтай хүмүүс шөнөжин гэрийн гадаа хонож сайн амарж чадаагүй гэдгээ мэдэгдсэн.

Тэгвэл уг асуудалтай холбоотойгоор “Хар машин, цагаан машин хоёр манай гэрийн гадаа хоносон. Өглөө бичлэг хийгээд постолход л алга болсон. Жижгээ ахын гэрийн гадуур хар хувцастай хүмүүс пэр хийгээд гүйсэн гэж байна. Би яасан юм бэ. Яагаад намайг тагнаад байгаа юм бэ. Намайг мөнгө авсан гэвэл миний дансыг бүгдийг шалга. Надад бэлнээр мөнгө өгөх гэж оролдох байх. Би авч байгаад гоё эгзэгтэй үед гаргаж ирнэ" гэлээ. Үргэлжлүүлээд сэтгүүлчдийн асуултад хариуллаа.

-Та СӨХ-ийнхөө коридорын бичлэгийг авч харсан уу?

-СӨХ-өөсөө авна. Сая сэрээд хүүхдүүдээ хүргээд наашаа ирлээ. СӨХ-өөсөө хүсье. Бичлэг нь гурав хоног хадгалах байх. Намайг тагнаад байна. Ямар учиртай юм бэ.

-Сая Х.Нямбаатар мэдээлэл хийлээ та сонссон уу?

-Сонслоо. Ээлжит жүжиг шүү дээ. Жижигхэн жараахайнуудаараа туг тахиж байна. 40 их наядад төрийн удирдлагууд юу ч аваагүй гэсэн үг юм уу. Шударга ёсны төлөө тэмцэнэ. Сүүлийн 30 жилд сонгуульд орооцолдоогүй эрдэмтэн мэргэдээ гаргаж ирье. Дандаа Улаанбаатарын бугшсан лалрууд 21 аймагт очиж заваан юм хийж байна. Үүнийг уг үндсээр нь солихгүй бол болохгүй. Хамгийн аймар нь сайн хүмүүс нүдээ аниад өнгөрч байна.

-Ажлын хэсэгт 100 хүнийг оруулна гэсэн шүү дээ?

-Энэ 100 хүнийг ярихаас өмнө хулгайчаа л тод болгоё. 100 хүнээ аваад ороход намайг Hollywood-эд гаргаж өгнө гээд хуурчихвал яах вэ. тийм учраас орохгүй, зөвшилцөхгүй.

-Гэрийн тань гадаа хүн ирээд сахиад байхаар айж байна уу?

-Ойр дотнын хүмүүс болгоомжтой байгаарай гээд айлгаж байна. Гэхдээ айлаа гээд яах вэ. Миний гэр бүл, үр хүүхдийн ширхэг үсээр нь оролдох л юм бол байхгүй болтол тэмцэнэ.

Энэ мэдээнд өгөх таны үнэлгээ

Хуваалцаарай Жиргээрэй