НООЛУУРын эрин үе | уламжлалаас МИНИМАЛИЗМ руу

Дотоодын ноолуурын өрсөлдөөнт зах зээлээс дэлхийн хувцас загварын илүү том орон зай руу Монголоос хөл тавьсан цөөн брэндүүдийн нэг бол ANNA CASHMERE

2018 онд Ulemj Cashmere компаниас салбарлан анх үүсгэн байгуулагдсан бөгөөд ноолууран хувцасны энгийн хэв маягийг эвдэж, загварын чиг хандлагыг илүү орчин үеийн хэрэглэгчдийн зах зээл рүү ойртуулжээ.

2025 оны Лондонгийн загварын долоо хоногт Монголоос төлөөлөн оролцож, дэлхийн 250 гаруй дизайнер болон 20 мянга орчим оролцогч, зочдын дунд ANNA CASHMERE брэндийн коллекц танилцуулагдсан юм. Энд дэлхийн өнцөг булан бүрээс өөрсдийн загварын өвөрмөц өнгө төрхийг харуулахаар ирсэн дизайнеруудын дуу хоолойг тодруулдгаараа энэхүү загварын долоо хоног дэлхийн загварынхны анхаарлыг татдаг.

Хувцас загварын ирээдүйн чиг хандлагыг тодорхойлох, зоримог, шинэ авъяастнуудын эрин үеийг зарлах гарааны талбар эндээс тавигддаг гэж ойлгож болно. Өөрөөр хэлбэл Лондонгийн загварын долоо хоногийн UNFOLD Collective шоугаар дизайнерууд өөрсдийгөө ТУНХАГЛАДАГ.

Уг шоунд Хятад, Косово, Турк, Тайвань, Монгол зэрэг олон улс орны төдийгүй Лондонгийн төрөл бүрийн өвөрмөц хэв маягтай дизайнеруудыг нэг тайзнаа гаргаж, тэд коллекцуудаараа дамжуулан уламжлал, инновац, өгүүлэмж, гоо зүйн илэрхийлэл хийгээд загварын орчин үеийн чиг хандлагыг харуулсан юм.

Жил ирэх бүр дэлхий даяар тэлсээр буй ноолууран хувцасны зах зээлд хөлөө олохын тулд ирээдүйд загвар дизайн, чанар, брэндийн үзэл санаа гээд олон зүйлүүд нэг цэг дээр огтлолцож байж, сая нэг хэрэглэгчдийн сонголтод шигшигдэнэ.

QUIET LUXURY буюу ДАРУУ ТАНСАГЛАЛ

Дэлхийн алдартай, тансаг зэрэглэлийн брэндүүд нь сүүлийн жилүүдэд илүү даруу, минималь болсоор байгааг Парис, Лондон, Нью-Йоркийн загварын долоо хоногууд болон шинээр төрөн гарч буй дизайнеруудын коллекцуудаас харж болно. Тансаг хэрэглээний чиг хандлагууд хүчтэй болохын хэрээр байгальд ээлтэй, удаан эдэлгээтэй, өнгө загварын хувьд ч илүү даруу болсоор буй. Үүнд гойд зохих нь мэдээж ноолууран бүтээгдэхүүн юм.

Гарал үүсэл нь баталгаатай, тансаг зэрэглэлийн болоод өдөр тутмын энгийн хэрэглээнд ч нийцэж болдог юниверсал байдал нь ойрын ирээдүйд ч ноолууран хувцас, эдлэлийн зах зээлийг илүү өргөжүүлэх нь дамжиггүй.

Энэхүү илүү даруу бөгөөд тансаг хэрэглээг загварын ертөнцөд дизайнерын ур чадвараар нэвтрүүлэх боломжийг Anna Cashmere мэдэрч, 2021-2022 оны намар-өвлийн Ultra Luxury коллекцоо танилцуулж байв. Ноолууран хувцсыг илүү загварлаг, чанартай, минимал байдлаар загварчилж, улмаар Дубай, Хонгконг, Бээжин, БНСУ зэргээр зах зээлээ тэлж, өдгөө Их Британийн Лондон хотноо европын хэрэглэгчдийн гарч очиж эхэлсэн. Хэрэглэгчдийг татаж буй хамгийн гол зүйл нь тогтвортой, малчны гараас эцсийн бүтээгдэхүүн хүртэлх гарал үүсэл нь баталгаатай гэдгээрээ ноолуурын үнэ цэн улам нэмэгддэг.

Anna Cashmere жил бүрийн намар-өвөл, хавар-зуны коллекцийнхоо хэв маяг, дизайныг илүү чансаа ахиулж, урлагийн жижиг элементүүдийг тусгаад зогсохгүй Монголын ноолууран хувцасны нийтлэг өнгө төрхийг эвдэж, дэлхийн ноолууран хувцасны зах зээл дээрх гол тоглогчдын дэргэд ч ялгарахуйц болсныг TIGER, WINTER GLAM зэрэг коллекцуудаас нь харах боломжтой.

Sustainability. Elegance. Timelessness.

XX зуунд орчин үеийн урлагийн дараа хүчтэй яригдаж, ялангуяа 1970-аад онд Америкийн визуал урлагт минимализм илүү хүчтэй тунхаглагдан гарч ирсэн. Минимал буюу латинаар бол хамгийн жижиг, жижигхэн гэх утгаар хэлэгддэг ч яг үндсэндээ Японы Зэн философийн дагуух чиг хандлагыг баримтлан хөгжиж ирсэн урлаг юм. Архитекторуудын хувьд минимал гэдэг бол бүтцийг илүү хялбар болгох, цөөн өнгийг л ашиглах тухай, элдэв зүйлсээс бүхэлдээ ангижрах тухай ойлголт.

Харин хувцас загварт минимализм нь дизайны элементүүдийг илүү зөв зохистойгоор тусгах, өнгө, материалын хувьд ч илүү энгийн мөртлөө шинэлэг, бүтээлч байдлаар бууж ирсэн байдаг.

Нэг талдаа хэрэглээний зах зээлийн галзуурал, загварын ертөнцийн хэт ойлгомжгүй, элементүүдийн тэгш бус харьцаа, эрээвэр хураавар чимэглэл, орчин үеийн гэгдэх атлаа хэрэглээнд буумгүй байдал минимализмаас эрс хол.

Нэг ёсондоо илүү даруу байдал нь тансаг хэрэглээнд зохирч, илүүгээс татгалзах гэхдээ мөн чанарыг үлдээх тухай урлагийн философи юм.

Иймээс орчин үед хувцас загварт тогтвортой хэрэглээ, тансаг дэгжин бөгөөд цаг хугацааны явцад үнэ цэн нь алдагдахгүй байх гэдэг цензур байсаар буй. Энэ ойлголтуудыг брэндүүд нэг цэгт огтлолцуулах нь өөрөө нарийн төвөгтэй. Харин ноолууран хувцасны үйлдвэрлэл нь өөрөө хэдий олон шат дамжлага болон зах зээлийн эрсдэл, түүхий эдийн нийлүүлэлт гээд сорилтуудтай тулгардаг ч ANNA CASHMERE 2018 оноос хойш фэйшн дизайн болон чанарын хөгжүүлэлтүүд хийсээр буй.

Тэд хэдхэн хоногийн өмнө Их Британийн нийслэл Лондон хотноо “Raffles London at the OWO” зочид буудлын урилгаар VIP загварын шоу зохион байгуулж, шинэ коллекцоо танилцуулсан нь загварын ертөнцийнхний төдийгүй хэрэглэгчдийн хувьд соньхон байлаа.

ANNA CASHMERE-ийг Лондонгийн загварын долоо хоногийн тайзнаа гарах үеэр, гадны хэвлэлд "Италиас олон тансаг зэрэглэлийн брэндүүд гар үйлдвэрлэлээрээ ялгарч гарч ирсэн шиг энэхүү Монголын ноолуурын брэндэд ч мөн өөрийн гэсэн онцгой давуу тал байна" хэмээн тэмдэглэснийг эргэн санав. Улам бүр байгаль дэлхий рүүгээ, илүү тухтай минимал эрин үе рүү тэмүүлж буй энэ цаг үед монгол ноолуур энэхүү хүсэл зорилготой соёл, мэдрэмжээрээ гойд давхцах буй за.

Тэдний энэ намар-өвлийн коллекц, дизайнерын тансаг хэв загварыг амьсгаа даран хүлээе.

Албан ёсны сайтаар нь зочлохыг хүсвэл ЭНД дарна уу

Ц.ТАМИР

Өөрийн сэтгэгдлээ илэрхийл

Share Tweet