ТОЙМ: Ард түмний СЭРЭЛТ ба таван албан тушаалтанг БУУЛГАСАН жагсаал

- ХЭВЛЭЛИЙН ХҮЧ БА АЯНДАА ҮҮССЭН ЖАГСААЛ-

Амаржаад удаагүй байгаа эмэгтэйг гэрийн халад, углааштай гарган, хүйтэн автомашинд чихэн давхиж очоод, ХӨСҮТ-ийн гадна дөрвөн давхрын шатаар хэнэг ч үгүй алхуулсан үйл явцыг хэвлэл сурвалжлаагүй бол өчигдрийн жагсаал болохгүй байв. Мэдээ авахаар очсон ЕАGLE телевизийн зураглаач, сэтгүүлчийг албаныхан зураг авхуулахгүй гэж анхандаа хориглосон байдаг. Гэвч сурвалжлах орчноо албаныхнаар заалгах дургүй, хэрсүү зураглаач сэтгүүлчид холоос тэрхүү олон нийтийг цочролд оруулсан дүрсийг бичжээ.

Мэдээ цацагдсан даруйд олон нийтийн цахим хуудсанд гэрийн халад, углааштай нялх биетэй эмэгтэйн зураг хөвөрч, шөнөжин бужигнав. Улмаар өглөө нь сайн дураар Төв талбайд жагсаал үүслээ. Энэ жагсаал нийгмийн уур амьсгал ер нь тэсэрч дэлбэрэхэд бэлэн байгааг эрх баригчдад сануулсан, ард түмний томоохон сэрэлт байв. Хоёр дараалан сонгуульд ялж, сүүлээ сэрвээн дээр шидчихээд харайж яваа МАН-ыг эл жагсаал жинхэнэ утгаар нь тас шилбүүрдлээ. Нөгөө талаар Монголд чөлөөт хэвлэл, мэргэжилдээ хайртай сэтгүүлч, сэтгүүл зүйн нөлөөлөл өндөр байгааг уг үйл явдлын кэйс илтгэлээ.

-ДАЙНЫ ХАЖУУГАААР ДАЖИН-

Төв талбайд болсон жагсаал хуулийн нэршлийнхээ хувьд ч яах аргагүй аяндаа үүссэн. Бүх зүйлийг олонхын хүчээр шийдэж, нүүр хуудсандаа лайв хийсэн иргэнээ хүртэл Зөрчлийн хуулиар шийтгэж буйн эсрэг ард түмэн хүчтэй зогсож чадна гэдгээ харуулав. Нялх биетэй эмэгтэйг туйлаас хүндэтгэж, асарч ирсэн уламжлалт дорно сэтгэлгээ ч үүнд ихээхэн нөлөө үзүүллээ. Яг зорьж ирээд жагсаалд оролцсон иргэдийн хүч чухамдаа асар өндөр тусдаг аж.

Гэвч нөгөө талд нийгэмд бүүм үүсгэж сэдвүүд дээр тоглолт хийж, тодрох гэсэн сайн дурын уран сайханчид хэдэн арваараа гарч ирэв. Тухайлахад, Б.Жагар “Оросуудын нөлөөгөөр жагсаал хийж байна” гэхчлэн хашгирч орж ирэх жишээтэй. Үхсэн амьд нь огт мэдэгддэггүй, энэ цагийн супер муу сөрөг хүчний дарга Д.Ганбат бараг л талбай дээр бүлгийнхээ хурлыг хэд хэд хийхээ шахав. Ерөөс энэ тэнд орилж хашгирч тодрох дуртай бүхэн өчигдөр талбай дээр ирлээ. Басхүү олны танил, нөлөөлөгч залуус ирж дуу хоолойгоо хүргэсэн нь энэ цагийн хүчтэй салхийг эрхгүй сэвэлзүүлэв.

-ЕР БУСЫН ҮЗЭГДЛҮҮД БА ЖИРЭМСЭН ЭМЭГТЭЙ НҮЦГЭЛЭВ-

Гол нь жагсагчдад дарга гэж байсангүй. Тал талаасаа олон арваараа цугларсан хүмүүс ерөнхийдөө нэлээд эмх цэгцтэй, хүн хоорондын зай барьж жагсаалаа эхлүүлсэн. Жагсаалд гэрийн халадтай хэд хэдэн эмэгтэй зогсож, “Я.Содбаатар, Т.Мөнхсайхан нарыг огцортол гадуур хувцас өмсөхгүй” гэж мэдэгдсэн юм. Улс төржүүлж, муухайгаар харахад энэ турхирагдсан өнцөг байж болох.

Гэвчиг эмэгтэйчүүд нь өнөөдөр ингэж жагстал ард түмний тэвчээр алдарчээ гэдэг мессеж уншигдана. Түүгээр зогсохгүй ирэх тавдугаар сард төрөх жирэмсэн эмэгтэй шууд Сүхбаатарын хөшөөний яг өмнө хувцсаа тайлж, хөл нүцгэн эсэргүүцэл илэрхийлэв. Идэр есийн хүйтнээр эмэгтэйчүүдийн ийм дуу хоолой нийгэмд хүчтэй цуурайтлаа. Жагсаал сүүлдээ илтэд тоноглогдож, олон өлгийтэй хүүхэд, цаасан урианууд зэргээр баяжигдсан нь эрхгүй хөөргөсөн улс төрийн өнцөг орж ирснийг илтгэнэ.

-ЖАГСААЛЫН ҮЕЭР ЗАСГААР ТОМИЛГОО ХЭЛЭЛЦЭЖ, УИХ МУЗЕЙН АСУУДЛААР ХУРАЛДАВ-

Ордны гадаа жирэмсэн эмэгтэй нүцгэлж, гэрийн халадтай эмэгтэйчүүд бухимдлаа илэрхийлж, жагсаал улам бүр хүчээ авч байхад Засгийн газар энгийн журмаар л хуралдав. Бүр хэд хэдэн томилгоог зүгээр л хийчхэж байгаа юм. УИХ-ын чуулганы нэгдсэн хуралдаанаар музейн асуудал хэлэлцэв. Яг долдугаар сарын 1-ний жагсаалын үеэр Үндэсний телевиз концерт явуулсан шиг эсрэг тэсрэг үзэгдэл давтагдлаа.

Энэ нь энгийн нэг үзэгдэл биш. Ард түмний амьдралаас асар их тасарчихсан улс төрчидтэй, төрийн ордонтой улс болон бэхжиж буйг харуулсан кэйс юм. Түүнчлэн нийгмийн ийм эмзэг үзэгдлүүдийн эсрэг дуугарах ёстой МАН-ын эмэгтэй гишүүд намаа сошиал дээр өмөөрөөд сууж байсан нь жинхэнэ гамшиг. Тэдний дэргэд АН-ын С.Одонтуяа гишүүн гадаадад гацсан иргэдийн асуудлаар суулт хийж байгаа нь машид том ялгааг харуулна. Улстөрчид нь ийм байгаа учраас л ард түмний хүлцэх, тэвчих мэдрэмж бүр нэг алдагдахад хүрсэн гэлтэй.

ХӨШИГНИЙ АРД: ХАРИУЦЛАГА ХҮЛЭЭХЭЭС ДАРГА САЙД НАР БУЛТАЖ, ЦАГ АВСААР ОРОЙ ШИЙДВЭРЭЭ ЗАРЛАВ

Үдээс өмнөх жагсаалын нүргээнд эрх баригчид төдийлөн ажраагүй. Гэвч байдалд хурцдаад ирэнгүүт хариуцлага тооцох асуудлаа яаралтай шийдэх хэрэгтэй болсон. Салбартаа удаан ажиллачихсан, сайдаа ч хүн гэж тоодоггүй Л.Төмөрбаатарыг хотын дарга нь чөлөөлөхөөс татгалзаж, Шадар сайд Я.Содбаатар ажлаа өгөхгүй гэж дуугарсан гэх мэдээлэл бий. Мэдээж, ХӨСҮТ-ийн дарга Д.Нямхүү ажлаа өгөхгүй гэж л гүрийдэг хүн.

Эхэндээ Л.Төмөрбаатар, Д.Нямхүү, Г.Баясгалан нарыг чөлөөлөх хувилбар дээр тогтоод байв. Гэвч нөхцөл байдал бүр эвгүйтэж, талбайн уур амьсгал хурцдаад ирэнгүүт Ерөнхий сайд арга буюу Я.Содбаатар, Т.Мөнхсайхан нарыг ажлаа өгөх чиглэл өгсөн гэх. Ингэснээр хоёр сайд, гурван том дарга хариуцлага хүлээж, ажлаа өгөхөөр болов. Тэсгэм өвлийн хүйтнээр ард түмний “ориг” дуу хоолой ингэж Төрийн ордныг ниргэв. Тэд сайд нар огцрохоо мэдэгдсэн хойно халуун уур савсуулсаар гэр гэртээ харьцгаалаа.

СЭТГҮҮЛЧИЙН ТЭМДЭГЛЭЛ: Ажлаа бүр нэг ял мэт хийж гүйцэтгэдэг, авдаг цалин нь гэрт нь талх болж очдогийг мартчихсан төрийн албанд ажиллаж буй хүмүүс асар их. Тэдний супер төлөөлөл нь, үнэндээ Я.Содбаатар, Т.Мөнхсайхан нар гэхээсээ илүү амаржсан эхийг гаргаж өгсөн эмч, сувилагчид, тусгаарлах ажилтнууд байлаа. Нөгөө талд ийм байдлыг хэрхэн даван туулах арга замыг Д.Сарангэрэл, Ө.Энхтүвшин нар боловсруулсан байсан уу гэдэг асуудал. Тэд дотооддоо ковид алдаагүй нь үнэн ч наад захын ийм төрлийн эрсдэлийг даван туулах арга зүйн бэлтгэл хангаагүй байжээ.

Хамгийн хоржоонтой нь, төлөвлөөгүй, гэнэт үүсэж болох ийм эрсдэл МАН-ыг зүгээр л хөмрөх аж. Ерөнхийлөгчийн сонгуулийн МАН-ын тал дахь уур амьсгалд эл жагсаал ихээхэн сөргөөр нөлөөлөх нь ч тодорхой боллоо. Эцэст нь, Т.Мөнхсайханыг огцорч буйд улсын тоног төхөөрөмжийг хувийн эмнэлэгт хулгайгаар аваачаад тавьчихдаг, өвчтнүүдээ өөрийн эзэмшлийн эмнэлэг, сүлжээ эмийн сан руугаа явуулдаг тогтсон нахаал сүлжээнийхэн бөөн баяр үлдэв. Үүнээс цааш ч эрх ашиг эл салбарт хөврөх биз ээ. Жагсаалтаас ганцхан өгүүлбэртэй л үлдлээ. Тэр нь, ард түмний тэвчээр үнэхээр алдагдаж, тэсрэхэд бэлэн болжээ. Үүнийг хөөрөгдөхөд ямагт бэлэн байгаа улс төрийн бүхэл бүтэн арим, баг буйг ч тэмдэглүүштэй.

Энэ мэдээнд өгөх таны үнэлгээ

Хуваалцаарай Жиргээрэй