АН-ын “дөрвөн бэрх” амь нэгтэй байж чадах болов уу

РЕДАКЦИЙН БУС КОНТЕНТ

Угаасаа лидер цөөхөнтэйг ч хэлэх үү?  байдаг гэх хэдэн лидерүүд нь аавын хаалга татах нь татаж, үлдсэн хэд нь ард түмний өмнө гарах ч нүүргүй  болсныг ч хэлэх үү? Ядахад яр гэгчээр талцал, тэмцэл нь дээд хэмжээндээ хүртэл хурцадсныг ч хэлэх үү? Удахгүй Ерөнхийлөгчийн сонгууль дөхөж байгаа ч урдах хэрүүл нь дуусах бүү хэл дундрах ч болоогүй байгааг ч хэлэх үү? Ардчилсан намынхны хувьд хаврын энэ өдрүүд халгаатайхан болж байна даа.

Дандаа бараан голдуу бүтэлгүй мэдээнүүд дунд чимэгтэй ганц нэг үйл явдал бас тэдэнд байна. Бутрал, хуваагдалтай байгаа ч бүлэг нь ерөнхийдөө нэг талдаа байгаа, О.Цогтгэрэлтэйгээ хамт. Нэмээд сүүлийн хэдэн жил их л нам гүм байгаа Лу.Гантөмөр, З.Нарантуяа, Х.Тэмүүжин тэргүүтэй мэдлэг боловсролтой, нийгмийн үнэлэмж давгүйтэй лидерүүд нь бас энэ талдаа гарснаа ил тод илэрхийлэх болжээ.

Гэхдээ шүүх, эдийн засаг, боловсрол гээд том сэдвүүдийг барьж, шинэчлэл, реформын түвшинд ярьдаг энэ 3 эрхэмд нэг сул тал бий. Тэр нь тэд өөрөөсөө өөр хэнтэй ч баг болоод явдаггүй талтай. Тиймдээ өнөөг хүртэл их том повертой, олон нийтээс дэмжлэгтэй ч ганц ганцаараа бие даан, хэнээс ч үл хамааран улс төр хийсээр ирсэн түүхтэй. Дээр нь шинэхэн дарга О.Цогтгэрэл нь бас хэний ч үг, тушаал авдаггүй  том толгойтой. Магадгүй тэд үүнийгээ эцэслээд, намынхаа унасан нэрийг босгоё, улсаа бодоё гээд нэгдээд зогсож байгаа ч байж магадгүй.

Гэхдээ зоргоороо, бас зоригоороо энэ хүртэл тэсээд, тэмцээд, нам дотроосоо арай дээр нь гэж олны хараанд өртөөд үлдсэн тэд цааш амь нэгтэй явж чадах болов уу? гэх эргэлзээ бай. Уг нь Ардчилсан нам амьд үлдэж, ирэх сонгуульд ялахын тулд та дөрөв л нэг баг шиг байж, атгасан гар шиг явбал намын гишүүддээ ч, ард түмэндээ ч хэрэгтэй шүү. Урт хугацаанд улс төрд хамтдаа азын дөрвөн бэрх шиг амь нэгтэй яваарай гэж хүсье дээ.

Энэ мэдээнд өгөх таны үнэлгээ

Хуваалцаарай Жиргээрэй