15 жил ярьж, арваад сайдын нүүр үзсэн төсөл авлигачдын ҮҮР, Д.Хаянхярваагийн баяжих хэрэгсэл болсон ТҮҮХ

УИХ-ын гишүүн асан, “Эрдэнэс Монгол” ХХК-ийн захирал асан Д.Хаянхярваа 500 мянган ам.доллар буюу 1.4 тэрбумын авлига авсан хэрэгтээ 40 саяар торгуулаад, нийтийн албан томилогдох эрхээ найман жилээр хасуулаад салсан.

Өмнөх удаа бид түүнийн хэнээс, ямар учиртай хахууль авсан талаар мэдээлсэн. Тодруулбал Д.Хаянхярваа өөрийн зөвлөх Ш.Уртнасан, нарийн бичгийн дарга нартайгаа үгсэн хуйвалдаж, маш олон жилийн өмнөөс хэрэгжүүлнэ гэсэн ч одоог хүртэл эхлээгүй байгаа “Шивээ энержи” төслийн удирдагч, "Эрдэнэс Шивээ Энержи” ХХК-ийн Гүйцэтгэх захирал Ш.Доржрагчаа, Эйкүсора ХХК-ийн захирал Ц.Отгонбаатар нараас хахууль авсан талаар мэдээлсэн.

-Д.ХАЯНХЯРВААД ХАХУУЛЬ ӨГӨГЧ Ш.ДОРЖРАГЧАА НАРЫН ТӨСЛИЙН БАГИЙНХАН АЖЛАА ӨГӨӨД ЯВЦГААЖЭЭ-

Тэгвэл энэ удаа Д.Хаянхярваад их хэмжээний хахууль өгөх болсон “Шивээ энержи” гэх төслийн талаарх мэдээллийг хүргэж байна.

Д.Хаянхярваагийн авлига авсан хэргээс үүдэлтэйгээр түүнтэй хамт ажиллаж байсан болон “Шивээ энержи” төслийн хамааралтай хүмүүсийг “Эрдэнэс монгол”-оос явуулж байгаа талаар эх сурвалжууд мэдээлж байна.Түүнчлэн хахууль өгөгч "Эрдэнэс Шивээ Энержи" ХХК-ийн Гүйцэтгэх захирал Ш.Доржрагчаа шүүхийн шийдвэрээр төрийн албан томилогдох эрхээ хасуулж, торгуулснаар ажлаа өгөөд “алга болжээ”.

Тиймээс төслийн багийнхан авлигын хэрэгт холбогдож, ажил төрлөө өгсөн ороо бусгай энэ цаг үед төслийн ирээдүй цаашид хэрхэх, ТЭЗҮ-г нь баталж, ажлыг нь эхлүүлэх нь тодорхойгүй нөхцөл байдалд орсон байна.  

-“ШИВЭЭ ЭНЕРЖИ” ТӨСЛИЙН ТАЛААР АЛБАНЫ ЭХ СУРВАЛЖУУД МЭДЭЭЛЭЛ ӨГӨХӨӨС ТАТГАЛЗАЖ, ЗАЙЛСХИЙВ-

Д.Хаянхярваагийн ажлыг авч, “Эрдэнэс монгол” компанийн захирлын ажлыг түр орлон гүйцэтгэж буй О.Хулантай холбогдож, эл төслийн ажил ямар шатандаа яваа, цаашид хэрхэх талаар тодруулахыг хүссэн ч “Энэ асуудлаар тодорхой шийдвэр, шийдэлд хүрээгүй. Тухайн үедээ ярилцлага өгнө. Одоо боломжгүй” гэх хариултыг хэвлэлийн албаараа дамжуулан өгөв.

Эрчим хүчний яамны зүгээс ч арав гаруй жил ярьж буй ч эхлэх нь бүү хэл ТЭЗҮ нь батлагдахгүй байгаа уг төслийн ажил яагаад өдий хүртэл гацсан, ямар асуудал байгаа талаар тодорхой мэдээлэл авахыг хүсэхэд мөн л “Эргээд холбогдоно” хэмээгээд таг чиг болов.

-2005 ОНЫ ҮЕД ЭХЛҮҮЛЭХЭЭР ЯРЬСАН УГ ТӨСЛИЙГ 2015 ОНД Ц.ЭЛБЭГДОРЖ ЕРӨНХИЙЛӨГЧ БАЙХДАА ҮЗЭГЛЭЖЭЭ-

“Шивээ энержи” гэх өндөр хүчин чадалтай цахилгаан станц барьж, БНХАУ руу эрчим хүч экспортлох төслийг хэрэгжүүлэх яриа хэлэлцээ бүр 2005-2006 оны үед яригдаж эхэлсэн гэх. Гэвч Хятадын талын өндөр албан тушаалтныг орчуулагч нь Төрийн ордонд тамхи татлаа гээд өшиглөж, согтуу нөхөр зочид буудлын цахилгаан шатанд цохиж унагасан гэх асуудал тухайн үед үүссэнээс хэлэлцээ зогсож байсан талаар хэвлэлүүд мэдэлэж байсан нь цагаан дээр хараар бичигдэж үлджээ.

Ингээд зогсонги байдалд орсон төслийг Ц.Элбэгдорж Монгол Улсын Ерөнхийлөгч байхдаа буюу 2015 оны нэгдүгээр сард БНХАУ-ын дарга Си Зиньпиний урилгаар төрийн айлчлал хийх үеэрээ Шивээ-Овоогийн ордыг түшиглэн эрчим хүчний цогцолбор барих ТЭЗҮ-ийг хамтран гүйцэтгэх гэрээ үзэглэж байжээ. Уг гэрээг манай талаас Эрчим хүчний яам, БНХАУ-ын талаас “State grid corporation of China” гарын үсэг зурснаар хэсэг завсарлаад байсан яриа хэлэлцээ дахин эрчимжсэн байна.

Улмаар 50 хувийг Төрийн өмчит Эрдэнэс Монгол ХХК, үлдсэн 50 хувийг хувийн хэвшлийн Шинэ Шивээ ХХК-ийн хувьцааг эзэмшдэг Эйкүора ХХК тус тус эзэмшдэг “Эрдэнэс Шивээ Энержи” ХХК-ийг Монгол Улсын Засгийн газрын 2016 оны 11 дүгээр сарын 16-ны өдрийн 64-р хуралдааны тэмдэглэлийг үндэслэн байгуулсан юм

Тус компани стратегийн ач холбогдол бүхий Шивээ-Овоогийн нүүрсний ордыг түшиглэн байгуулах Эрчим хүчний экспортын Шивээ Энержи цогцолбор төслийг нүүрсээр хангахаар болж, төслийг хэрэгжүүлэх бэлтгэл ажлыг хангах үүрэг бүхий төслийн нэгжийг “Эрчим хүчний яам” болон “Эрдэнэс Монгол” ХХК-ийн дэргэд байгуулсан байдаг.

-20 ИХ НАЯДЫН ӨРТӨГТЭЙ ЭЛ ТӨСӨЛ ХЭРЭГЖИХ ГЭЖ 20 ОРЧИМ ЖИЛ БОЛЖ, ЭЦЭСТЭЭ Д.ХАЯНХЯРВААГИЙН АВЛИГЫН ХЭРЭГСЭЛ БОЛЖ ДУУСАВ-

 “Шивээ энержи” нь Шивээ-Овоогийн хүрэн нүүрсний ордыг түшиглэн өндөр хүчин чадалтай цахилгаан станц барьж, БНХАУ-ын хойд бүс нутгийн хэрэглэгчдэд эрчим хүч борлуулах төсөл юм. Төсөл нь цахилгаан станц, нүүрсний уурхай, усан хангамж, дамжуулах шугам гэсэн дөрвөн хэсгээс бүрдэнэ. Шивээ-Овоод 5280 МВт хүчин чадалтай цахилгаан станц барихаар төлөвлөж буй. Станц нь найман зуухнаас бүрдэх агаад нэг нь 660 МВт-ын хүчин чадалтай байхаар тооцжээ. Монголын нутаг дээгүүр 360 км зайтай 660 кВ-ын агаарын шугам татна.

Цахилгаан станцыг барихад 3.83, дамжуулах шугам татахад 1.59, нүүрсний уурхайд 1.4 тэрбум, усан хангамжийн төсөлд 237.4 сая ам.долларын санхүүжилт хийхээр тооцжээ. Тэгэхээр төслийн нийт хөрөнгө оруулалт 7.1 тэрбум ам.долларт хүрэх нь. Монгол мөнгөөр бодвол 20 ин наяд гаруй гэсэн үг. Энэ бол  “Оюутолгой” төслийн эхний шатны хөрөнгө оруулалт болох 7.2 тэрбум ам.доллартой дүйх дүн.

Эрчим хүчний экспортын Шивээ Энержи цогцолбор төслийг хэрэгжүүлснээр Монгол Улс нь анх удаа эрчим хүчний экспортлогч орон болох зорилготой. Монгол Улсад нүүрсэд суурилсан эрчим хүчийг сэргээгдэх эрчим хүчтэй хослуулан хөгжүүлэх нь Монгол Улсын эдийн засаг, эрчим хүчний салбарын хөгжилд томоохон хувь нэмэр оруулах нь дамжиггүй.

Гэвч  олон жилийн турш, хоёр, гурван Ерөнхийлөгч, Ерөнхий сайдууд, арваад тооны Эрчим хүчний сайдын нүүр үзэж, гар дамжсан эл төсөл эцэстээ авлигачдын үүр уурхай болж, Д.Хаянхярваагийн баяжих хэрэгсэл болсон байсан нь тун харамсалтай.

Өмнөх нийтлэлийг эндээс уншина уу

ТАНИЛЦ: Д.Хаянхярваа ба түүний зөвлөхөд хахууль өгсөн 20 их наядын өртөгтэй “Шивээ энержи” ТӨСЛИЙНХӨН

Энэ мэдээнд өгөх таны үнэлгээ

Хуваалцаарай Жиргээрэй