ХУВИЛБАР: Д.Эрдэнэбилэгийн ХБ-ны 489 тэрбумын өрийг “Эрдэнэт”-ийн 400 сая ам.доллараас СУУТГАН ТООЦНО

Хөгжлийн банкны эл дуулианы үндсэн зорилго нь анхнаасаа “сахал” Д.Эрдэнэбилэг, Т.Бадамжунай нар луу чиглэсэн байсан гэх. Гэвчиг үндсэн зураглалаасаа хазайсан учир ЖДҮХС-гийн хэрэг шиг улс төрчид нь чирэгдэхгүйн тулд МАН-ын генсек Д.Амарбаясгалан тэргүүтнүүд түрүүлж, шүглээ үлээсэн дүр зураг харагдаж буй. Хэдий хазайсан ч анхны зураглал руугаа орох нь эрх баригчдад туйлын чухал юм.

УРЬДАЧ НӨХЦӨЛ: Д.Эрдэнэбилэгтэй хамааралтай бизнесүүд ХБ-д 489 тэрбумыг төлөх ёстой 

УИХ-ын хаврын чуулганы хугацаанд Хөгжлийн банкны шуугианыг анхдагч чиглүүлсэн эзэд рүү хэрхэн холбох талаарх ньюансыг уншуулъя. Энэ удаад ХХБ-ны ТУЗ-ийн дарга, “сахал” Д.Эрдэнэбилэгтэй Хөгжлийн банкны асуудлыг хэрхэн уях вэ агуулгыг тоймлов.

Хөгжлийн банкнаас Д.Эрдэнэбилэгтэй хамааралтай бизнес болох “Кью Эс Си” 71.3, “Хөтөл” 61.3 сая ам.долларыг тус бүр зээлсэн. Улсын дээд шүүхээс “Кью Эс Си” компанийн төлөх зээлийн хэмжээг 192.5 тэрбум гэж тогтоосон бол Хөгжлийн банкнаас “Хөтөл” ХХК-ийг 296.5 тэрбумыг нэхэмжилж, шүүхэд хандаад буй. Өөрөөр хэлбэл, Д.Эрдэнэбилэг Хөгжлийн банканд 489 тэрбумыг төлөх хүлээгдэлтэй байгаа гэсэн үг.

УГ ЗЭЭЛИЙГ “ЭРДЭНЭТ”-ИЙН 49 ХУВЬТАЙ ХОЛБОНО

Тэгвэл уг зээлийг юутай холбож, хэрхэн ажиллах вэ гэдэг дээр МАН-ынхны тархи ингэж гүйжээ. Тэр нь, “Эрдэнэт үйлдвэр”-ийн 49 хувийг ОХУ-аас оруулж ирсэн 400 сая ам.долларт оруулж тооцох. Суутган тооцлоо гэхэд, 489 тэрбум нь өнөөгийн ханшаар 171.5 сая орчим ам.доллартай тэнцэх юм. Уг дүнг 400 сая ам.доллараас хасч тооцох хэлцлийг Засгийн газраас Д.Эрдэнэбилэгийн багтай хийхээр төлөвлөжээ.

Хэлцэл хийхтэй холбоотой өмнөх шийдвэрүүдийг сануулахад, “Эрдэнэт үйлдвэр”-ийн 49 хувийг ОХУ-ын өмчлөлөөс 400 сая ам.доллараар худалдан авсан “Монголиан коппер корпорейшн” ХХК-тай Засгийн газар суутган тооцох хэлцэл хийх замаар төрд 100 хувь шилжүүлэн авахаар УИХ-ын 23-р тогтоолыг 2017 онд баталсан.

Гэвч хэлцэл өрнөхгүй байсаар өдийг хүрсэн. Улмаар өнгөрсөн намрын чуулганаар 23-р тогтоол дахь “ХЭЛЦЭЛ ХИЙХ” гэх үгийг хасах өөрчлөлт оруулах төслөө Засгийн газраас өргөн мэдүүлсэн. МАН-ын Их хурлаар Л.Оюун-Эрдэнийг баталсан долоо хоногт УИХ-аар хэлэлцэхээр товлогдсон байсан уг тогтоолын төсөл гэнэт алга болсон юм.

Тогтоолын төслийг УИХ-ын хаврын чуулганаар баталсны дараа ШУУД СУУТГАН ТООЦОХ эсвэл дээр дурдсанчлан Д.Эрдэнэбилэгийн багтай ХЭЛЦЭЛ ХИЙХ гэсэн хоёр хувилбар энд харагдаж буй юм.

СЭТГҮҮЛЧИЙН ТЭМДЭГЛЭЛ:

“Эрдэнэт үйлдвэр” 100 хувь монголын талд шилжсэн нь монголчууд ковидын үеийн хүнд нөхцөл байдлаа даван туулах гол хөшүүрэг болов. Нөгөө талд төр “хүчээр” 100 хувь авснаар Х.Бадамсүрэн хувиасаа өгч буй аятайгаар улс төрчдөд тал засдаг субьект болж хувирсан нь ч үнэн. Д.Эрдэнэбилэгийн багийнхан энэ хугацаанд ямагт “хүлцэнгүй” байж, “Эрдэнэт үйлдвэр”-ийн мөнгөөр гар угааж буй процесст нэг ч үг үл дуугарав. Нөгөө талд тэдний гэм буруутай эсэх агуулга шүүхээр шүүгдэхгүй асар удаж, ихэнх тохиолдолд хувийн хэвшил талд шүүхийн шийдвэрүүд гарсаар ирэв.

Өөрийнх нь барааны талыг хүмүүс юу ч асуухгүйгээр хэрэглээд л байхад нүд нь балай, чих нь дүлий суудаг Д.Эрдэнэбилэгийг өнөөдөр туйлын эх оронч бус гэж буруутгах өнцөг эс олдоно. Чөлөөт зах зээлтэй, ардчилсан орны жишгээр төр хувийн хэвшилтэйгээ бизнесийн зарчмаар хэлцэл хийж, шүүхийн асуудлаа өөр талд зарчмаар нь шийдэх учиртай гэсэн сэтгүүлчийн үзэл баримтлалаа энд дахин илэрхийлье.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй