Бүтэн зургаан өдөр хуралдахдаа ТЭД ард түмнийг, эдийн засгийг МАРТАВ

Өнөөгийн эдийн засагт тулгамдаад буй асуудлууд:

• Гадаад валютын нөөц багасаж, арилжааны банкнууд ам.долларын гүйлгээндээ хязгаар тогтоосон
• Ам.долларын ханш өссөний дээр төгрөгийн ханш буурч, инфляц нэмэгдсэн
• Гашуунсухайт тэргүүтэй нүүрс тээврийн боомтуудын үйл ажиллагаа доголдсон
• Бодлогын хүүг 9 хувь болгочихсон тул иргэдэд хэрэглээний зээл бага гарч, зээлийн хүү өсөх нөхцөл үүссэн.

Гэх мэт томоохон асуудлуудын улмаас, УИХ-ын гишүүн Ч.Хүрэлбаатарын хэлснээр “Монголын эдийн засаг чөлөөт уналт хийж байна”. Яг энэ өдрүүдэд Сангийн сайдын байр суурь сонсогдсонгүй. Ерөнхий сайд Л.Оюун-Эрдэнэ ямар бодлого, чиглэл шуурхай баримталж байгаа нь тодорхойгүй байна.

Ард түмэн огт сонгодоггүй, хариуцлага тооцож чаддаггүй Монголбанк гэдэг бүтцийн захирал Б.Лхагвасүрэн болохоор “Дэлхийн бусад орнуудад ч адил байна. Хил нээгдсэнээр валютын гадагш урсгал нэмэгдэж, яах ч аргагүй ийм нөхцөл байдал үүслээ” гэсэн мөлгөр тайлбар хэлнэ. Тэгээд бодлогын хүүгээ нэмж, иргэдэд ашиггүй, арилжааны банкнуудад л ашигтай нөгөө л явцуу шийдвэрээ дахиад гаргана.

Иргэдийн амьдрал, амьжиргаанд эдийн засгийн хүндрэл улам хүндээр нүүрлэх болоод удаж байхад тэдний элч төлөөлөгч болсон УИХ-ын гишүүдийн хэн нь ч эдийн засгийн агуулгаар дуугарсангүй. Засгийн газар бүр сураггүй. Учир нь өдөр бүр хуралтай, байсхийгээд хөдөө явж,  төмөр зам дээр тууз хайчилж байгаа.

Ялангуяа Эдийн засгийн форумын урьдчилсан хэлэлцүүлгийн өдрүүдэд Засгийн газрын гишүүд дэндүү ажлаа алдлаа. Цаг үеийн асуудлууд урссаар, сайд нарыг харин өрөөнд нь, олон нийтийн дунд биш форумын хэлэлцүүлгээс л олж болохоор өдрүүд өнгөрч байна. Бүтэн зургаан өдөр хуралдлаа. Одоо энэ зургаан өдрийн хэлэлцүүлгээ базаад, жинхэнэ форумаа хийнэ гэж байгаа.

Уг нь энэ хэлэлцүүлгүүд эдийн засгаа урт хугацаанд нь, салбар салбараар нь сэргээх агуулгатай ч гоёмсог танхим, хээнцэр хэв маягаар бүтэн зургаан өдөр хуралдахдаа ард түмний амьдралыг даанч орхигдуулав.

Г.САНСАРМАА

Өөрийн сэтгэгдлээ илэрхийл

Share Tweet