Түдгэлзэх гишүүдээ кнопны "найраа"-гаар бүү өршөөгөөрэй, парламентчид аа

Талбайд залуус нь нүргэлсэн жагсаал хийж, Ерөнхий сайд нь тэднийг гарч сонсоод, шийдвэрээ биечлэн танилцуулсан харьцангуй эрүүл үзэгдэл өнгөрөгч долоо хоногт өрнөв. Одоо гол нь үр дүн. Аргалж явуулаад, тэгс ингэс хийх аваас үүнээс ч хүчтэй нийгмийн давалгаа үүсэхээр буйг саях уур амьсгал харуулсан.

Яг энэ уур амьсгалыг Ерөнхий сайд Л.Оюун-Эрдэнэ залуу хүний хувиар сэргэг мэдэрсэн байж болох. Тэрбээр Засгийн газар, УИХ-ын төвшин дэх ажлын хэсгүүдийг өнгөрөгч амралтын өдрүүдээр хуралдуулав. Залуусын шаардлагад бодит үр дүн үзүүлж ажиллахыг Ерөнхийлөгч хүртэл уриалаад амжлаа. Ер нь талбайн нүргээн харьцангуй эрүүл, үнэн үнэртүүлсэн хэв шинжтэй байсан учраас Төрийн томчуулд сэрүүлэг өгч чаджээ.

Үүнээс цааших процесс гол нь хэрхэн өрнөх вэ. Залуус бүдүүн тойм маягийн долоон асуудлаар шаардлага тавьсан юм шиг мөртлөө яг задлаад харахаар нэлээд нарийвчлагдаж буй. Тухайлахад, дарга нарын тансаглалыг хумиж, албан тушаалтнуудыг өршөөгөөд байгаа хялбаршуулсан журмыг өөрчлөх, томчуулд яг адилхан хуулийн хариуцлага хүлээлгэх агуулга л гэхэд биелүүлэхэд нэлээд чанга.

"Чанга" гэдэг нь ч учиртай. Жагсаалын үеэр залуус Хөгжлийн банк тэргүүтэй асуудлаар шалгагдаж байгаа УИХ-ын гишүүдтэй хариуцлага тооцох асуудлыг хатуу сануулсан. Ерөнхий сайдын зүгээс ч тэр, Улсын ерөнхий прокурор түдгэлзүүлэх гишүүдийнхээ нэрийг УИХ-д оруулж ирэхийг уриалсан юм. Гэхдээ Прокурор нь оруулаад ирлээ гэхэд, нэгж УИХ-ын гишүүн танхимынхаа талаас ихгүй хувийг л найрахад тэр өршөөгдөх боломжтой.

Парламент энэ давуу эрхээ ашиглаж, УИХ-ын гишүүдийн хэргийг шүүхээр шийдэх боломжийг нь хаадаг байдал манайд бүр нахаль хэвэнд орж тогтсон. Яллагдах тогтоолдоо гарын үсэг зурахгүй, УИХ-ын гишүүнийхээ бүрэн эрхээр хамгаалалт үүсгээд суучихдаг кэйсүүд ч өчнөөн.

Одоогийн байдлаар л гэхэд, Б.Адьяасүрэн авлига өгч байгаад ил цагаан "гардуулсан" үйлдэлдээ ял авахгүйн тулд УИХ-ын гишүүний сэнтийд орж нуугдсан байдалтай. Эрх баригч намын хэд хэдэн гишүүн түдгэлзүүлэх хэмжээнд хэрэг нь хүндэрсэн сургаар парламентын нөхдөө найрах ажлаа эрчимжүүлээд эхэлчихсэн байх жишээтэй.

Залуус ийм завхарсан, шударга бус агуулгуудыг огт хүлээн зөвшөөрч чадахааргүй, тийм уур амьсгалтай буй. Тэгэхээр Засгийн газраас жагсагчдын хүсэлтийг хангах чиглэлд зоригтой алхмууд хийгээд, хуулийн төсөл оруулаад ирдэг. Тэр нь УИХ дээр унадаг. Прокурор нэр бүхий гишүүдийг гишүүдийг түдгэлзүүлэх хүсэлт өгдөг. Гишүүд өөр хоорондоо "найрагдаж", нэгнээ авч үлддэг.

Яг ийм байдлыг парламент үзүүлэх л юм бол Төрийн ордныхон бүхэлдээ тэсч үлдэхэд хэцүүхэн нөхцөл байдал үүсэхээр буйг эрх баригчдад сануулъя. Хармаа хотондоо наймаалцаж, ар өврийн хаалгаар монголын төрийг өчнөөн заваарууллаа. Одоо нийгмийн уур амьсгалаа мэдэрч, шударга агуулга руу дөхөх манлайллыг парламент өөрөө үзүүлэх хэрэгтэй.

Сонгодог парламент хөгжүүлдэггүй юм аа гэхэд сонгогдсон улсуудаа хамгаалдаг аврах танхим болоод байж болохгүй юм, УИХ. Нийгмээ дагаад залуу үе тань асар хэрсүү, ухаалаг болсныг сая жагсаал бэлхнээ харууллаа. Ер нь тэдэнд үнэнг санал болгохгүй л юухан хээхнээр хууртахаасаа лав өнгөрчээ.

Өөрийн сэтгэгдлээ илэрхийл

Share Tweet