ХӨШИГНИЙ АРД: Л.Оюун-Эрдэнэ түдгэлзүүлэх гишүүдийг дэмжихгүй гэдгээ илэрхийлж, кнопны найраанд гарчээ

Улсын Ерөнхий прокурор Б.Жаргалсайхан УИХ-ын гишүүн Ё.Баатарбилэг, Н.Алтанхуяг, Г.Амартүвшин, Х.Ганхуяг нарын гишүүдийн бүрэн эрхийг түдгэлзүүлэх саналаа УИХ-ын дарга Г.Занданшатарт хүргүүлсэн нь батлагдав.

Тэднийг түдгэлзүүлэх бичиг өчигдөр /2022.04.25/ ирсэн байна. Н.Алтанхуяг, Г.Амартүвшин, Х.Ганхуяг нарыг Хөгжлийн банкны, Ё.Баатарбилэгийг авлигын асуудлаар шалгахаар түдгэлзүүлэх санал гаргасан гэгдэж байна.

Прокурорын байгууллагын уг саналыг УИХ-ын тухай хуулийн 9.3-т зааснаар ажлын 5 өдрийн дотор гишүүний бүрэн эрхийг түдгэлзүүлэх эсэх асуудлыг шийдвэрлэх юм.

Түдгэлзүүлэх гишүүд кнопдоо найдаад орохоос өөр гарцгүй болж байна.

-"ГИШҮҮДИЙН ОЛОНХ ДЭМЖВЭЛ" ГЭДЭГ БӨӨРӨНХИЙ ЗААЛТААРАА ШИЙДВЭР ГАРГАНА-

Ингээд ороход тэднийг ямар нөхцөл байдал, хуулийн зохицуулалт угтах вэ.

ХУУЛИЙН ЗОХИЦУУЛАЛТ:

Ингэхдээ гишүүний бүрэн эрхийг түдгэлзүүлэх эсэх асуудлыг Улсын Их Хурлын гишүүний халдашгүй байдлын дэд хороо, Хууль зүйн байнгын хороо, Төрийн байгуулалтын байнгын хорооны санал, дүгнэлтийг үндэслэн нэгдсэн хуралдаанаар хэлэлцэж, Төрийн байгуулалтын байнгын хорооны саналаар нууцаар санал хурааж шийдвэрлэнэ.

Улмаар хуралдаанд оролцсон гишүүдийн олонх гишүүний бүрэн эрхийг түдгэлзүүлэхийг дэмжиж санал өгсөн бол энэ тухай тогтоол баталсанд тооцох аж.

Харин 9.6-д зааснаар гишүүний бүрэн эрхийг түдгэлзүүлэх шаардлагагүй гэсэн шийдвэрийг Улсын Их Хурал гаргасан бол баривчлагдсан гишүүнийг 1 цагийн дотор суллана” гэх заалтууд бий.

-НАМЫН ДАРГЫНХАА УРИАЛГААР МАН БҮЛЭГ ДЭЭРЭЭ ЗАДГАЙ САНАЛТАЙГААР ОРНО-

Ямартай ч эл асуудлыг бүлгээр оруулж хэлэлцэхээр болбол, намын даргын уриалгаар задгай саналтайгаар орох аж. Өөрөөр хэлбэл эдгээр гишүүдийг ДЭМЖИНЭ, ДЭМЖИХГҮЙ гэдэг шийдвэрийг бүлэг дээр гаргахгүй гэсэн үг.

Энэ ч утгаараа МАН 65-уулаа буюу өнөөдрийн нөхцөлд олонх байдлаараа гурван гишүүнээ хамгаалаад үлдэх магадлал хамгийн өндөр. Намын даргаасаа айхдаа МАН-ынхан өөрийн ГУРАВ дээрээ СӨРӨГ дарж мэдэхээр.

Ямартай ч сандралдсан гишүүд кнопны найраандаа хэдийн гарч намын даргаасаа эхлээд үүдийг нь сахиад эхэлчихсэн. Өчигдөр гэхэд л үдээс хойших Байнгын хорооны хуралдаанд харагдаагүй. Х.Ганхуяг машиндаа суугаад Төрийн ордоноос яаравчлан хөдөлсөн. Түдгэлзүүлэх бичгийн сургаар саарал ордонд үйл явдлууд бужигнаж, хөдөлгөөн оржээ.

-АРДЧИЛСАН НАМЫН ЗАРИМ ГИШҮҮД МАН-ТАЙ НИЙЛЖ Н.АЛТАНХУЯГЫГАА ЯВУУЛАХ КНОП ДАРНА-

Харин бүлэггүй болсон Ардчилсан нам сөрөг хүчний үүргээр оролцох боломжгүй. Өөрийн гишүүнээ хамгаалах ямар ч чадамжгүй. МАН-ынхан сөрөг хүчнийхээ ганц гишүүн Н.Алтанхуягыг түдгэлзүүлээд явуулахаас сийхгүй нөхцөл байдал үүсчихлээ.

Үүн дээр нэрмээс болж Д.Ганбат, Ш.Адьшаа, Ж.Батсуурь, Д.Ганибал нарын гишүүд МАН-ынхантай нийлээд Н.Алтанхуягийн эсрэг дарж мэдэхээр.

Ерөнхийдөө Хөгжлийн банкны зээлийн асуудалд нэр холбогдсон МАН-ын бусад гишүүдийг оруулж ирээгүй байж, Н.Алтанхуягаар туг тахиад өнгөрөх нь гэдэг хардлага үүсчихлээ.

Өөрийн сэтгэгдлээ илэрхийл

Share Tweet