“Хийцгүй” жагсаал: Т.Доржхандын ТОДРОХ зорилго

УИХ-ын гишүүн Т.Доржханд Сүхбаатарын талбай дээр жагсаал зохион байгуулж байна. Тэр урьдчилан мэдээлэл хийж, залууст урилга хүртэл тараасан. Үүнийхээ өмнө УИХ-ын чуулганы хуралдааныг орхин гарч, дахин хуралдаанд суухгүй гэж мэдэгдээд байв.

Т.Доржхандын зорилго, төсөөлөл ямар байсан нь таамаглахад хүндрэлтэй. Өмнөх “Ажлаа хий” залуусын жагсаал ихээхэн органик шинжтэй болж, нийгэмд үзэгдэл болсон. Үүнээс үлгэр авч, “гоё” жагсаал хийж, баатар дүрд тоглохыг хүссэн ч байж мэднэ. Гэхдээ жагсаал яг хэрхэн явагдаж байна, зохион байгуулалт хэр байна, залуус хэр зэрэг оролцож байна гэдэг нь л анхаарал татна.

“Өөрсдөө өөрчил, үгүй бол тар” уриатай жагсаал талбай дээр тоглолт, концерт шиг л дуу хууртай эхэллээ. Дуулж буй хүмүүсийн хандлага нь жагсаалын зорилгоо мэдрээгүй шинжтэй, баяр баясалтай,  хийцгүйрч буй аятай сууж харагдана. Иргэдийнхээ хамтаар эрх баригчдыг, УИХ-ыг шүүмжилж, хариуцлага тооцох агуулгатай ч найр наадам хийж байгаа мэт л эхэллээ, жагсаал.

Т.Доржханд жагсаалаа “тайван” гэж тодотгосон. Ямартай ч иргэдийг уур бухимдлаар турхиралгүй, дуулж хуурдах хэлбэрээр үргэлжлүүлье гэж төлөвлөсөн нь харагдаж байна. Гол нь үр дүн гарах уу, яг чин зорилгоор нэгдсэн иргэд ирэх үү гэдэг бол асуух асуулт. Харин иргэний жагсаал хийх, үзэл бодлоо илэрхийлэх эрхийг баталгаажуулж буйгаар нь үүнийг үгүйсгэж, буруутгаж болохгүй билээ.

Харин цаана нь УИХ-ын гишүүн Т.Доржхандын “тодрох” зорилго байгаа нь ойлгогдоно. Жагсаал нэгэнтээ болж, Засгийн газар, УИХ хууль батлан реформын шинжтэй ажлууд зохион байгуулж байгаа. Харин ийм жагсаал хийж, харагдах нь түүнийг улам бүр популист болсоор, гол дүрд тоглохоор төлөвлөөд буйг илтгэнэ. ХҮН-ын үзэл баримтлалыг сольж, олны анхаарлыг хурцаар татах үйлдлүүд хийж эхэлсэн нь сонирхолтой байгаа юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй