Иргэний мэдээлэл: Уран олборлох компани малчдыг машинаар дайрч, гэмтээсэн

Дундговь аймгийн Өлзийт сумын Буянт багт "Гурвансайхан" ХХК хамгаалагчид оруулан малчдыг дээрэлхэж, хүчирхийлэл үйлдэж байна гэх иргэдийн гомдол мэдээлэл манай сайтад ирэв. Уг асуудалтай холбоотойгоор наймдугаар сарын 15-ны өдөр нэг малчин зодуулж хөл нь хугарсан байж болзошгүй нөхцөл байдалтай байгаа юм байна.

 Тэгвэл бид Дундговь аймгийн Өлзийт сумын ИТХ-ын төлөөлөгч Э.Сайхантуяагаас болсон асуудлын талаар асууж тодрууллаа.

-Танай суманд уран олборлолттой холбоотой ямар нөхцөл байдал үүсээд байна?

-"Гурвансайхан" ХХК уран олборлохоор одоогоор найман өрөм ажиллуулж байна. Малчид өрмийг нь зогсоохоор 4-5 өдөр эсэргүүцлээ илэрхийлж байна. Мөн жагсаал хийлээ. Гэтэл уран олборлож байгаа компани нь хамгаалалт авсан. Тухайн хамгаалагчид нь эр, эм хамаагүй иргэдийн биед халдаж хүчирхийлэл үйлдэж байна. Хэл амаар хараах, занах зэрэг үйлдэл гаргах боллоо.

-Эсэргүүцсэн нэг иргэний хөлийг машинаар дайрч хугалсан гэх мэдээлэл үнэн үү?

-Манай нөхрийн хөлийг дайрсан. Шөнө 09.00 цагийн үед нь очиж малчидтайгаа уулзчихаад гэртээ ирж хоносон. Маргааш өглөө нь хүмүүс цөөрсөн хойно машинаараа дайрч орцгоосон. Машин болгоныг нь хар хувцастай хамгаалагчид дагалдаж яваа. Тэр хамгаалагчид малчдыг барихыг нь барьж, түлхэхийг нь түлхэж машинаа тус хэсэг рүү оруулсан юм билээ. Тэр үйл явдлыг эсэргүүцэж машиныг нь зогсоосон. Та нар ч гэсэн монгол хүмүүс шүү дээ хэмээн хэлж байтал хамгаалагчид нь ирээд хаалганаас нь бариад зогсож байсан манай нөхрийг гараас нь угз татан өргөж авч шидсэн бичлэг нь байгаа. Тэр усанд явсан машин манай нөхрийн хөл дээгүүр гарсан. Харсан хүмүүс олон байгаа. Яг дайрч байгааг нь бичиж авч амжаагүй.

-Дайруулсан иргэний биеийн байдал ямар байгаа вэ?

-Өчигдөр рентгенээр харуулахад хавдар ихтэй учраас онош нь гараагүй байгаа. Цагдаагийн байгууллагаас мэдүүлэг авсан.

-Тухайн компани зөвшөөрөлтэй эсэх тал дээр?

-Зөвшөөрлөө үзүүлэхгүй байгаа. Та нар шиг хүмүүст үзүүлэхгүй гэсэн тайлбарыг өгсөн. А лиценз гэж нэг юм байгаа гэсэн. Тэрийг хаанаас хэн олгосныг үнэндээ мэдэж болохгүй байна.

-Танай нөхрөөс гадна өөр хүн хүчирхийлэлд өртсөн тохиолдол байгаа юу?

-Байгаа манай нутгийн нэг малчныг авч чулуудсан. Тэр ах өмнө нь хууч өвчтэй байсан юм билээ. Одоо бие нь өвдөөд манай нөхөртэй хамт эмнэлэгт ирсэн. Малчид зогсоох хүртлээ тэмцлээ өрнүүлнэ гэж байгаа. Ямар ч баримт нотолгоогүй байж уран хоргүй хүлээн зөвшөөр гээд тулгадаг. Зөвхөн тухайн баг гэхэд 283 өрхтэй, нөгөө баг нь ч гэсэн олон иргэнтэй.

-Уранд хордсон гэх хонь малын сэг зэмийн зураг явсан. Үнэхээр хордсон хэрэг үү?

-Сүүлийн хэдэн зураг бол манай тэрүүгээр үхсэн малын сэг зэм мөн.

НЭМЭЛТ: Дундговь аймгийн Өлзийт сумын Буянт багт  уран олборлож, иргэдийг дайрч гэмтээсэн гэх "Гурвансайхан" ХХК 2020 онд цөмийн болон цацрагийн аюулгүй байдлыг хангахтай холбоотой аюулгүй ажиллагааны шаардлагыг зөрчин ажиллагааг нь түр зогсоож байжээ.

Энэ мэдээнд өгөх таны үнэлгээ

Хуваалцаарай Жиргээрэй