Монголын "Халк" М.Лхагвагэрэл: Аваргын төлөөх барилдаанд жаахан л алдаа гаргаад ялагдчихлаа

Завханы М.Лхагвагэрэл гэж зартай бөх төрж байна. Тэр үндэсний бөхөд ч, чөлөөт бөхийн дэлхийн тавцанд ч тэр “тахал” мэт аюултай, ур чадвартай бөхийн тоонд албан ёсоор орж ирснээ дэлхийн аваргаас мөнгөн медаль хүртэж нотоллоо.

Белградын дэвжээний хагас шигшээд “Токио-2020” олимпын мөнгө, “Рио-2016” олимпын хүрэл медальт, 2017, 2018, 2019 оны дэлхийн аварга Гүржийн Гено Петриашвилиг 4:2-оор ялсны дараа түүний гаргасан сэтгэл хөдлөл, биеийн хэлэмж яг л “Халк” шиг харагдаж байв.

Манай улсын чөлөөт бөхийн үе үеийн тамирчид хүнд жин буюу 125 кг-д олимп, дэлхийн дэвжээнээс медаль авахыг зорьж, зүтгэсээр ирсэн ч алтын төлөө зогсож байсан түүх байхгүй. Харин энэ замналыг эвдэж чөлөөт бөхийн 125 кг-ийн жинд Монголын нэрийг тахлах болсон Үндэсний шигшээ баг, “Хилчин” спорт хороо, “Даян” дэвжээ, “Жем интэрнэшнл” компанийн бөх М.Лхагвагэрэлтэй уулзаж хэсэг хором ярилцлаа.

-Өнгөрсөн жилийн дутуугаа гүйцээж дундуураа дүүргэн энэ удаа мөнгөн медаль хүртлээ. ДАШТ-ий төлөөх барилдааны онцлог юу байв?

-Энэ жилийн дэлхийн аварга урамтай сайхан болж өндөрлөлөө. Өмнө жил Норвегийн Осло хотод болсон дэлхийн аваргын тэмцээнээс хүрэл медаль хүртсэн. 2021 оны Токиогийн олимпод тавдугаар байрт орсон ч өнөө жил амжилтаа ахиулж мөнгөн медаль авсандаа баяртай байна.

ТАХА АХГЮЛЬ АВАРГЫГ ДАРАА ТААРАХ ЮМ БОЛ ЗААВАЛ ЯЛНА

-Өнгөрсөн олимпоор Таха Ахгюль аваргатай барилдан ялагдсан. Энэ жил ахиад тахим буулгалаа. Нэлээд төлөвлөгөөтэй барилдсан байх?

-Таха Ахгюль аваргад хоёр удаа ялагдлаа. Жингийнхээ гурван гол өрсөлдөгчтэйгөө тактик боловсруулж барилддаг. Ялагдал бүхэн амттай шүү дээ. Ахиад таарвал ялах байх. Харин Гено Петриашвил аваргатай яг боловсруулсан тактикийн дагуу барилдаад давсан. Гэхдээ аваргын төлөө жаахан алдаа гаргаад Таха Ахгюль аваргад ялагдсан. Аваргын төлөөх барилдаан тактикаас жаахан зөрсөн гэж хэлж болно. Өөрөө алдаа гаргасан учраас дүгнэлт хийж байгаа. Дараа дараагийн тэмцээнд жаахан хичээгээд барилдчихад ялах боломжтой.

 -Гено Петриашвил аваргыг ялсан дараа гаргасан сэтгэл хөдлөл биеийн хэлэмж тань Халктай их адилхан харагдсан?

-Тийм гэж үү. Тэр үедээ гаргасан сэтгэл хөдлөлөө одоо би сайн санахгүй байна. Ямартай ч баяртай байсан байх.

 -Дараагийн удаа Таха Ахгюль аваргатай хэрхэн барилдвал ялах юм шиг харагдаж байна?

-Хоёр дахь довтолгоог л би зогсоочихсон бол ялах магадлалтай байсан. Дараагийн удаа ялна.

-Монголоос хүнд жин буюу 125 кг-д дэлхийн аваргын төлөө барилдсан анхны бөх боллоо. Энэ талаараа их онцгой байлаа шүү дээ?

 -Миний жинд барилддаг байсан дээр үеийн ах нар маань маш сайн барилдаж л байсан. Харин би өөрийгөө тэдний залгамж халаа болж гарч ирж байна гэж боддог. Өмнөх үеийн ах нарын маань л заасан зам мөр шүү дээ.

-Шагналын тавцанд зогсож байхад ямар сэтгэгдэл төрөв. 125 кг-ийн дэлхийн босоо аваргуудтай хамт зогссон шүү дээ?

 -Нэг залуугаас бусад нь медалийн тавцанд зогсдог аваргууд шүү дээ. Медалийн тавцанд зогсоход баяртай байсан хэдий ч яг зорьсон зорилгодоо хүрч чадаагүй. Тийм учраас зорилгоо биелүүлэхийн төлөө илүү их шамдах хэрэгтэй байна.

БИ ДЭВЖЭЭН ДЭЭР ГАРАХДАА МЕДАЛЬ БОДОЖ ГАРДАГГҮЙ

-Дэлхийн аварга болж чадсангүй дээ гэж гуниглах, мөнгөн медаль хүртчихлээ гээд баярлах хоёрын аль нь танд илүү хүчтэй мэдрэгдэж байна?

-Би дэвжээнд гарахдаа медаль бодож барилддаггүй. Энэ спортод хайртай учраас барилдах гэж л дэвжээн дээр гардаг. Дуртай юмаа хийж байгаа маань миний хамгийн том зорилго болдог. Дэвжээн дээр гарахаараа би маш их аз жаргалтай болчихдог. Надад ер нь барилдах л чухал. Тийм учраас аль нь ч тэгж хүчтэй нөлөөлөхгүй байх.

-Энэ жил та улсын заан цолоо дэлхийн аваргын мөнгөн медальтай хослууллаа. Их таатай санагдаж байгаа байх?

-Тэгэлгүй яах вэ. Үндэсний бөх, чөлөөт бөхөөр барилдах нь хоёулаа л нэг нэгдээ их тус дэмтэй байдаг. Монгол үндэсний бөх өөрөө их сайхан спорт шүү дээ.

-Бөхийн спорт сонирхогчид цаашдаа алинаар нь илүү тууштай явах бол хэмээн ярилцаж байна. Энэ тал дээр?

-Үндэсний бөх, чөлөөт бөхөөр зургаан залуу заан хослуулж барилдаад л амжилт гаргасан. Тийм учраас би ч гэсэн хослуулаад л явна гэж бодож байгаа.

-Дэлхийн дэвжээнд амжилт гаргахад бэлтгэл хангагчийн асуудал яригддаг. Жишээ нь хүнд жингийн бөхчүүд бага жингийн бөхчүүдтэйгээ барилдахаар гэмтээчих гээд байдаг талтай. Бэлтгэл хийхэд ямар асуудал тулгарч байна?

-Манай дээд жингийн ах нар надад бэлтгэл хангахад их тус хүргэдэг. Дүү нар маань ч гэсэн чөлөөт бөхөө сонирхож энэ жинд ороод ирвэл сайхан л байна. Мөн гаднын улсуудад бэлтгэл хийхэд их үр дүнтэй санагдаад байгаа.

 -Та түрүүн хэлсэн би бодсон зорьсон зүйлдээ хараахан хүрээгүй байгаа гэж. Тэгэхээр цаашдын зорилго юу байна?

-Ойрын тэмцээн гэвэл 12 сард дэлхийн цомын төлөөх барилдаан болно. Бусад зорилгынхоо талаар нэг их ярихгүй. Харин хийж харуулмаар байна. Ямартай ч боломжгүй зүйл гэж байхгүй. Тиймээс ялна гэсэн зорилго надад бий. Олимп, дэлхийн аварга болоход ойрхон байна.

-Олимпоос медаль хүртэхээр тань ярилцана гэж найдаж байна

-Ерөөл бат оршиг.

-Цаг гаргасанд баярлалаа.

Энэ мэдээнд өгөх таны үнэлгээ

Хуваалцаарай Жиргээрэй