2022 оны ДАШТ, 2023 оны Азийн АШТ-ий урьдчилсан шатны F хэсэгт ѳрсѳлдѳж буй Монголын шигшээ баг дѳрѳв дэх тоглолтоо Киргизийн эсрэг хийхэд бэлэн болоод байна.
Өнөөдөр тоглолтын өмнө техникийн зөвлөгөөн болон хэвлэлийн бага хурал амжилттай болж өнгөрлөө. Киргизийн шигшээ багийн ахлах дасгалжуулагч Александр Крестинин “Бидний гол зорилго хожил авах. Олон гоолын зөрүүгээр хожих үгүй нь тийм ч чухал биш. Монголын шигшээ баг талбайдаа тун хүчтэй өрсөлдөөн үзүүлдэг санагдсан. Тиймээс бид байж болох хамгийн хүчтэй бүрэлдэхүүнээ гаргана” хэмээн ярилаа.
Харин Монголын шигшээ багийн ахлах дасгалжуулагч Майкл Вайсс “Японтой тоглосноос өөр тоглолт үзүүлнэ. Японтой тоглоход ур чадварын зөрүү гарсан ч энэ удаад тэгэхгүй. 2017 онд Киргизийн багт 3:0-ээр хожигдоход 23-аас доош насны залуус тухайн тоглолтод оролцсон гэдгийг санах хэрэгтэй. Энэ бол үндэсний шигшээ баг. Юу чаддагаа харуулах болно” гэсэн юм.
Манай шигшээ багийн хувьд хэд хэдэн давуу тал байгаагийн эхнийх нь ѳѳрсдийн талбай, үнэнч хѳгжѳѳн дэмжигчид. Мөн хуудасны улмаас Японтой хийсэн тоглолтыг ѳнжсѳн С.Ганхуяг энэ тоглолтод оролцох боломжтой. Киргизийн багаас оноо авч чадвал Монголын шигшээ баг арваннэгдүгээр сарын 19-нд Мьянмарын талбайд давуу талтай зочилно.
Аравдугаар сарын 15-нд 16:00 цагаас эхлэх Монгол - Киргизийн тоглолтыг та бүхэн МХБХ-ны цэнгэлдэх хүрээлэнд хүрэлцэн ирж үзнэ үү.
Эх сурвалж: Монголын хөлбөмбөгийн холбоо
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.